Read Ge'ez NT – ሐዲስ ኪዳን በልሳነ ግእዝ ኀበ ሰብእ ዕብራውያን 9 Bible Online

ኀበ ሰብእ ዕብራውያን 9 - Ge'ez NT – ሐዲስ ኪዳን በልሳነ ግእዝ bible

ኀበ ሰብእ ዕብራውያን 9

¹ወለቀዳሚትኒ ደብተራ ባቲ ሥርዐተ ምሥዋዕ፥ ወመቅደስ።

² ወለቀዳሚትኒ ደብተራ እንተ ተሠርዐ ትርሢታ ባቲ ተቅዋመ መራናት ወማእድ ወኅብስት ዘይሠርዑ።

³ ወይብልዋ ቅድስተ ወለውሳጢትሰ ደብተራ እንተ እምድኅረ ካልእ መንጦላዕት ይብልዋ ቅድስተ ቅዱሳን።

⁴ ወውስቴታ ማዕጠንት ዘወርቅ ወታቦትኒ እንተ ውስቴታ ኦሪት እንተ ይከድንዋ በወርቅ ውቱረ ወውስቴታ መሶበ ወርቅ ዘመና ወበትረ አሮን እንተ ሠረጸት ወጽላትኒ ዘኦሪት።

⁵ ወመልዕልታ ኪሩቤል ዘስብሐት ይጼልሉ ዲበ ምሥሃል ወኢኮነ ይእዜ ጊዜሁ ከመ ንንግር በበገጹ።

⁶ ወዘከመዝ ሥርዐቱ ወትርሲቱ ወውስተ ጸናፊትሰ ደብተራ ዘልፈ ይበውኡ ካህናት ይግበሩ ምሥዋዒሆሙ ኵሎ ጊዜ።

⁷ ወውስተ ውሳጢትሰ ምዕረ በበ ዓመት ይበውእ ሊቀ ካህናት ባሕቲቱ ምስለ ደም ዘያበውእ በእንተ ርእሱ ወበእንተ ሕዝቡ በበይነ ኀጢአቶሙ።

⁸ወከመዝ አዘዘ መንፈስ ቅዱስ እስመ ዓዲሃ ኢተዐውቀት ፍኖቶሙ ለቅዱሳን በቀዳሚት ደብተራ።

⁹ወባሕቱ አምሳለ ኮነ ዝክቱ ለዝንቱ መዋዕል ዘቦቱ ያበውኡ ቍርባነ ወመሥዋዕተ ዘኢይክል ፈጽሞ ለዘያቄርቦ።

¹⁰ ወስእኑ ዘእንበለ በመባልዕት ወበዘይሰትዩ ወጥምቀታት ዘዘ ዚኣሁ እንተ ይእቲ ሕግ ዘሥጋ እስከ አመ ይትራታዕ ዘተሠርዐ።

¹¹ ወክርስቶስሰ ዘመጽአ ከዊኖ ሊቀ ካህናት ለእንተ ትመጽእ ሠናይት በውስተ እንተ ተዐቢ ወትኄይስ ደብተራ እንተ ኢገብራ እደ ሰብእ ወኢኮነት በውስተ ዝ ዓለም።

¹²ወአኮ በደመ ላሕም ወጠሊ ዘቦአ አላ በደመ ዚኣሁ ቦአ በምዕር ውስተ ቅድስት ዘለዓለም ወረከበ መድኀኒተ።

¹³ ሶበ ደመ ላሕም ወጠሊ ወካዕሴ ዕጐልት ያነጽሕ እምኀጢአት ወይቄድሶሙ ሥጋሆሙ ለእለ ረኵሱ።

¹⁴ እፎ እንከ ፈድፋደ ደሙ ለክርስቶስ ዘሦዐ ርእሶ በመንፈስ ዘለዓለም ለእግዚአብሔር ዘአልቦ ነውር ያነጽሕ ሕሊናነ እምግብር ምዉት ከመ ናምልኮ ለእግዚአብሔር ሕያው።

¹⁵ ወበእንተዝ ለሐዳስ ሥርዐት ኢየሱስ ኅሩየ ኮነ ከመ ጥዒሞ ሞተ ያድኅኖሙ ለእለ ስሕቱ በቀዳሚ ሥርዐት እለ ሎሙ አሰፈወ ወጸውዖሙ ውስተ ርስቱ ዘለዓለም።

¹⁶ኀበ ሀሎ ሥርዐት ግብር ይመጽእ ሞት ላዕለ ዘሠርዐ።

¹⁷ሥርዓቱሰ ለዘይመውት ጽንዕት ይእቲ እስመ ኢትበቍዕ አመ ሕያው ውእቱ ዘሠርዓ።

¹⁸ከማሁ ቀዳሚትኒ ዘእንበለ ደምሰ ኢተሐደሰት ሥርዐት።

¹⁹ወነጊሮ ሙሴ ኵሎ ትእዛዘ ኦሪት ለኵሉ ሕዝብ ይነሥእ ደመ ላሕም ወጠሊ ምስለ ማይ ወፐፒረለይ ወቈጽለ ሁስጱ ወይነዝኅ መጽሐፈ ኦሪትኒ ወኵሎ ሕዝበ።

²⁰ ወይቤሎሙ ዝውእቱ ደመ ሕግ ዘአዘዘክሙ እግዚአብሔር።

²¹ ወይነዝኅ ደብተራሂ ወኵሎ ንዋየ ግበሪሆሙ።

²² ወዓዲ ይሬሲ ከመዝ በቅሩብ ወበደም ይነጽሕ ኵሉ በሕገ ኦሪት ወዘእንበለ ይትነዛኅሰ ደም ኢይሰረይ።

²³ ወእመሰ ዝኩ ግብር ዘበአምሳለ ሰማያት በዝንቱ ደም ይነጽሕ ውእቱሰ ዘበሰማያት መሥዋዕት ይኄይስ ወየዐቢ እምዝ።

²⁴ ወአኮ ውስተ ግብረ እደ ሰብእ ዘቦአ ኢየሱስ ኀበ ቅድስት እንተ ተገብረት በአርኣያ ጽድቅ ዘእንበለ ውስተ ሰማይ ከመ ያስተርኢ ቅድመ ገጹ ለእግዚአብሔር በእንቲኣነ።

²⁵ ወአኮ ዘልፈ ዘይሠውዕ ርእሶ ከመ ዘይገብር ሊቀ ካህናት ወይበውእ ውስተ ቅድስተ ቅዱሳን በበዓመት በደመ ባዕድ።

²⁶ ወእመ አኮሰ ብዙኀ እምተቀትለ እምፍጥረተ ዓለም አላ ይእዜ ምዕረ በኅልቀተ ዓለም ሦዐ ርእሶ ከመ ይስዐራ ለኀጢአት በመሥዋዕቱ።

²⁷ ወበከመ ጽኑሕ ለሰብእ ምዕረ መዊት ወእምድኅሬሁ ደይን።

²⁸ ከማሁ ክርስቶስኒ ምዕረ ሦዐ ርእሶ ከመ ይኅድግ ኀጢአቶሙ ለብዙኃን ወዳግመሰ ዘእንበለ ኀጢአት ያስተርእዮሙ ለእለ ይሴፈውዎ ያሕይዎሙ።