Read Ge'ez NT – ሐዲስ ኪዳን በልሳነ ግእዝ መልእክተ ጴጥሮስ 1 2 Bible Online

መልእክተ ጴጥሮስ 1 2 - Ge'ez NT – ሐዲስ ኪዳን በልሳነ ግእዝ bible

መልእክተ ጴጥሮስ 1 2

¹ አሰስልዋ እንከ እምኔክሙ ለኵላ እከይ ወለኵላ ሕብል ወለናፍቆ ወለተሓምዮ ወለተቃንኦ።

² ወኩኑ ከመ እለ ይእዜ ተወልዱ ሕፃናት ወአፍቅሩ ሐሊበ ነባቤ ዘአልቦቱ ቱስሕት ከመ ቦቱ ትልሀቁ ለድኂን።

³ ወናሁ ጥዕምክሙ ከመ ኄር እግዚአብሔር ወኀቤሁ ምግባኢክሙ።

⁴ ወይእቲ እብን እንተ በኀበ ሰብእ ምንንት ወበኀበ እግዚአብሔርሰ ኅሪት ወክብርት።

⁵ ወአንትሙኒ ጽንዑ ከመ እብን መንፈሳዊ ወኩኑ ታቦተ መንፈሳዌ ለክህነት ቅድስት ወንጽሕት ከመ ታቅርቡ ወታዕርጉ መሥዋዕተ መንፈሳዌ ዘይሰጠወክሙ እግዚአብሔር በእደዊሁ ለኢየሱስ ክርስቶስ።

⁶ እስመ ከመዝ ጽሑፍ «ናሁ እሠይም ውስተ ጽዮን እብነ ማዕዘንት ኅሪተ ወክብርተ ወዘአምነ ባቲ ኢይትኀፈር።»

⁷ ለክሙ ውእቱ ክብር ለእለ ተአምኑ ወለእለሰ ይክሕዱ «እብን እንተ መነንዋ ነደቅት ይእቲ ኮነት ውስተ ርእሰ ማዕዘንት።»

⁸ ውእቱኬ እብነ ዕቅፍት ወእብነ ካሕድ ለእለ ይትዐቀፉ በቃሉ ወይክሕድዎ ለዘቦቱ ተፈጥሩ።

⁹ ወአንትሙሰ ፍጥረት ኅሩያን ወታቦት ለንጉሥ ወሕዝብ ንጹሕ ወሕዝብ ዘይትሜካሕ ከመ ትንግሩ ሠናይቶ ለዘጸውዐክሙ እምጽልመት ውስተ ብርሃነ ስብሐቲሁ።

¹⁰ እንዘ ቀዲሙ ኢኮንክሙ ሕዝቦ ይእዜሰ ሕዝበ እግዚአብሔር አንትሙ እንዘ ቀዲሙ ኢኮንክሙ ምሁራነ ይእዜሰ መሀረክሙ።

¹¹ ኦ አኀውየ ፍቁራን እስእለክሙ ብቍዑኒ ከመ ፈላሲ ወከመ ነግድ ወከመ ድኩም ታርሕቅዋ ለፍትወተ ሥጋክሙ እንተ ትጸብኣ ለነፍስክሙ።

¹² ወግዕዝክሙኒ በማእከለ አሕዛብ ሠናየ ለይኩን ከመ ኢይርከቡ በዘየሐምዩክሙ ከመ ገባሬ እኪት ወሠናየ ምግባሪክሙ ይርአዩ ወይሰብሕዎ ለእግዚአብሔር ከመ ይትመየጦሙ።

¹³ አትሕቱ ርእሰክሙ ለኵሉ ፍጥረተ ዕጓለ እመሕያው በእንተ እግዚአብሔር ወለንጉሥኒ እስመ ኵሉ ሎቱ።

¹⁴ወለመኳንንትኒ እስመ ውእቱ ይፌንዎሙ ከመ ይኰንንዎሙ ለእለ ይገብርዋ ለእኪት ወያእኵትዎሙ ለእለ ይገብርዋ ለሠናይት።

¹⁵ እስመ ከመዝ ውእቱ ፈቃዱ ለእግዚአብሔር ከመ በሠናይ ምግባሪክሙ ትእስሩ አፉሆሙ ለአብዳን ሰብእ እለ ኢየአምርዎ ለእግዚአብሔር።

¹⁶ወኩኑ ከመ አግዓዝያን ወአኮ ከመ እለ ቦሙ ጌጋይ ዘእኩይ ወአንትሙሰ ከመ አግብርተ እግዚአብሔር።

¹⁷ ኵሎ አክብሩ ወቢጸክሙኒ አፍቅሩ ወለእግዚአብሔርኒ ፍርህዎ ወለንጉሥኒ አክብርዎ።

¹⁸ ወአንትሙኒ ነባሪ ተኰነኑ ለአጋእዝቲክሙ እንዘ ትፈርሁ ወአኮ ዳእሙ ለኄራን ወለመሓርያን አላ ለእኩያንኒ።

¹⁹እስመ ጸጋ እግዚአብሔር ትትወሀብ ለዘበእንተ ሠናይ ምግባሩ ይትዔገሣ ለኀዘን እንዘ የሐምም በግፍዕ።

²⁰ ወምንትኑመ ይእቲ አኰቴትክሙ እመ እንዘ ትኤብሱ ትትዔገሡ መቅሠፍተክሙ አላ እንዘ ሠናየ ትገብሩ እመ ተዐገሥክሙ ግፍዐክሙ ዛቲ ይእቲ አኰቴትክሙ በኀበ እግዚአብሔር።

²¹ እስመ በእንተ ዝንቱ ተጸዋዕክሙ እስመ ክርስቶስኒ በእንቲኣክሙ ሐመ ይኅድግ ለክሙ ማዕተቦ ከመ ትትልዉ አሠረ ዚኣሁ።

²² በከመ ውእቱ ኢገብረ ኀጢአተ ወኢተረክበ ሐሰት ውስተ አፉሁ።

²³ እንዘ ይጼእልዎ ኢጸአለ ወእንዘ ያሐምምዎ ኢተቀየመ አላ አግብአ ለዘይኴንን ጽድቀ።

²⁴ ወበእንተ ኀጣውኢነ ውእቱ ተሰቅለ ዲበ ዕፅ በሥጋሁ ከመ ያውፅአነ እምኀጣውኢነ ወበጽድቁ ያሕይወነ እስመ በቍስለ ዚኣሁ ሐየውክሙ ቍስለክሙ እንዘ ከመ አባግዕ ትሳኰዩ።

²⁵ ወይእዜኒ ግብኡ ኀበ ኖላዊክሙ ወዐቃቢሃ ለነፍስክሙ።