Read Ge'ez NT – ሐዲስ ኪዳን በልሳነ ግእዝ መልእክተ ጴጥሮስ 2 3 Bible Online

መልእክተ ጴጥሮስ 2 3 - Ge'ez NT – ሐዲስ ኪዳን በልሳነ ግእዝ bible

መልእክተ ጴጥሮስ 2 3

¹ ወዛቲ ይእቲ አኀውየ ዳግሚትየ ዘጸሐፍኩ ለክሙ መጽሐፈ ከመ አንሥእክሙ በዘክሮ ወትዕቀብዋ በልብክሙ ለጽድቅ።

²ወከመ ትዘከሩ ቃለ ነቢያት ቀደምት ቅዱሳን ዘይቤሉ ወትእዛዘ እግዚእነ ወመድኀኒነ ኢየሱስ ክርስቶስ ዘአዘዘ ለነ ለሐዋርያት።

³ ወዘንተኒ ቅድሙ አእምሮ ከመ ሀለዎሙ ይምጽኡ በደኃሪ መዋዕል መስተአብዳን ለአስተአብዶ እለ የሐውሩ በፍትወተ ልቦሙ ወይብሉ አይቴ ውእቱ ቃሉ ዘይቤ ከመ ሀለዎ ይምጻእ።

⁴ ናሁ እመሰ አበዊነ ቀደምት ሞቱ እስመ ኵሉ ግብር ሀለወ በከመ ሀሎ እምፍጥረተ ዓለም።

⁵ ወኢየአምርዎ ለዝንቱ በፈቃዶሙ ከመ ሰማያትኒ ተፈጥራ እምትካት ወምድርኒ እምነ ማይ ወበማይ ጸንዐት በቃለ እግዚአብሔር።

⁶ ወዓለመ ትካትኒ ቦቱ አጥፍአ በማየ አይኅ።

⁷ወይእዜኒ ሰማይ ወምድር በውእቱ ቃል ዝጉባን ለእሳት ወዕቁባን እሙንቱ እስከ ዕለተ ደይን ወድምሳሴ ኃጥኣን ሰብእ።

⁸ ወዘንተ ባሕቱ ኢትርስዑ አኀዊነ እስመ አሐቲ ዕለት በኀበ እግዚአብሔር ከመ ዐሠርቱ ምእት ዓመት ወዐሠርቱ ምእት ዓመት ከመ አሐቲ ዕለት።

⁹ ኢያጐነዲ እግዚአብሔር ቃለ ዘነበበ እስመቦ እለ ይብሉ ከመ ይጐነዲ ወባሕቱ ይትዔገሥ በእንቲኣሆሙ እስመ ኢይፈቅድ መነሂ ያማስን አላ ይነስሑ ለኵሉ ሰብእ ያርሕብ።

¹⁰ ወዕለቱሰ ለእግዚአብሔር ግብተ ትመጽእ ከመ ሰራቂ እንተ ባቲ ሰማያትኒ ይትረኀዋ ወይሴስላ ወኵሉ ፍጥረት ዘቀዲሙ በውዕየተ እሳት ይትመሰው ወምድርኒ ወኵሉ ዘላዕሌሃ ግብር ይውዒ።

¹¹ወዝንቱ ኵሉ ተመሲዎ ጐጕኡ ከመ ተሀልዉ በምግባር ቅዱስ ዘጽድቅ።

¹²እንዘ ትሴፈዉ ዕለተ ምጽአቱ ለእግዚአብሔር እንተ ባቲ ሰማያትኒ ይረስና ወይትመሰዋ ወኵሉ ፍጥረት ይውዒ ወይትመሰው።

¹³ ሐዳሳተ ሰማያተ ወሐዳሰ ምድረ ንሴፎ ዘውስቴቶን የኀድር ጽድቅ።

¹⁴ወይእዜኒ አኀውየ ዘንተ እንዘ ትሴፈዉ ጐጕኡ ይርከብክሙ ዘእንበለ ርስሐት ወዘእንበለ ጌጋይ እንዘ ትሰናአዉ።

¹⁵ ወትዕግሥቱሰ ለእግዚእነ የሀብክሙ መድኀኒተ በከመ እኁነ ጳውሎስ ዘናፈቅር ጸሐፈ ለክሙ በእንተ ዘወሀቦ እግዚአብሔር ጥበበ።

¹⁶ዘከመ ሀሎ ውስተ ኵሉ መጻሕፍቲሁ ዘነበበ ውስቴቶን በእንቲኣሁ ለዝንቱ ወዘሰ ነበቡ እሙራን ሰብእ እለ ይሌብውዎ ወእለሰ አልቦሙ ትምህርት እለ ኢለበዉ ይመይጥዎ ለቃለ መጽሐፍ ከመ ሜጥዎን ለብዙኃት መጻሕፍት ለግዕዞሙ ወያማስኑ።

¹⁷ ወአንትሙሰ አኀዊነ አቅድሙ አእምሮ ወተዐቀቡ ከመ ኢትስሐቱ በዘኢይበቍዕ ትምህርት ከመ ኢትደቁ እምነ ምጽናዕክሙ።

¹⁸ተባዝኁ በእግዚእነ ወበአኰቴቱ ለኢየሱስ ክርስቶስ መድኃኒነ ወእግዚአብሔር አብ ዘሎቱ ስብሐት ይእዜኒ ወዘልፈኒ ወለዓለመ ዓለም አሜን። መልአት መልእክተ ጴጥሮስ ዳግሚት። ወስብሐት ለእግዚአብሔር አሜን።