Read Ge'ez NT – ሐዲስ ኪዳን በልሳነ ግእዝ መልእክተ ያዕቆብ ሐዋርያ 3 Bible Online

መልእክተ ያዕቆብ ሐዋርያ 3 - Ge'ez NT – ሐዲስ ኪዳን በልሳነ ግእዝ bible

መልእክተ ያዕቆብ ሐዋርያ 3

¹ወኢይኩኑ እምውስቴትክሙ ብዙኃን መምህራን አኀዊነ ተአምሩ ከመ እንተ ተዐቢ ደይነ ንነሥእ።

²እስመ ብዙኀ ንስሕት ኵልነ ወዘሰ ኢይስሕት በቃሉ ፍጹም ውእቱ ወይክል ወድየ ልጓም ለኵሉ ሥጋሁ።

³ ወናሁ ለአፍራስኒ ንወዲ ሎቶን ልጓመ ውስተ አፉሆን ከመ ኦሆ ይበላነ ወንመይጦን ኵሎ ሥጋሆን።

⁴ወናሁ ለአሕማርኒ ዘመጠነዝ አካሎን በኀይለ ነፋስ ሶበ ይትነድኣ ወይትመየጣ ይመይጦን ብእሲ በሐዳፍ እንዘ መጠነዝ ናእሱ ወያበውኦን ውስተ መርሶ ኀበ ፈቀደ።

⁵ከማሁ ልሳንኒ ንስቲት አባል ይእቲ ወታመጽእ ዐቢያተ ወናሁ እሳትኒ ንስቲት ጥቀ ዘመጠነዝ ዖመ ታውዒ።

⁶ ወልሳንኒ እሳት ይእቲ ለዓለም ዘዐመፃ ወናሁ ልሳንኒ ንስቲት ተፈጥረት ውስተ ነፍስትነ ወታረምፆ ለሥጋነ ወትሎሉ ክቡተ ፍጥረተነ ወታውዒ ጥቀ እምገሃነም።

⁷እስመ ኵሉ ፍጥረተ አራዊትኒ ወአዕዋፍኒ ወዘይትሐወስኒ ውስተ ባሕር ወእንስሳኒ ይገርር ለፍጥረተ ዕጓለ እመሕያው።

⁸ ወለልሳነ ዕጓለ እመሕያውሰ አልቦ ዘይክል አግርሮታ እኪት ይእቲ ወአልባ ዐቅም ወምልእት ይእቲ ሕምዘ ዘይቀትል።

⁹ ባቲ ንባርኮ ለእግዚአብሔር አብ ወባቲ ንረግሞ ለዕጓለ እመሕያው ዘበአርኣያ እግዚአብሔር ተፈጥረ።

¹⁰እምአሐዱ አፍ ይፃእ ቡራኬ ወመርገም ኢይረትዕ ከመዝ አኀዊነ ይኩን።

¹¹ይትከሀልኑ ይፃእ እምአሐዱ ዐይን ወእምውስተ አሐቲ ዐዘቅት ይነቅዕኑ ማይ መሪር ወማይ ጥዑም።

¹²ይክልኑ አኀዊነ በለስ ዘይተ ፈርየ ወእመ አኮ ወይን በለሰ ፈርየ ከማሁኬ ማይኒ መሪር ኢይከውን ጥዑመ ወማይኒ ጥዑም ኢይከውን መሪረ።

¹³ ወመኑ ጠቢብ እምኔክሙ ወምኩር ከመ ያርኢ ምግባሮ በየውሀት ወበጥበብ እምሥነ ግዕዙ።

¹⁴ ወእመሰ ተቃንኦ መሪር ወካሕድ ብክሙ ውስተ ልብክሙ ኢትትመክሑ ወኢተሐስውዋ ለጽድቅ።

¹⁵ ኢኮነት ዛቲ ጥበብ እንተ እምላዕሉ ትወርድ አላ እምድር እንተ እምነፍሰ አጋንንት።

¹⁶እስመ ኀበ ሀለወ ተቃንኦ ህየ ሀለወ ሀውክ ወካሕድ ወኵሉ እከየ ምግባር።

¹⁷ወእንተሰ እምላዕሉ ጥበብ ቀዳሚሃ ንጽሕት ይእቲ እንተ ታስተሰናኡ ወእንተ በዐቅም ኦሆ በሃሊት ወምልእት ምሕረተ ወፍሬሃ ሠናይ ዘእንበለ ኑፋቄ አማኒት።

¹⁸ ወፍሬሃኒ ዘጽድቅ በሰላም ይዘራዕ ለእለ ይገብርዋ ለሰላም።