Read Ge'ez NT – ሐዲስ ኪዳን በልሳነ ግእዝ መልእክተ ይሁዳ 1 Bible Online

መልእክተ ይሁዳ 1 - Ge'ez NT – ሐዲስ ኪዳን በልሳነ ግእዝ bible

መልእክተ ይሁዳ 1

¹ እምይሁዳ ገብረ እግዚአብሔር ወኢየሱስ ክርስቶስ እኁሁ ለያዕቆብ ለእለ ያፈቅርዎ ለእግዚአብሔር አብ ስሙያን ወጽዉዓን በኢየሱስ ክርስቶስ።

²ሰላም ለክሙ ወተፋቅሮ ወሣህል ይብዛኅ ማእከሌክሙ።

³ አኀዊነ በኵሉ አስተፋጠንኩ ከመ እጽሐፍ ለክሙ በእንተ ሕይወተ ኵልነ እስመ ጥቀ እጽሕፍ ለክሙ ጽሑቀ ወአስተበቍዐክሙ ከመ ትትቀነይዋ ለእንተ ተውህበት ለቅዱሳን ሃይማኖት።

⁴ እስመ ተደመሩ ብክሙ ሰብእ ረሲዓን እለ ጽሑፋን ቀዲሙ ለዝንቱ ደይን ወእሉ እለ ኢይፈርህዎ ለእግዚአብሔር ወእለ ያፈልስዋ ለጸጋ እግዚአብሔር ውስተ ዝሙቶሙ ወይክሕድዎ ለዘውእቱ ባሕቲቱ ንጉሥ እግዚእነ ኢየሱስ ክርስቶስ።

⁵ ወፈቀድኩሰ አዘከርክሙ ኵሎ ወተአምሩ ምዕረሰ ከመ ኢየሱስ አድኀነ ሕዝቦ እምድረ ግብፅ ወበዳግምሰ ለእለ ኢአምኑ አጥፍኦሙ።

⁶ ወለመላእክቲሁኒ እለ ኢዐቀቡ ፍጥረቶሙ ወኀደግዋ ለሥርዐቶሙ ውስተ ደይን አንበሮሙ ወተዐሠሩ ለዕለት ዐባይ በዘለሊሆሙ አቅነዩ ርእሶሙ።

⁷ ወከማሁ ሰዶምኒ ወገሞራ ወአህጉርኒ እለ ምስሌሆን ወበአርኣያሆን ዘመዋ ወተለዋሆን በፍትወተ ዝሙቶን ሤሞሙ ውስተ ደይን ዘእሳት ዘለዓለም ወተመጠዋ ኵነኔሆን።

⁸ወከማሁ እሉኒ እለ በሕልሞሙ ያጌምኑ ሥጋሆሙ ወይክሕድዎ ለእግዚኦሙ ወይፀርፉ ላዕለ ስብሐቲሁ።

⁹ ወሚካኤልኒ ሊቀ መላእክት አመ ይትበሀሎ ለሰይጣን በእንተ ሥጋሁ ለሙሴ ኢተኀበለ ቃለ ፅርፈት ይንብብ አላ ይቤሎ ይሒስከ እግዚአብሔር።

¹⁰ ወእሉሰ እለ ይፀርፉ እሙንቱ ይኤብሱ በዘኢየአምሩ ወኅሊናተሰ ዘሥጋ የአምሩ ከመ እንስሳ ወባቲ ይሤረዉ።

¹¹ አሌ ሎሙ እስመ በፍኖተ ቃየን ሖሩ ወበዐስበ ጌጋዩ ለበለዓም ውዕዩ ወበካሕዱ ለቆሬ ወእለ ምስሌሁ ተኀጕሉ።

¹²እሉ እሙንቱ እለ በፍቅር አፍቀሩክሙ ከመ ያስሕቱክሙ ተባዕያን ለኀጢአቶሙ ወየሐውሩ በፍትወተ ልቦሙ ወዘእንበለ ፍርሀት ይሬእዩ ርእሶሙ ወከመ ደመና እሙንቱ እንተ አልባቲ ዝናም እንተ ትትሀወክ እምነፋስ ወከመ ዕፀዋትኒ ይቡሳት እለ አልቦን ፍሬ እለ ካዕበ ሞታ ወተሠረዋ።

