Read Ge'ez NT – ሐዲስ ኪዳን በልሳነ ግእዝ መልእክተ ያዕቆብ ሐዋርያ 2 Bible Online

መልእክተ ያዕቆብ ሐዋርያ 2 - Ge'ez NT – ሐዲስ ኪዳን በልሳነ ግእዝ bible

መልእክተ ያዕቆብ ሐዋርያ 2

¹አኀዊነ ኢትኩን ለገጸ ሰብእ ሃይማኖትክሙ እንተ በእግዚአነ ኢየሱስ ክርስቶስ ዘሎቱ ስብሐት።

²ከመ እመ ቦአ ውስተ ማኅበርክሙ ብእሲ ዘሕልቀተ ወርቅ ወዘአልባስ ንጹሕ ወቦአ ነዳይ በአልባስ ርሱሕ።

³ወትኔጽርዎ ለዘይለብስ ንጹሐ ወትብልዎ አንተሰ ንበር ዝየ ውስተ ምሥናይ ወለነዳይሰ ትብልዎ ቁም ከሃከ አንተሰ ወእመ አኮ ንበር ታሕተ መከየደ እገሪነ።

⁴አኮኑ እንከ አድሎክሙ ለሊክሙ ወኮንክሙ መደልዋነ ለኅሊና እኩይ።

⁵ ስምዑ አኀዊነ ፍቁራን አኮኑ እግዚአብሔር ኀረዮሙ ለነዳያነዝ ዓለም ወአብዕልትሰ ከመ በሃይማኖቶሙ ይወርስዋ ለመንግሥት እንተ አሰፈዎሙ ለእለ ያፈቅርዎ።

⁶ወአንትሙሰ አስተሐቀርክምዎሙ ለነዳያን አኮኑ እሙንቱ አብዕልት እለ ይትዔገሉክሙ ወይስሕቡክሙ ውስተ ተስናናት ወአዕዋዳት።

⁷ወእሙንቱ ይጸርፉ ላዕለ ስሙ ዐቢይ ዘተሰምየ ላዕሌክሙ።

⁸ ወእመሰ ትፌጽሙ ሕገ በከመ ይብል መጽሐፍ «አፍቅር ቢጸከ ከመ ነፍስከ» ሠናየ ትገብሩ።

⁹ ወእመሰ ገጸ ትነሥኡ ኀጢአተ ትገብሩ ወይዛለፈክሙ ሕግ ከመ ከሓዲ።

¹⁰ ወዘሰ ይገብሮ ለኵሉ ሕግ ወይስሕት በአሐቲ ኮነ መአብሰ በኵሉ።

¹¹ እስመ ዘይቤ «ኢትሑር ኀበ ብእሲተ ብእሲ ይቤ ኢትቅትል ነፍሰ» ወእመሰ ኢተሐውር ኀበ ብእሲተ ብእሲ ወባሕቱ ትቀትል ነፍሰ ኮንከ ውፁአ እምሕግ።

¹² ከመዝ ንግሩ ወከመዝ ግበሩ ከመ ዘበሕገ ግዕዛን ሀለወክሙ ትትኰነኑ።

¹³ እስመ በደይንሰ አልቦ ምሒር ለዘኢገብረ ምሕረተ ወይትሜካሕ ባሕቱ በዕለተ ደይን ዘገብረ ምሕረተ።

¹⁴ ምንት ይበቍዕ አኀዊነ ለእመ ቦ ዘይብል ሃይማኖት ብየ ወምግባረ ሠናይ አልብየ ቦኑ ትክል ሃይማኖቱ አድኅኖቶ።

¹⁵ ለእመ ቦ እምአኀዊነ አው እምአኃቲነ እለ ዕሩቃን እሙንቱ አው ኅጡኣን ለሲሳየ ዕለቶሙ።

¹⁶ወቦ ዘይቤሎሙ እምኔክሙ ሑሩ በሰላም ሰሐኑ፥ ወትጸግቡ ወኢወሀቦሙ ዘይፈቅዱ ለተጽናሶሙ ምንተ ይበቍዖሙ።

¹⁷ከማሁ ሃይማኖትኒ እንተ አልባቲ ምግባረ ሠናይ ምውት ይእቲ ለሊሃ።

¹⁸ እመቦ ዘይቤለከ አንተ ሃይማኖት ብከ ወአነ ምግባረ ሠናይ ብየ አርእየኒኬ ሃይማኖተከ ዘእንበለ ምግባሪከ ወአንሰ አርእየከ እምነ ምግባርየ ሃይማኖትየ።

¹⁹ አንተሰ ተአምን ከመ አሐዱ ውእቱ እግዚአብሔር ሠናየ ትገብር ከማሁሰ አጋንንትኒ የአምኑ ወይደነግፁ።

²⁰ትፈቅድኑ ታእምር ኦ! ብእሲ አብድ ከመ ሃይማኖት ዘእንበለ ምግባር ምውት ይእቲ።

²¹ አኮኑ አብርሃም አቡነ በምግባሩ ጸድቀ ሶበ አዕረጎ ለይስሐቅ ወልዱ ውስተ ምሥዋዕ።

²²ትሬኢኑ ከመ ሃይማኖት ትረድኦ ለገቢር ወበምግባሩ መልአት ወፍጽምተ ኮነት ሃይማኖቱ።

²³ ወተፈጸመ ዘይብል መጽሐፍ «አምነ አብርሃም በእግዚአብሔር ወተኈለቆ ጽድቀ ወፍቁረ እግዚአብሔር ተሰምየ።»

²⁴ትሬኢኑ ከመ በምግባሩ ይጸድቅ ሰብእ ወአኮ በሃይማኖቱ ባሕቲታ።

²⁵ ወከማሁ ረአብኒ ዘማ በምግባሪሃ ጸድቀት ሶበ ተቀበለቶሙ ለሰብአ ዐይን ወእንተ ካልእት ፍኖት አውፅአቶሙ።

²⁶በከመ ሥጋ ዘአልቦ መንፈስ ምዉት ውእቱ ከማሁ ሃይማኖትኒ እንተ አልባቲ ምግባረ ሠናይ ምውት ይእቲ።