Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 15 Bible Online

ራእዩ ለዮሐንስ 15 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 15

¹ ወአስተርአየ ተአምር ዐቢይ በሰማይ ሰብዐቱ መላእክት እለ ይጸውሩ ሰብዐተ መቅሠፍተ በዘቦቱ የኀልቅ መዓቱ ለእግዚአብሔር።

² ወእምዝ ርኢኩ ባሕረ እንተ ትመስል ከመ ማህው ወድምርት ይእቲ በእሳት ወእልክቱ እለ ሞእዎ ለዝክቱ አርዌ ወለምስሉ ወለኍልቈ ስሙ ይቀውሙ ላዕለ ይእቲ ባሕር ወይጸውሩ መሰንቆ መዝሙር ዘእግዚአብሔር።

³ ወይሴብሕዎ ለእግዚአ ኵሉ በከመ ሰብሐ ሙሴ ገብረ እግዚአብሔር በስብሐተ በግዑ ወይብሉ ዐቢይ ወመድምም ግብርከ እግዚኦ እግዚአብሔር ዘኵሎ ትመልክ ጽድቅ ወርትዕ ፍናዊከ ዘነገሥከ ላዕለ ኵሉ አሕዛብ።

⁴ ወመኑ ዘኢይፈርሀከ ወኢይሴብሕ ለስምከ እስመ ባሕቲትከ ጻድቅ አንተ ወሥሉጥ አንተ ላዕለ ኵሉ አሕዛብ ወይሰግዱ ቅድሜከ እግዚኦ ኵሉ ተግባርከ እስመ አስተርአየ ኵነኔከ።

⁵ ወእምድኅረ ዝንቱ ተርኅወ መቅደስ ዘደብተራ ስምዕ ዘውስተ ሰማይ።

⁶ወወፅኡ እልክቱ ሰብዐቱ መላእክት እለ ይጸውሩ ሰብዐተ መቅሠፍተ እምነ መቅደሱ ወይለብሱ አልባሰ ንጹሐ ወብሩሀ ወቅኑታን እሙንቱ በቅናተ ወርቅ እንተ መንገለ እንግድዓቲሆሙ።

⁷ ወአሐዱ እምነ እልክቱ አርባዕቱ እንስሳሁ መጠዎሙ ለእልክቱ ሰብዐቱ መላእክት ሰብዐተ ጽዋዓተ ወርቅ ምሉኣነ መዓቱ ለእግዚአብሔር ዘሕያው ለዓለመ ዓለም።

⁸ ወእምዝ መልአ መቅደሱ ጢሰ መዓቱ ለእግዚአብሔር እምስብሐቲሁ ወእምኀይሉ ወአልቦ ዘይክል በዊአ ውስተ መቅደሱ እስከ ኀልቀ ሰብዐቱ መቅሠፍት ዘሰብዐቱ መላእክት።