Read Ge'ez NT – ሐዲስ ኪዳን በልሳነ ግእዝ ኀበ ሰብእ ዕብራውያን 8 Bible Online

ኀበ ሰብእ ዕብራውያን 8 - Ge'ez NT – ሐዲስ ኪዳን በልሳነ ግእዝ bible

ኀበ ሰብእ ዕብራውያን 8

¹ እስመ ቀዳሚሁሰ ለዝንቱ ኵሉ ሊቀ ካህናቲነ ዘነበረ በየማነ መንበረ ኀይል በሰማያት።

²እንዘ ይቀውም ሎሙ ለቅዱሳን በደብተራ ጽድቅ እንተ እግዚአብሔር ተከላ ወአኮ ሰብእ።

³ ወኵሉ ሊቀ ካህናት ይሠየም ከመ ያብእ መሥዋዕተ ወቍርባነ እስመ ግብሩ ውእቱ ከመ ያብእ ከመዝ።

⁴ሶበሁ በምድር ውእቱ እምኢኮነ ሊቀ ካህናት እስመ ሀለዉ ውስቴታ ካህናት እለ ያበውኡ መሥዋዕተ በሕገ ኦሪት።

⁵ እሙንቱ እለ ይፀመዱ ጽላሎታ ወአርኣያሃ ለእንተ በሰማያት በከመ አርአዮ ለሙሴ ዘከመ ይገብራ ለይእቲ ደብተራ ወይቤሎ ዑቅ እንከ ከመ ትግበር ኵሎ ዘከመ ርኢከ በውስተ ደብር አርኣያሃ።

⁶ወይእዜሰ እንተ ትኄይስ መልእክተ አድምዐ ወለእንተ ተዐቢ ሥርዐት ኅሩየ ኮነ ኢየሱስ ክርስቶስ ወሠርዐ ተስፋ እንተ ትኄይስ።

⁷ሶበሁ ንጽሕተ ኮነት ቀዳሚት እምኢፈቀደ ካልእተ።

⁸ ወባሕቱ ሐዪሶ ኪያሆሙ ይቤ «ናሁ ይመጽእ መዋዕል ይቤ እግዚአብሔር ወእሠርዕ ለቤተ እስራኤል ወለቤተ ይሁዳ ሕገ ሐዲሰ።

⁹ ወአኮ ከመ ዝንቱ ሕግ ዘሠራዕኩ ለአበዊሆሙ አመ አኀዝኩ በእደዊሆሙ ወአውፃእክዎሙ እምድረ ግብፅ እስመ እሙንቱኒ ኢነበሩ በሥርዐትየ ወአነኒ ተሀየይክዎሙ ይቤ እግዚአብሔር።

¹⁰ እስመ ዛቲ ይእቲ ሥርዐት እንተ እሠርዕ ለቤተ እስራኤል እምድኅረ እማንቱ መዋዕል ይቤ እግዚአብሔር እወዲ ሕግየ ውስተ ኅሊናሆሙ ወእጽሕፎ ውስተ ልቦሙ ወእከውኖሙ አምላኮሙ ወእሙንቱኒ ይከውኑኒ ሕዝብየ።

¹¹ ወኢይምህር እንከ እኍ እኅዋሁ እንዘ ይብል አእምርዎ ለእግዚአብሔር እስመ ኵሎሙ የአምሩኒ ንኡሶሙ ወዐቢዮሙ።

¹²ከመ እሣሀሎሙ ወእስረይ ሎሙ ኀጢአቶሙ ወኢይዜከር ሎሙ አበሳሆሙ።»

¹³ወብሂለ ቃሉሰ በእንተ ሐዲስ ትእዛዝ ፈቂዶ እስመ ቀዳሚት በልየት ወዘሰ ይበሊ ወይረስእ ቅሩብ ውእቱ ለሙስና።