Read Ge'ez NT – ሐዲስ ኪዳን በልሳነ ግእዝ መልእክተ ጴጥሮስ 1 4 Bible Online

መልእክተ ጴጥሮስ 1 4 - Ge'ez NT – ሐዲስ ኪዳን በልሳነ ግእዝ bible

መልእክተ ጴጥሮስ 1 4

¹ወእመሰ ክርስቶስ ተሰቅለ በሥጋሁ በእንቲኣነ ወአንትሙኒ ተወልተዉ በይእቲ ኅሊና እስመ ዘሐመ በሥጋሁ ድኅነ እምኀጣውኡ።

²ከመ ኢይሕየው እንከ በፍትወተ ሥጋ አላ በፈቃዱ ለእግዚአብሔር ይፈጽም ተረፈ ሕይወቱ በሥጋሁ።

³ እስመ የአክለክሙ ዘኀለፈ መዋዕል ዘገበርክሙ ቦቱ ፈቃዶሙ ለአሕዛብ ዝሙተ ወፍትወተ ወስክረተ ወስጥየተ ወስታየ ዘእንበለ ግዕዝ ወአፍቅሮ አማልክት።

⁴ዑቁ እንከ ውስተ ዝንቱ ምግባር ኢትሩጹ ወነኪራነ ኩኑ እምኔሃ ለይእቲ ፍኖት ወእምነ ውእቱ ምግባር ዘአልቦ ዐቅም ወናሁ ሰብእ እምኔሆሙ ያነክሩ በእንቲኣክሙ ወይፀርፉ ላዕሌክሙ ሶበ ይሬእዩክሙ ዘኢትሳተፍዎሙ ውስተ ውእቱ ምግባር ዘትካት።

⁵ እሉኬ እለ ሀለዎሙ ያግብኡ ሐሳበ ለዘሀለወ ድልወ ይኰንኖሙ ለሕያዋን ወለምዉታን።

⁶ ወበእንተ ዝንቱ ዜንውዎሙ ለምዉታን ከመ ይትኰነኑ በሥጋሆሙ በሕገ ዕጓለ እመሕያው ወይሕየዉ በመንፈሶሙ በሕገ እግዚአብሔር።

⁷ እስመ ቀርበ ማኅለቅቱ ለኵሉ አንጽሑ ልበክሙ ወጸሐዉ ለጸሎት።

⁸ወእምኵሉሰ ዘይቀድም ተፋቀሩ በበይናቲክሙ በምልአ ልብክሙ እስመ ተፋቅሮ ይደፍኖን ወይደመስሶን ለኵሎን ኀጣውእ።

⁹ ወአፍቅሩ ነግደ እንዘ ኢታስተዓፅቡ።

¹⁰ ወኵልክሙ በከመ ነሣእክሙ ፍቶ ለእግዚአብሔር በበይናቲክሙ ተለአኩ ከመ ኄር ላእክ እስመ ለለ አሐዱ ዘዘዚኣሁ ዕሴቱ እምኀበ እግዚአብሔር።

¹¹ወእለሂ ትሜህሩ መሀሩ ቃሎ ለእግዚአብሔር ወዘኒ ይትለአክ ለይትለአክ በኀይለ እግዚአብሔር ዘወሀቦ ከመ በኵሉ ይሰባሕ እግዚአብሔር በኢየሱስ ክርስቶስ ዘሎቱ ስብሐት ወኀይል ለዓለመ ዓለም አሜን።

¹² አኀዊነ ኢታንክርዋ ለእንተ ትመጽአክሙ መከራ ከመ ዘነኪር ግብር ዘይከውን ብክሙ ዳእሙ ይእቲ ወዘኢትለምዱሰ ይበጽሐክሙ።[1]

¹³ ዳእሙ ከመ ትሳተፍዎ በሕማሙ ለክርስቶስ ወትትፈሥሑ ከመ አመ ያስተርኢ በስብሐቲሁ ትትሐሠዩ ፍሡሓኒክሙ።

¹⁴ ወእመሰ ቦ ዘተዐየሩክሙ በእንተ ስሙ ለክርስቶስ ብፁዓን አንትሙ እስመ ስብሐቲሁ ወኀይሉ ለእግዚአብሔር ወመንፈሱ የዐርፍ ላዕሌክሙ።

¹⁵አልቦ ዘየሐምም እምውስቴትክሙ አው ከመ ቀታሊ አው ከመ ሰራቂ አው ከመ ዘእኩይ ምግባሩ አው ከመ ዘባዕደ ያፈቅር ወይፈቱ።

¹⁶ ወእመሰ ከመ ክርስቲያናዊ ኢትኅፈሩ አላ ሰብሕዎ ለእግዚአብሔር በዝንቱ ስም።

¹⁷ እስመ በጽሐ ጊዜሁ ለፍዳ ዘያቀድም እምነ ቤቱ ለእግዚአብሔር ወእመሰ ኮነ እምኀቤነ አቅድሞቱ ምንተ እንከ ይከውን ደኃሪቶሙ ለእለ ይክሕድዎ ለወንጌሉ ለእግዚአብሔር።

¹⁸ ወሶበ ጻድቅ እምዕፁብ ይድኅን ኃጥእ ወዐማፂ በአይቴ ያስተርኢ ሀለዎ።

¹⁹ ወእለኒ የሐምሙ በእንተ ፈቃዱ ለእግዚአብሔር ያማሕፅኑ ነፍሶሙ ኀበ ምእመን ፈጣሪ በገቢረ ሠናይ።