Read Ge'ez NT – ሐዲስ ኪዳን በልሳነ ግእዝ መልእክተ ያዕቆብ ሐዋርያ 5 Bible Online

መልእክተ ያዕቆብ ሐዋርያ 5 - Ge'ez NT – ሐዲስ ኪዳን በልሳነ ግእዝ bible

መልእክተ ያዕቆብ ሐዋርያ 5

¹ ንዑ ይእዜኒ አብዕልት ወብክዩ እንዘ ትግዕሩ ላዕለ ሕርትምናክሙ እንተ ሀለዋ ትምጻእክሙ።

² ብዕልክሙኒ ነቅዘ ወአልባሲክሙኒ ቈንቈነ።

³ወርቅክሙኒ፥ ወብሩርክሙኒ ዝሕለ ወዛሕሉኒ ስምዐ ይከውን ላዕሌክሙ ወይበልዖ ለሥጋክሙ ከመ እሳት በእንተ ዘገበርክሙ ለደኃሪ መዋዕል።

⁴ ናሁ ዐስቦሙ ለገባር ለእለ ሐረስዋ ለምድርክሙ ሄድክምዎሙ ወዐመፅክምዎሙ ዐስቦሙ ወእለኒ ሄድክምዎሙ የዐወይዉ ወገዐሮሙኒ ለዐጸድ ቦአ ውስተ እዘኒሁ ለእግዚአብሔር ጸባኦት ወበጽሐ።

⁵ ወፈጋዕክሙ ላዕለ ምድር ወአስተትክሙ ወተደለውክሙ ወአስባሕክሙ ልበክሙ ከመ ዘያሰብሕ ላሕመ ለዕለተ ጥብሐት።

⁶ወተዐደውክሙ ወቀተልክምዎ ለጻድቅ ዘእንበለ ይትቃወመክሙ ወኦሆ ይብለክሙ።

⁷ ተዐገሡ እንከ አኀዊነ እስከ ደኃሪት ዕለት አመ ይመጽእ እግዚእክሙ ከመ ሐረሳዊ ዘይጸንሕ ፍሬሃ ለምድር ክብርት እንዘ ይትዔገሣ ሠርከ ወነግሀ እስከ ትሰዊ ወትፈሪ ሎቱ ወትትዐጸድ።

⁸ተዐገሡኬ አንትሙ ወአጽንዑ ልበክሙ እስመ ቀርበ ምጽአቱ ለእግዚእክሙ።

⁹ ወኢትግዐሩ አኀዊነ ላዕለ ቢጽክሙ ከመ ኢትትኰነኑ እስመ ናሁ መኰንን ኀበ መድረከ ኆኅትክሙ ይቀውም ወይጸንሕ።

¹⁰ አርኣያሃሰ አኀዊነ ለትዕግሥተ ተጽናስክሙ ብክሙ ነቢያት እለ ተናገሩ በቃሉ ለእግዚአብሔር።

¹¹ ናሁ ናስተበፅዖሙ ለእለ ተዐገሡ ወሰማዕክሙ ትዕግሥቶ ለኢዮብ ወርኢክሙ ዘከመ ፈጸመ ሎቱ እግዚአብሔር እስመ ብዙኅ ምሕረቱ ለእግዚአብሔር ወመስተሣህል ውእቱ።

¹² ወእምኵሉሰ ዘይቀድም አኀዊነ ኢትምሐሉ ኢበሰማይ ወኢበምድር ወኢበካልእ መሐላ ኢትምሐሉ ግሙራ ወኢበምንትኒ አላ አሐደ ይኩን ቃልክሙ እመኒ እወ እወ ወእመኒ አልቦ አልቦ ከመ ኢትትኰነኑ ወኢትባኡ ውስተ ደይን።

¹³ እመ ቦ ዘይቴክዝ ለይጸሊ ወእመቦ ዘተፈሥሐ ለይዘምር።

¹⁴ ወእመቦ ዘይደዊ እምኔክሙ ለይጸውዕ ቀሳውስተ እለ ውስተ ቤተ ክርስቲያን ወይጸልዩ ላዕሌሁ ወይቅብዕዎ ቅብዐ ጸሎት በስሙ ለእግዚእነ ኢየሱስ ክርስቶስ።

¹⁵ ወጸሎተ ሃይማኖት ያሐይዎ ለድውይ ወያነሥኦ እግዚአብሔር ወእመኒ ቦቱ ኀጢአት ይትኀደግ ሎቱ።

¹⁶ ተአመኑ በበይናቲክሙ ኀጢአተክሙ ወጸልዩ ላዕለ ቢጽክሙ ከመ ትሕየዉ ብዙኀ ትረድእ ጸሎቱ ለጻድቅ ትክል ወታሰልጥ።

¹⁷ ኤልያስ ዘከማነ ሰብእ ውእቱ ወዘከመ ነሐምም የሐምም ወጸሎተ ጸለየ ከመ ኢይዝንም ዝናም ወኢዘንመ ውስተ ምድር ሠለስተ ዓመተ ወስድስተ አውራኀ።

¹⁸ ወካዕበ ጸለየ ከመ ይዝንም ወወሀበ ሰማይ ዝናሞ ወምድርኒ አብቈለት ፍሬሃ።

¹⁹ አኀዊነ እመ ቦ ዘስሕተ እምኔክሙ እምጽድቅ ወእመቦ ዘሜጦ እምነ ጌጋዩ።

²⁰ለያእምር ከመ አድኀነ ርእሶ እምነ ሞት ወከደኖን ለብዙኃት ኀጣውኢሁ። ተፈጸመት መልእክተ ያዕቆብ ሐዋርያ እኁሁ ለእግዚእነ ኢየሱስ ክርስቶስ። ወስብሐት ለእግዚአብሔር አሜን።