Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 14 Bible Online

ራእዩ ለዮሐንስ 14 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 14

¹ ወእምዝ ቆመ ዝክቱ በግዕ ላዕለ ደብረ ጽዮን ወምስሌሁ ዐሠርቱ ወአርባዕቱ እልፍ ወአርብዓ ምእት እለ ጽሑፍ ውስተ ፍጽሞሙ ስሙ ወስመ አቡሁ ወስመ ቅዱስ መንፈሱ።

² ወመጽአ ቃል እምሰማይ ከመ ቃለ ማይ ብዙኅ ወከመ ቃለ ነጐድጓድ ዐቢይ ወከመ ቃለ መሰናቁት ሶበ ይሰነቅዉ በበ መሰንቆታቲሆሙ።

³ ወየሐልዩ ማኅሌተ ሐዲሰ ቅድመ መንበሩ ወቅድመ እልክቱ አርባዕቱ እንስሳሁ ወእልክቱኒ ሊቃናት ወአልቦ ዘይክል አእምሮታ ለይእቲ ማኅሌት ዘእንበለ እልክቱ ዐሠርቱ ወአርባዕቱ እልፍ ወአርብዓ ምእት እለ ተቤዘዉ እምነ ምድረ ግብፅ።

⁴ እለ ንጹሓን እሙንቱ እምአንስት በከመ ተወልዱ እሙንቱ እለ ተለውዎ ለበግዑ ኀበ ሖረ እለ ቀደሙ ተቤዝዎ እምነ ዕጓለ እመሕያው ለእግዚአብሔር ወለበግዑ።

⁵ ወኢተረክበ ሐሰት ውስተ አፉሆሙ እስመ ንጹሓን እሙንቱ እምኀጢአት።

⁶ወእምዝ መጽአ ካልእ መልአክ እንዘ ይሠርር ማእከለ ሰማይ ወምድር ወይጸውር ወንጌለ ዘለዓለም ከመ ይስብክ ሎሙ ለእለ ይነብሩ ዲበ ምድር ወለኵሎሙ አሕዛብ ወሕዝብ ወነገድ ወበሓውርት።

⁷ እንዘ ይብል በቃል ዐቢይ ፍርህዎ ለእግዚአብሔር ወሰብሕዎ እስመ በጽሐት ሰዓተ ደይኑ ዐቢይ ወስግዱ ሎቱ ለዘገብረ ሰማየ ወምድረ ወባሕረ ወአፍላገ ወአንቅዕተ ማያት።

⁸ ወካልእ መልአክ ተለዎ እንዘ ይብል ወድቀት ባቢሎን ሀገር ዐባይ እምነ ወይነ መንሱታ ወዝሙታ ዘአስተየት ለኵሉ አሕዛብ።

⁹ ወሣልስ መልአክ ተለዎሙ እንዘ ይብል በቃል ዐቢይ ዘሰገደ ለዝክቱ አርዌ ወለምስሉ ወዘጽሑፍ ትእምርተ ስሙ ውስተ ፍጽሙ አው ውስተ እዴሁ።

¹⁰ ይስተይ ውእቱኒ ወይነ መዓቱ ለእግዚአብሔር ዘቅዱሕ ውስተ ጽዋዐ መዓቱ ዘኢኮነ ቱሱሐ ወይትኰነን በእሳት ወተይ በቅድመ መላእክቲሁ ወበቅድመ በግዑ።

¹¹ ወዐርገ ጢሰ ደይኖሙ ለዓለመ ዓለም ወአልቦሙ ዕረፍት መዓልተ ወሌሊተ ወዘንተ ኵነኔ ይረክቡ እለ ይሰግዱ ለውእቱ አርዌ ወለምስሉ ወእለ ይጽሕፉ ትእምርተ ስሙ።

¹² ወዝ ውእቱ ትዕግሥቶሙ ለቅዱሳን እለ የዐቅቡ ትእዛዘ እግዚአብሔር ወሃይማኖቶ ለኢየሱስ።

¹³ ወመጽአ ቃል እምሰማይ ዘይብል ጸሐፍ ይእዜ ብፁዓን እለ ሞቱ በእንተ እግዚአብሔር[7] እወ ከማሁ ይቤ መንፈስ ቅዱስ ከመ ያዕርፉ እምነ ጻማሆሙ ወይተልዎሙ ግብሮሙ ወይወስዶሙ ኀበ ነቅዐ ማየ ሕይወት።

¹⁴ ወመጽአት ደመና ብርህት ወውስተ ይእቲ ደመና ይነብር ወልደ ዕጓለ እመሕያው ወአክሊለ ወርቅ ዲበ ርእሱ ወማዕጸድ በሊኅ ውስተ እዴሁ።

¹⁵ ወወፅአ ካልእ መልአክ እምነ መቅደሱ ለእግዚአብሔር ወይጸርሕ ሎቱ በቃል ዐቢይ ለዘይነብር ውስተ ደመና ወይብል ፈኑ ማዕጸደከ በሊኀ ወዕጽድ እስመ በጽሐት ሰዓት ለዐጺድ እስመ የብሰ ማእረረ ምድር።

¹⁶ወእምዝ አልዐለ ማዕጸዶ ውእቱ ዘይነብር ውስተ ደመና ላዕለ ምድር ወተዐጽደት ምድር።

¹⁷ወወፅአ ካልእ መልአክ እምነ መቅደሱ ዘውስተ ሰማይ ወይጸውር ውእቱኒ ማዕጸደ በሊኀ።

¹⁸ወካልእ መልአክ ተለዎ እምነ ምሥዋዕ ዘውእቱ ሥሉጥ ላዕለ እሳት ወጸውዖ በቃል ዐቢይ ለዝክቱ ዘይጸውር ማዕጸደ በሊኀ ወይቤሎ ፈኑ ማዕጸደከ በሊኀ ወቅሥም አስካሎ ለዐጸደ ወይና ለምድር እስመ ዐቢይ አስካሉ።

¹⁹ ወነሥአ ውእቱ መልአክ ማዕጸዶ ወአውረደ ውስተ ምድር ወቀሠመ ቦቱ ዐጸደ ወይና ለምድር ወወደዮ ውስተ ምክያደ መዓቱ ለእግዚአብሔር ዐቢይ።

²⁰ ወአኬድዎ በምክያድ በአፍኣ እምነ ሀገር ወወፅአ ደም እምነ ውእቱ ምክያድ ወበጽሐ እስከ ኀበ ልጓመ ፈረስ ወውኅዘ እስከ ዐሠርቱ ወስድስቱ ምዕራፍ።