Read Ge'ez NT – ሐዲስ ኪዳን በልሳነ ግእዝ መልእክተ ጴጥሮስ 1 5 Bible Online

መልእክተ ጴጥሮስ 1 5 - Ge'ez NT – ሐዲስ ኪዳን በልሳነ ግእዝ bible

መልእክተ ጴጥሮስ 1 5

¹ ወለእለኒ ይትለሀቁ እምኔክሙ አስተበቍዖሙ አነ ልሂቅ ካልኦሙ ወሰማዕት በእንተ ሕማሙ ለክርስቶስ ዘሀለዎ ያስተርኢ በስብሐቲሁ ከመ ትኩኑ ሱታፎ።

² ረዐዩ ዘሀለዉ ኀቤክሙ መርዔቶ ለእግዚአብሔር እንዘ ተዐቅብዎሙ ወኢትቅንይዎሙ በኵርህ አላ በጽድቅ በእንተ እግዚአብሔር እንዘ ኢትትሬብሕዎሙ አላ በምልአ ልብክሙ ወበትፍሥሕት።

³ እንዘ ኢትትኄየሉ ሕዝቦ አላ አርኣያ ኩንዎሙ ለመርዔቱ።

⁴ ከመ አመ ያስተርኢ እግዚአ ኖሎት ትንሥኡ አክሊለ ስብሐት ዘኢይጸመሂ።

⁵ ወከማሁ አንትሙሂ ወራዙት ተኰነኑ ለእለ ይልህቁክሙ ወኵልክሙ ተመሀርዋ ለአትሕቶ ርእስክሙ እስመ እግዚአብሔር ያኀሥሮሙ ለዕቡያን ወያከብሮሙ ለእለ ያቴሕቱ ርእሶሙ።

⁶ አትሕቱ እንከ ርእሰክሙ ታሕተ እዴሁ ለእግዚአብሔር ጽንዕት ከመ ያልዕልክሙ አመ ይሔውጸክሙ።

⁷ ወኵሎ ኅሊናክሙ ግድፉ ላዕሌሁ እስመ ውእቱ ይኄሊ በእንቲኣክሙ።

⁸ ጥበቡ እንከ ወአጥብቡ ልበክሙ እስመ ጸላኢክሙ ጋኔን ይጥሕር ከመ አንበሳ ወየኀሥሥ ዘይውኅጥ።

⁹ አጽንዑ ቀዊመ በሃይማኖትክሙ እንዘ ተአምሩ ከመ ሕማሙ ለዝ ዓለም ትረክቦሙ ለኵሎሙ አኀዊክሙ ወአጽንዕዋ ለተፋቅሮ።

¹⁰ ወእግዚአብሔርሰ ዘበኵሉ ክብር ጸውዐክሙ ውስተ ዘለዓለም ስብሐቲሁ በኢየሱስ ክርስቶስ ወኅዳጠ ሐሚመክሙ ውእቱ ይፌጽም ለክሙ ወያጸንዐክሙ ወያሌብወክሙ።

¹¹ውእቱ ዘሎቱ ስብሐት ወኀይል ለዓለመ ዓለም አሜን።

¹² ምስለ ስልዋኖስ እኁነ ምእመን በከመ ኀለይኩ ኅዳጠ ጸሐፍኩ ለክሙ እንዘ አስተበቍዐክሙ ወእከውን ስምዐ ከመ በአማን ስብሐቲሁ ለእግዚአብሔር ዛቲ እንተ ባቲ ትቀውሙ።

¹³ ትኤምኀክሙ ቤተ ክርስቲያን ኅሪት እንተ ውስተ ባቢሎን ዘግብጽ ወማርቆስ ወልድየ።

¹⁴ተአምኁ በበይናቲክሙ በአምኃ ተፋቅሮ ወተሰናአዉ ኵልክሙ እለ በክርስቶስ ሀሎክሙ ጸጋ ምስለ ኵልክሙ።[2] አሜን። መልአት መልእክተ ጴጥሮስ ቀዳሚት። ወስብሐት ለእግዚአብሔር አሜን።