Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 13 Bible Online

ራእዩ ለዮሐንስ 13 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 13

¹ ወወፅአ ካልእ አርዌ እምነ ባሕር ዘዐሠርቱ አቅርንቲሁ ወሰብዐቱ አርእስቲሁ ወውስተ አቅርንቲሁ ዐሠርቱ ቀጸላ ወውስተ አርእስቲሁ ስመ ፅርፈት።

² ወይመስል ውእቱ አርዌ ነምረ ወእገሪሁ ከመ ድብ ወአፉሁ ከመ አንበሳ ወወሀቦ ዝክቱ አርዌ ቀዳማዊ ኀይሎ ወመንበሮ ወዕበየ ሥልጣኑ።

³ ወአሐቲ እምነ አርእስቲሁ እንተ ተረግዘት በሞት ወቍስለ ሞቱሰ ሐይወ ወአንከረቶ ኵላ ምድር ወተለውዎ ለውእቱ አርዌ።

⁴ወሰገዱ ሎቱ ለዝክቱ አርዌ ቀዳማዊ እስመ ወሀቦ ለዝንቱ አርዌ ሥልጣኖ ወሰገዱ ሎቱ ለውእቱ አርዌ እንዘ ይብሉ መኑ ይመስሎ ለዝንቱ አርዌ ወመኑ ይክል ጸቢኦቶ።

⁵ ወተውህበ ሎቱ አፍ ከመ ይንብብ ዐቢያተ ወፅርፈታተ ወተውህበ ሎቱ ሥልጣን ይግበር ተአምረ ዘፈቀደ አርብዓ ወልክኤተ አውራኀ።

⁶ወእምዝ ፈትሐ አፉሁ ከመ ይፅርፍ ላዕለ እግዚአብሔር ወላዕለ ስሙ ወላዕለ ጽርሐ መቅደሱ ዘበሰማይ።

⁷ ወተውህቦ ከመ ይግበር ጸብአ ምስለ ቅዱሳን ወይማኦሙ ወተውህቦ ሥልጣን ላዕለ ኵሉ አሕዛብ ወሕዝብ ወበሓውርት ወነገድ።

⁸ ወሰገዱ ሎቱ ኵሎሙ እለ ይነብሩ ዲበ ምድር እለ ኢኮኑ ጽሑፋነ አስማቲሆሙ ውስተ መጽሐፈ ሕይወት ዘበግዑ ዘተቀትለ ዘእምፍጥረተ ዓለም።

⁹ዘቦ እዝን ሰሚዐ ለይስማዕ፤

¹⁰ ወተፄወወኒ ኅሊናየ ወዘሰ ቀተለ በመጥባሕት ሀለዎ ይሙት በመጥባሕት ወዝየ ውእቱ ትዕግሥቶሙ ወሃይማኖቶሙ ለቅዱሳን ብፅዕት ወኢአንክሮቱ ለሰይጣን።

¹¹ ወእምዝ ወፅአ ካልእ አርዌ እምነ ምድር ዘክልኤቱ አቅርንቲሁ ወይመስል ከመ በግዕ ወይነብብ ከመ አርዌ።

¹²ወበሥልጣኑ ለቀዳማዊ አርዌ ይገብር ኵሎ በቅድሜሁ ወይሬስያ ለምድር ወለእለሂ ይነብሩ ውስቴታ ይስግዱ ሎቱ ለቀዳማዊ አርዌ ዘሐይወ እምቍስለ ሞቱ።

¹³ወይገብር ተአምራተ ዐበይተ ከመ ያውርድ እምሰማይ እሳተ ውስተ ምድር በቅድመ ዕጓለ እመሕያው።

¹⁴ ወያስሕቶሙ ለእለ ይነብሩ ዲበ ምድር በእንተ ተኣምር ዘተውህበ ሎቱ ይግበር በቅድመ ውእቱ አርዌ ወይቤሎሙ ለእለ ይነብሩ ውስተ ምድር ከመ ይግበሩ አምሳሎ ለዝንቱ አርዌ ዘቈስለ በመጥባሕት ወሐይወ።

¹⁵ወተውህበ ሎቱ ይደይ ውስቴቱ መንፈሰ ለአምሳለ ዝንቱ አርዌ ከመ ይንብብ ምስሉ ለውእቱ አርዌ ወገብሮሙ ለኵሎሙ እለ ኢሰገዱ ለአምሳለ ዝንቱ አርዌ ከመ ይሙቱ።

¹⁶ ወይገብር ኵሉ ንኡሱ ወዐቢዩ አብዕልት ወነዳያን አግብርት ወአግዓዝያን ከመ ይጽሐፉ ውስተ እደዊሆሙ እንተ የማን ወእመ አኮ ውስተ ፍጽሞሙ።

¹⁷ወከመ አልቦ ዘይክል ሠዪጠ ወተሣይጦ እንበለ እለ ጽሑፋን እሙንቱ ትእምርተ ስሙ ለውእቱ አርዌ አው ዘኍልቈ ስሙ።

¹⁸ ወዘሰ ጠቢብ ውእቱ ወዘቦ ልብ የአምር ኍላቌሁ ለውእቱ አርዌ እስመ አምጣነ ዕጓለ እመሕያው ውእቱ ወኍላቌሁኒ ስድስቱ ምእት ወስሳ ወስድስቱ።