Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 12 Bible Online

ራእዩ ለዮሐንስ 12 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 12

¹ወአስተርአየ ተኣምር ዐቢይ በውስተ ሰማይ ብእሲት እንተ ትለብስ ፀሓየ ወወርኅ ታሕተ እገሪሃ ወዲበ ርእሳኒ አክሊል ዘዐሠርቱ ወክልኤቱ ከዋክብት።

² ወፅንስት ይእቲ ብእሲት ወትግዕር ወተሐምም ለወሊድ።

³ ወአስተርአየ ካልእ ተኣምር በውስተ ሰማይ አርዌ ዐቢይ ወቀይሕ ዘሰብዐቱ አርእስቲሁ ወዐሠርቱ አቅርንቲሁ ወውስተ አርእስቲሁ ሰብዐቱ ቀጸላ።

⁴ ወበዘነቡ ይስሕብ ሣልስተ እዴሆሙ ለከዋክብተ ሰማይ ወያወርዶሙ ውስተ ምድር ወቆመ ውእቱ አርዌ አንጻረ ይእቲ ብእሲት ከመ ሶበ ወለደት ይብላዕ ሕፃና።

⁵ ወወለደት ወልደ ተባዕተ ዘውእቱ ይርዕዮሙ ለኵሉ አሕዛብ በበትረ ኀጺን ወመሠጥዎ ለውእቱ ሕፃን ወወሰድዎ ኀበ እግዚአብሔር ወኀበ መንበሩ።

⁶ ወጐየት ይእቲ ብእሲት ውስተ ገዳም ወውስተ መካን ዘአስተዳለወ ላቲ እግዚአብሔር ከመ ትትዐቀብ በህየ በኵሉ መዋዕል ዐሠርተ ወክልኤተ ምእተ ወስሳ[6] ዕለተ።

⁷ ወጸብእዎ በሰማይ ለውእቱ አርዌ ሚካኤል ወመላእክቲሁ ወተጻብኦሙ ውእቱ አርዌ ምስለ መላእክቲሁ።

⁸ወስእኖሙ ወኢረከበ እንከ መካነ በውስተ ሰማይ።

⁹ ወወድቀ ውስተ ምድር ውእቱ አርዌ ዐቢይ ወአርዌሰ ዐቢይ ውእቱ ቀዲሙ ዘአስሐቶ ለኵሉ ዓለም ዘስሙ ሰይጣን ወወድቀ ውስተ ምድር ወመላእክቲሁኒ ወድቁ ምስሌሁ ውስተ ምድር።

¹⁰ ወሰማዕኩ ቃለ ዐቢየ በውስተ ሰማይ ዘይብል ኮነት መድኀኒት ወኀይል ወመንግሥት ለአምላክነ ወሥልጣን ለመሲሑ እስመ ወድቀ መስተዋድይ ዘአስተዋደዮሙ ለአበዊነ ቅድመ እግዚአብሔር መዐልተ ወሌሊተ።

¹¹ ወሞእዎ እሙንቱ በእንተ ደመ በግዑ ወበእንተ ቃለ ጽድቆሙ እስመ ኢያብደሩ ነፍሶሙ እስከ ለሞት።

¹² ወበእንቲኣሆሙ ተፈሥሑ ሰማያት ወእለ ይነብሩ ውስቴቶን አሌ ላ ለምድር ወለባሕር እስመ ወረደ ሰይጣን ውስቴቶሙ ምስለ ዐቢይ ሕምዙ እስመ የአምር ከመ ውኁድ መዋዕል ተርፎ።

¹³ወሶበ ርእየ ዝክቱ አርዌ ከመ ወድቀ ውስተ ምድር ዴገና ለእንታክቲ ብእሲት እንተ ወለደት ሕፃነ ተባዕተ።

¹⁴ ወተውህባ ለይእቲ ብእሲት ክልኤ ክንፍ ከመ ዘዐቢይ ንስር ከመ ትሥርር ውስተ ገዳም ወውስተ መካን ኀበ ትትዐቀብ በኵሉ መዋዕል ዘመነ ወአዝማነ ወመንፈቀ ዘመን እምቅድመ ገጹ ለውእቱ አርዌ ወሠረረ ወዴገና ውእቱ አርዌ።

¹⁵ወአውፅአ እምነ አፉሁ ውእቱ አርዌ ማየ ብዙኀ እንተ ድኅሬሃ ለይእቲ ብእሲት ከመ ፈለግ ዐቢይ ከመ ይንሥኣ ውኂዙ።

¹⁶ወረድአታ ምድር ለይእቲ ብእሲት ወአርኀወት አፉሃ ምድር ወሰረበቶ ለውእቱ ውኂዝ ዘአውኀዘ ውእቱ አርዌ እምነ አፉሁ ወኢያእመረ ከመ ተውህበ ላቲ ክንፍ።

¹⁷ ወተምዐ ውእቱ አርዌ ላዕለ ይእቲ ብእሲት ወሖረ ይጽብኦሙ ለእለ ተርፉ ውሉዳ ወለእለ የዐቅቡ ትእዛዘ እግዚአብሔር ወይሄልዉ በጽድቁ ለኢየሱስ ክርስቶስ።

¹⁸ወቆመ ውእቱ አርዌ ላዕለ ኆፃ ባሕር።