¹³ ወከመ ሞገዳተ ባሕር እሙንቱ እቡዳት እለ ያፈልሕዋ ለኀሣሮሙ ወከመ ከዋክብት ጽልሙታን እለ ለፍጻሜ ጽልመቶሙ ደይን ይጸንሖሙ ለዓለመ ዓለም።

¹⁴ በከመ ተነበየ ሄኖክ በእንቲኣሆሙ ዘውእቱ ሳብዕ እምአዳም ወይቤ «ናሁ ይመጽእ እግዚአብሔር በአእላፊሁ ቅዱሳን መላእክት ከመ ይግበር ኵነኔ።»

¹⁵ ወይፈድዮ ለኵሉ በከመ ምግባሩ ወይዛለፎሙ ለኵሎሙ ኃጥኣን በእንተ ኵሉ ግብረ ኀጣውኢሆሙ ዘአበሱ ወበእንተ ኵሉ ዘነበቡ ላዕሌሁ ዘኢይከውን ቃለ ኃጥኣን ወጽልሕዋን።

¹⁶እሉ እሙንቱ እለ ያንጐረጕሩ እስመ ቅቡጻን ተስፋሆሙ እለ የሐውሩ በፍትወተ ልቦሙ ወአፉሆሙኒ ይነብብ ትዕቢተ ወያስተብዕሉ ወያደልዉ ለገጽ ወዝ ኵሉ ዘይገብሩ ከመ ይርብሖሙ።

¹⁷ወአንትሙሰ አኀዊነ ተዘከሩ ቃለ ዘነገሩክሙ ቀዲሙ ሐዋርያቲሁ ለእግዚእነ ኢየሱስ ክርስቶስ።

¹⁸ ወዘይቤሉክሙ ከመ በደኃሪ መዋዕል ይመጽኡ መስሕታን እለ ይሜህሩ በፍትወተ ልቦሙ ወያስሕቱ በኀጣውኢሆሙ።

¹⁹ እሉ እሙንቱ እለ ይስሕቡ በጌጋዮሙ ወያስሕቱ በፍትወተ ነፍሶሙ ወመንፈስ ቅዱስ አልቦሙ።

²⁰ ወአንትሙሰ አኀዊነ ሕንጹ ርእሰክሙ በሃይማኖት ቅድስት ወበመንፈስ ቅዱስ ጸልዩ።

²¹ወበፍቅሩ ለእግዚአብሔር ተዐቀቡ ወተሰፈውዋ ለምሕረቱ ለእግዚእነ ኢየሱስ ክርስቶስ እንተ ሕይወት ዘለዓለመ ዓለም።

²²እስመ ቦ ለዘትዘልፍዎ በእንተ ኀጢአቱ ወቦ ለዘትምሕርዎ።

²³ ወቦ ለዘታድኅንዎ እምውስተ እሳት ወትባልሕዎ ወቦ ዘይድኅን ፈሪሆ ወነሲሖ ወቦ እለ ጸሊኦሙ ዘቀዲሙ ጌጋዮሙ ኀደጉ ዐራዘ ጥልቀተ ዝሙቶሙ።

²⁴ ወይክል እግዚአብሔር መድኀኒነ ዐቂቦተክሙ ዘእንበለ ጌጋይ ወአቅሞተክሙ ቅድመ ስብሐቲሁ ንጹሓኒክሙ በትፍሥሕት።

²⁵ በእደዊሁ ለእግዚእነ ወመድኀኒነ ኢየሱስ ክርስቶስ ዘሎቱ ስብሐት ወዕበይ ወኀይል ወሥልጣን እምቅድመ ኵሉ ፍጥረተ ዓለም ይእዜኒ ወዘልፈኒ ወለኵሉ ዓለማት ዘይመጽእ አሜን። መልአት መልእክተ ይሁዳ ሐዋርያ እኁሁ ለያዕቆብ። ወስብሐት ለእግዚአብሔር ለዓለመ ዓለም አሜን።