Read Ge'ez NT – ሐዲስ ኪዳን በልሳነ ግእዝ መልእክተ ጴጥሮስ 1 3 Bible Online

መልእክተ ጴጥሮስ 1 3 - Ge'ez NT – ሐዲስ ኪዳን በልሳነ ግእዝ bible

መልእክተ ጴጥሮስ 1 3

¹ ወከማሁ አንትንሂ አንስት ተኰነና ለአምታቲክን ከመ እመ ቦ ዘኢየአምን በዝንቱ ነገር እምሥነ ምግባሪሆን ለአንስት ይርአዩ ወዘእንበለ ካሕድ ይርብሕዋ ለነፍሶሙ።

²ወእንዘ ትፈርሃ አሠንያ ግዕዘክን በንጽሕ።

³ አኮ ከመ ታድልዋ ለዐይነ ሰብእ በተጸፍሮ ሥዕርትክን ወአኮ በተሰርግዎ ወርቅ ወብሩር ወአኮ በተላብሶ አልባስ ዘብዙኅ ሤጡ።

⁴አላ በኅቡእ ልቡ ለሰብእ ለዘኢይጠፍእ ወለዘኢይደምፅ መንፈስ ቅዱስ ዘህልው ቅድመ እግዚአብሔር ዘብዙኅ ሐሳቡ።

⁵ወከማሁ ትካትኒ ቅዱሳት አንስት እለ ይትዌከላ ላዕለ እግዚአብሔር ይሰረገዋ ርእሶን በተኰንኖ ለአምታቲሆን።

⁶ ከመ ሣራ እስመ ይእቲ ትትኤዘዞ ለአብርሃም ወእግዚእየ ትብሎ ወአንትንሂ አዋልዲሃ ኩና በምግባረ ሠናይ እንዘ ኢትፈርሃ እምነ ድንጋፄ ወኢምንተኒ።

⁷ ወከማሁ አንትሙሂ ዕደው እንዘ ትነብሩ ምስለ አንስቲያክሙ ኢታስተሐቅሩ አንስቲያክሙ እስመ ይደክም ፍጥረተ ዚኣሆን ለአንስት አክብሩ አንስቲያክሙ እስመ ይወርሳ እማንቱኒ ክብረ ወሕይወተ ምስሌክሙ ከመ ኢትትዐቀፍ ጸሎትክሙ።

⁸ወማኅለቅቱሰ ለኵሉ ከመ ተዐርዩ ልበ በአሐዱ ኅሊና እንዘ ተሐምሙ ሕማመ ቢጽክሙ።

⁹ወእንዘ ኢታዐብዩ ልበክሙ ወእንዘ ኢትፈድይዎ እኪተ ለዘገብረ ለክሙ እኪተ ወእንዘ ኢትጼእልዎ ለዘጸለአክሙ ወለጸላኢክሙኒ ባርክዎ እስመ ለዝንቱ ተጸዋዕክሙ ከመ በረከተ ትረሱ።

¹⁰ ወዘሰ ያፈቅራ ለሕይወት ወይፈቱ ይርአይ መዋዕለ ሠናያተ ያርምም ልሳኖ እምእኪት ወከናፍሪሁኒ ከመ ኢይንብባ ሐሰተ።

¹¹ይትገኀሥ እምእኪት ወይግበራ ለሠናይት ለይኅሥሣ ለሰላም ወይትልዋ።

¹² «እስመ አዕይንቲሁ ለእግዚአብሔር ኀበ ጻድቃኑ ወእዝኑሂ ኀበ ስእለቶሙ ገጹ ለእግዚአብሔር ኀበ እለ ይገበሩ እኪተ።»

¹³ወመኑ ውእቱ ዘእኪተ ይፈቅድ ለክሙ እመ ትቀንኡ ለገቢረ ሠናይ።

¹⁴ ወእመሰ በገቢረ ጽድቅ ተሐምሙ ብፁዓን አንትሙ ወዘሰ ይጌርመክሙ ኢትፍርሁ ወኢትደንግፁ።

¹⁵አላ ለእግዚአብሔር ቀድስዎ በኵሉ ልብክሙ ወድልዋኒክሙ ሀልዉ በኵሉ ጊዜ ከመ ታውሥእዎሙ ቃለ ለእለ ይሴአሉክሙ በእንተ ዛቲ ተስፋክሙ።

¹⁶ወበየውሀትክሙ ወበፍርሀተ እግዚአብሔር አሠነዩ ግዕዘክሙ ከመ እመ ቦ እለ የሐምዩክሙ ከመ ዘእኩይ ምግባሪክሙ ይትኀፈሩ እለ የሐምዩክሙ እምሥነ ምግባሪክሙ ዘበእንተ ክርስቶስ።

¹⁷እስመ ይኄይስ እንዘ ሠናየ ትገብሩ ወትፈቅዱ ፈቃዶ ለእግዚአብሔር ትሕምሙ እምነ እንዘ እኪተ ትገብሩ።

¹⁸ እስመ ክርስቶስኒ ምዕረ ሞተ በእንተ ኀጣውአ ሰብእ ወበእንቲኣነ ሞተ ጻድቅ በእንተ ኀጣውኢነ ከመ ኪያነ ያብጽሐነ ኀበ እግዚአብሔር ሞተ በሥጋ ወሐይወ በመንፈስ።

¹⁹ወሖረ ኀበ እለ ሙቅሕታ ትነብር ነፍሶሙ ወሰበከ ሎሙ ግዕዛነ።

²⁰ ለእለ ክሕድዎ ቀዲሙ ወነበሩ በንስሓሆሙ እንዘ ይጸንሑ ትዕግሥቶ ለእግዚአብሔር ከመ እለ በመዋዕሊሁ ለኖኅ አመ ይገብር ታቦተ ወድኅኑ ባቲ ሰማኒቱ ነፍስ ኅዳጣን እምነ ማየ አይኅ።

²¹ ወኪያነኒ ይእዜ ያድኅነነ በአርኣያሁ በጥምቀት አኮ በኅፅበተ ሥጋ እምርስሐት አላ ከመ ግዕዘ ሠናየ ይምሀረነ በዘነአምን በእግዚአብሔር ወበተንሥኦቱ ለእግዚእነ ኢየሱስ ክርስቶስ።

²²ዘሀለዎ ይነብር በየማነ እግዚአብሔር ዘዐርገ ውስተ ሰማይ ወተኰነኑ ሎቱ መላእክት ወሥልጣናት ወኵሉ ኀይል።