Read Ge'ez NT – ሐዲስ ኪዳን በልሳነ ግእዝ መልእክተ ያዕቆብ ሐዋርያ 1 Bible Online

መልእክተ ያዕቆብ ሐዋርያ 1 - Ge'ez NT – ሐዲስ ኪዳን በልሳነ ግእዝ bible

መልእክተ ያዕቆብ ሐዋርያ 1

¹ እምያዕቆብ ገብረ እግዚአብሔር ወእግዚእነ ኢየሱስ ክርስቶስ ለዐሠርቱ ወክልኤቱ ሕዝበ ድዮስጶራ ሰላም ለክሙ።

² ኦ አኀው ኩኑ በኵሉ ፍሥሓ ሶበ መንሱት ይመጽአክሙ ዘዘ ዚኣሁ።

³እንዘ ተአምሩ ከመ መከራሃ ለሃይማኖትክሙ ትዕግሥተ ይገብር ለክሙ።

⁴ወትዕግሥትሰ ግብር ፍጹም ባቲ ከመ ትኩኑ ፍጹማነ ወጥዑያነ እንዘ አልቦ ዘተኀጥኡ።

⁵ ወእመሰ ቦ ዘኀጥኣ ለጥበብ ለይስአል ኀበ ወሃቢ እግዚአብሔር ዘይሁብ ለኵሉ በስፉሕ እንዘ ኢይትዔየር ወኢይዘረኪ ወይትወሀብ ሎቱ።

⁶ ወይስአል እንዘ ይትአመን ወኢይናፍቅ እስመ ዘይናፍቅሰ ይከውን ከመ ሞገደ ባሕር እንተ ይዘብጣ ነፋስ ወያነውኃ።

⁷ወኢይምሰሎ ለውእቱ ብእሲ ከመ ዘይነሥእ ምንተኒ እምኀበ እግዚአብሔር።

⁸ እስመ ብእሲ ዘክልኤ ልቡ ህዉክ ውእቱ በኵሉ ፍኖቱ።

⁹ ለይትመካሕ እኁነ ነዳይ በተልዕሎቱ።

¹⁰ ወባዕልሰ በተትሕቶቱ እስመ ከመ ፍሬ ሣዕር የኀልፍ።

¹¹ እምከመ ሠረቀ ፀሓይ ምስለ ላህቡ ያየብሶ ለሣዕር ወፍሬሁኒ ይወድቅ ወሥነ ራእዩኒ ይትኀጐል ከማሁኬ ባዕልኒ በፍናዊሁ ይጸመሂ።

¹² ወብፁዕ ብእሲ ዘይትዔገሣ ለእኪት እስመ ተመኪሮ ይነሥእ አክሊለ ሕይወት ዘአሰፈዎሙ እግዚአብሔር ለእለ ያፈቅርዎ።

¹³ ወእመ ቦ ዘይትሜከር ኢይበል እግዚአብሔር ያሜክረኒ እስመ እግዚአብሔር ኢያሜክር ለእኪት ወውእቱሰ ኢያሜክር ወኢመነሂ።

¹⁴ አላ አሐዱ አሐዱ ይትሜከር በፍትወተ እንቲኣሁ ወይወፅእ ኀቤሃ ወይደነግፅ።

¹⁵ ወፍትወትሰ እምከመ ፀንሰት ትወልዳ ለኀጢአት ወኀጢአትኒ እምከመ ተፈጸመት ትወልዳ ለሞት።

¹⁶ኢያስሕቱክሙ አኀዊነ ፍቁራን።

¹⁷ ኵሉ ሀብት ሠናይ ወኵሉ ፍት ፍጹም እምላዕሉ ይእቲ ትወርድ እምኀበ አቡሃ ለብርሃን ውእቱ ዘአልቦ ተውላጥ ኀቤሁ ወአልቦ ምንትኒ ዘያመሥጥ እምእዴሁ።

¹⁸ እስመ በፈቃዱ ወለደነ በቃለ ጽድቁ ከመ ንኩን ቀደምተ ለፍጥረቱ።

¹⁹ ወይእዜኒ አኀዊነ ኩኑ ወይኩን ኵሉ ብእሲ ፍጡነ ለሰሚዕ ወጕንዱየ ለነቢብ ወጕንዱየ ለመዓት።

²⁰ እስመ መዓቱ ለብእሲ ጽድቀ እግዚአብሔር ኢያጌብሮ።

²¹ ወይእዜኒ ኅድግዋ ለኵላ ርስሐት ወለኵላ እኪት ወበየውሀት ተቀበልዎ ለቃል ዘተዘርዐ ውስተ ልብክሙ ዘይክል አድኅኖታ ለነፍስክሙ።

²² ወኩኑ ገባርያኒሃ ለሕግ ወአኮ ለአጽምዖ ባሕቲቱ ኀልይዎ እስኩ ለሊክሙ።

²³ እመ ቦ ዘያጸምዖ ለቃል ወኢይገብሮ ይመስል ከመ ብእሲ ዘይሬኢ ፍጥረተ ገጹ በመጽሔት።

²⁴ወጠይቆ ርእሶ ኀለፈ ወረስዐ ዘከመ እፎ ውእቱ።

²⁵ ወዘሰ ሐወጸ ውስተ ሕግ ፍጹም ዘያግዕዝ ወተዐገሠ ኢኮነ ራስዐ ዘሰምዐ አላ ገባሬ ሕግ ውእቱ ብፁዕ ዝንቱ በምግባሩ።

²⁶ ወእመ ቦ ዘይመስሎ ከመ ዘይትሔረም ለእግዚአብሔር ወኢያለጕሞ ለልሳኑ ወአስሐቶ ለልቡ ለዘከማሁ ከንቱ ሕርመቱ።

²⁷ወሕርመትሰ ንጽሕት እንተ እምኀበ እግዚአብሔር አብ ዛቲ ይእቲ ከመ ትዕቀቡ ዕጓለ ማውታ ወዕቤራተ በተጽናሶሙ ወትዕቀቡ ርእሰክሙ እምዓለም ዘእንበለ ሕብቋቌ።