Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 11 Bible Online

ራእዩ ለዮሐንስ 11 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 11

¹ ወመጠወኒ ኅለተ ወርቅ ዘመጠነ በትር ወይቤለኒ ንሣእ ወመጥን ቤተ መቅደሱ ለእግዚአብሔር ወምሥዋዖ ወኀበሂ ይሰግዱ ሎቱ።

² ወዐጸደሰ ጸናፌ ኅድግ ወኢትመጥን እስመ ተውህበት ለአሕዛብ በዛ ሀገር ቅድስት ወይትካየድዋ አርብዓ ወክልኤተ አውራኀ።

³ወእኤዝዞሙ ለክልኤቱ ጻድቃንየ ከመ ይትነበዩ መዋዕለ ዐሠርተ ወክልኤተ ምእተ ወስሳ እንዘ ሠቀ ይለብሱ።

⁴ ወእሉ እሙንቱ ክልኤ ዕፀ ዘይት ወክልኤ መኃትው እለ ቅድመ እግዚአብሔር እለ ሥዩማን ላዕለ ምድር።

⁵ ወለዘፈቀደ ይስሐጦሙ እምውስተ ጸላእቶሙ ትወፅእ እሳት እምነ አፉሆሙ ወታጠፍኦሙ ለጸላእቶሙ ወከመዝ ይመውቱ እለ ይስሕጥዎሙ።

⁶ እስመ እሙንቱ ሥሉጣን ላዕለ ሰማይ ከመ ይዕጽውዋ ከመ ኢይዝንም ዝናም ላዕለ ምድር በመዋዕለ ትንቢቶሙ ወዓዲ ሥሉጣን እሙንቱ ላዕለ ማይ ከመ ይረስይዎ ደመ ወያሕምምዋ ለምድር በኵሉ መቅሠፍት መጠነ ፈቀዱ።

⁷ ወሶበ ፈጸሙ ስምዖሙ ወትንቢቶሙ አርዌ ዘዐርገ እምቀላይ ተበአሰ ምስሌሆሙ ወሞኦሙ ወቀተሎሙ።

⁸ ወአንበረ በድኖሙ ውስተ ሀገር ዐባይ እንተ ስማ ፍጥሞ ዘበኅቡእ ሰዶም ወግብጽ ኀበ ተጸልበ እግዚኦሙ።

⁹ወይሬእይዎ አሕዛብ ወሕዝብ ወነገድ ወበሐውርት ለበድኖሙ ሠሉሰ መዋዕለ ወመንፈቀ ወኢያበውሕ[5] ይቅብርዎ ውስተ መቃብር ለበድኖሙ።

¹⁰ወይትፌሥሑ ላዕሌሆሙ እለ ይነብሩ ዲበ ምድር ወይጻገዉ በበይናቲሆሙ አምኃ ወይብሉ እስመ እሉ ክልኤቱ ነቢያት አሕመምዎሙ ለእለ ይነብሩ ዲበ ምድር።

¹¹ ወእምድኅረ ሠሉስ መዋዕል ወመንፈቅ ትመጽእ መንፈሰ ሕይወት እምኀበ እግዚአብሔር ወትበውእ ውስቴቶሙ ወይትነሥኡ ወይቀውሙ በእገሪሆሙ ወኮነ ፍርሀት ዐቢይ ላዕለ እለ ይሬእይዎሙ።

¹²ወመጽአ ቃል እምሰማይ ወይቤሎሙ ዕርጉ ዝየ ወእምዝ ዐርጉ ውስተ ሰማይ በደመና ወርእይዎሙ ጸላእቶሙ።

¹³ወበይእቲ ሰዓት ኮነ ዐቢይ ድልቅልቅ ወወድቀ ዐሠርተ እዴሃ ለይእቲ ሀገር ወሞቱ በውእቱ ድልቅልቅ ሰብዓ ምእት ነፍስ ወደንገፁ እለ ተርፉ ወሰብሕዎ ወአእኰትዎ ለአምላከ ሰማይ።

¹⁴ ወበዝ ኀለፈት ካልእት ሕማም ወተርፈት ሣልሲት ሕማም።

¹⁵ ወሶበ ጠቅዐ ሳብዕ መልአክ መጽአ ቃል ዐቢይ እምሰማይ ዘይብል ኮነት መንግሥተ ዓለም ለእግዚአብሔር ወለመሲሑ ወይነግሥ ለዓለመ ዓለም።

¹⁶ ወእልክቱኒ ዕሥራ ወአርባዕቱ ሊቃናት እለ ይነብሩ ቅድመ እግዚአብሔር በበ መናብርቲሆሙ ሰገዱ በገጾሙ ቅድመ እግዚአብሔር።

¹⁷ ወይቤሉ ነአኵተከ እግዚኦ እግዚአብሔር ዘኵሎ ትመልክ ዘሀሎከ ወትሄሉ እስመ አንሣእከ ኀይለከ ዐቢየ ወነሣእከ መንግሥተ።

¹⁸ ወአሕዛብሰ ተምዑ እስመ በጽሖሙ መዓትከ ወዘመኖሙ ለሙታን በዘይትኴነኑ ወከመ ተሀቦሙ ዕሴቶሙ ለአግብርቲከ ለነቢያት ወለቅዱሳን ወለእለ ይፈርሁ ስመከ ለንኡሶሙ ወለዐቢዮሙ ወከመ ትኰንኖሙ ለእለ ያማስንዋ ለምድር።

¹⁹ ወእምዝ ተርኅወ መቅደሱ ለእግዚአብሔር ዘውስተ ሰማይ ወአስተርአየት ታቦተ ሕጉ ለእግዚአብሔር እንተ ውስተ መቅደሱ ወመጽአ መብረቅ ወቃለ ነጐድጓድ ወድልቅልቅ ወበረድ ዐቢይ።