Read Ge'ez NT – ሐዲስ ኪዳን በልሳነ ግእዝ መልእክተ ዮሐንስ ሐዋርያ 1 4 Bible Online

መልእክተ ዮሐንስ ሐዋርያ 1 4 - Ge'ez NT – ሐዲስ ኪዳን በልሳነ ግእዝ bible

መልእክተ ዮሐንስ ሐዋርያ 1 4

¹አኀዊነ ለኵላ መንፈስ ኢትእመንዋ አላ አመክርዋ ለመንፈስ ለእመ እምኀበ እግዚአብሔር ይእቲ እስመ ብዙኃን ሐሳውያን ነቢያት መጽኡ ውስተ ዓለም እለ ኢየአምርዎ ለኢየሱስ ክርስቶስ።

² ወበዝንቱ ተአምርዋ ለመንፈሰ እግዚአብሔር ወለመፈሰ ሐሰት ኵላ መንፈስ እንተ ተአምን ከመ ኢየሱስ ክርስቶስ መጽአ በሥጋ ሰብእ እምነ እግዚአብሔር ይእቲ።

³ወኵላ መንፈስ እንተ ኢተአምን በኢየሱስ ክርስቶስ ከመ መጽአ በሥጋ ሰብእ ኢኮነት እምነ እግዚአብሔር ወዝንቱ ውእቱ ሐሳዌ መሲሕ ዘሰማዕክሙ ከመ ይመጽእ ወይእዜኒ ወድአ መጽአ ወውስተ ዓለም ሀሎ።

⁴ ወአንትሙሰ እምነ እግዚአብሔር አንትሙ ደቂቅየ ወሞእክምዎ ለእኩይ እስመ የዐቢ ዘሀሎ ምስሌክሙ እምነ ዘውስተ ዓለም ሀሎ።

⁵ ወእሙንቱሰ እምነ ዓለም እሙንቱ ወበእንተ ዝንቱ እምነ ዓለም ይነብቡ ወዓለምኒ ይሰምዖሙ።

⁶ ወንሕነሰ እምነ እግዚአብሔር ንሕነ ወዘየአምሮ ለእግዚአብሔር ይሰምዐነ ወዘኢኮነ እምእግዚአብሔር ኢይሰምዐነ ወበዝንቱ ነአምራ ለመንፈሰ ጽድቅ ወለመንፈሰ ሐሰት።

⁷አኀዊነ ለንትፋቀር በበይናቲነ እስመ ተፋቅሮ እምነ እግዚአብሔር ውእቱ ወኵሉ ዘይትፋቀር እምነ እግዚአብሔር ውእቱ ተወልደ ወየአምሮ ለእግዚአብሔር።

⁸ወዘሰ ኢያፈቅር ቢጾ ኢየአምሮ ለእግዚአብሔር እስመ እግዚአብሔር ፍቅር ውእቱ።

⁹ ወበዝንቱ ተዐውቀ ፍቅሩ ለእግዚአብሔር ላዕሌነ እስመ ለወልዱ ዋሕድ ፈነዎ ውስተ ዓለም ከመ ንሕዮ በእንቲኣሁ።

¹⁰ ወዝንቱ ውእቱ ፍቅሩ ለእግዚአብሔር ወአኮ ንሕነ ዘአፍቀርናሁ አላ ውእቱ አፍቀረነ ወፈነዎ ለወልዱ ይኅድግ ለነ ኀጣውኢነ።

¹¹ አኀዊነ እመሰ ከመዝ አፍቀረነ እግዚአብሔር ንሕነኒ ይደልወነ ንትፋቀር በበይናቲነ።

¹² ለእግዚአብሔርሰ አልቦ ዘርእዮ ግሙራ ወእመሰ ተፋቀርነ በበይናቲነ እግዚአብሔር ይነብር ምስሌነ ወፍቅሩሂ ፍጹም ሀሎ ምስሌነ።

¹³ወበዝንቱ ነአምር ከመ ምስሌሁ ንነብር ወውእቱኒ ምስሌነ እምነ መንፈሱ ቅዱስ ዘወሀበነ።

¹⁴ወንሕነኒ ርኢነ ወሰማዕነ፥ ከመ አብ ፈነወ ወልዶ መድኅነ ዓለም።

¹⁵ ወኵሉ ዘየአምን ከመ ኢየሱስ ውእቱ ወልደ እግዚአብሔር እግዚአብሔር ይነብር ምስሌሁ ወውእቱኒ ምስለ እግዚአብሔር።

¹⁶ወንሕነሰ አእመርነ ወአመነ እንተ ቦ ፍቅረ እግዚአብሔር ምስሌነ እግዚአብሔርሰ ፍቅር ውእቱ ወዘኒ ነበረ በተፋቅሮ ምስለ እግዚአብሔር ይነብር ወእግዚአብሔርኒ ምስሌሁ።

¹⁷ ወበዝንቱ ትትፌጸም ፍቅሩ ለእግዚአብሔር ምስሌነ ከመ ንርከብ ገጸ በዕለተ ደይን በኀቤሁ እስመ በከመ ኮነ ውእቱ ኮነ ንሕነኒ ውስተ ዝንቱ ዓለም።

¹⁸ወአልቦ ፍርሀት ውስተ ተፋቅሮትነ አላ ተፋቅሮሰ ፍጽምት አፍኣ ታወፅኣ ለፍርሀት እስመ ፍርሀትሰ መቅሠፍት ባቲ ወዘሰ ይፈርህ ኢኮነ ፍጹመ በተፋቅሮ።

¹⁹ወንሕነኒ ንትፋቀር በበይናቲነ ወናፍቅሮ ለእግዚአብሔር እስመ ውእቱ ቀደመ አፍቅሮተነ።

²⁰ ወእመሰ ቦ ዘይብል አፈቅሮ ለእግዚአብሔር ወይጸልእ ቢጾ ሐሳዊ ውእቱ እስመ ዘያፈቅሮ ለቢጹ ዘይሬኢ ለእግዚአብሔርኒ ያፈቅሮ ዘኢይሬኢ ወዘሰ ኢያፈቅር ቢጾ ዘይሬኢ እፎ እንከ ይክል አፍቅሮቶ ለእግዚአብሔር ዘኢይሬኢ።

²¹ ወዝንቱ ትእዛዝ እንተ ብነ እምኔሁ ከመ ናፍቅሮ ለእግዚአብሔር ወናፍቅር ቢጸነ ወኵሉ ዘያፈቅሮ ለእግዚአብሔር ያፈቅር ቢጾ።