Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 16 Bible Online

ራእዩ ለዮሐንስ 16 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 16

¹ ወይቤሎሙ ቃል እምሰማይ እምነ መቅደሱ ለእልክቱ ሰብዐቱ መላእክት ሑሩ ወከዐዉ ጽዋዐ መዓቱ ለእግዚአብሔር ውስተ ኵላ ምድር።

² ወሖረ መልአክ ቀዳማዊ ወከዐወ ጽዋዖ ውስተ ምድር ወመጽአ ላዕለ እልክቱ ሰብእ እለ ጸሐፉ ትእምርቶ ለዝክቱ አርዌ ወሰገዱ ለምስሉ ወመጽአ ላዕሌሆሙ ጸልዕ እኩይ።

³ ወከዐወ ካልእ መልአክ ጽዋዖ ውስተ ባሕር ወኮነት ባሕር ደመ ወሞተ ኵሉ ነፍሰ ሕይወት ዘውስተ ባሕር።

⁴ ወከዐወ ሣልስ መልአክ ጽዋዖ ውስተ አፍላግ ወውስተ አንቅዕተ ማያት ወኮኑ ደመ ኵሉ አንቅዕተ ማያት።

⁵ወይቤ መልአከ አንቅዕተ ማያት ጻድቅ አንተ እግዚኦ ወራትዕ ዘሀለውከ ወትሄሉ ወከመዝ ኰነንከ።

⁶እስመ ከዐዉ ደመ ቅዱሳኒከ ወነቢያቲከ ወአስተይካሆሙ ደሞሙ እስመ ይደልዎሙ።

⁷ ወሰማዕኩ ቃለ ዘይቤ በውስተ ምሥዋዕ እወ እግዚኦ እግዚአብሔር ዘኵሎ ትመልክ ጽድቅ ወርትዕ ኵነኔከ።

⁸ወከዐወ ራብዕ መልአክ ጽዋዖ ውስተ ፀሓይ ወተውህበ ሎቱ ሐሩር ከመ ያውዕዮ ለሰብእ በእሳት።

⁹ ወውዕየ ሰብእ በዐቢይ ሐሩር እስከ ይፀርፉ ላዕለ ስመ እግዚአብሔር ዘውእቱ ሥሉጥ ላዕለ እልክቱ መቅሠፍታት ወኢነስሑ ከመ ያእኵትዎ።

¹⁰ ወከዐወ ኀምስ መልአክ ጽዋዖ ላዕለ መንበሩ ወላዕለ መንግሥቱ ለዝክቱ አርዌ ወጸልመት መንግሥቱ እስከ ይሜጽሩ ልሳናቲሆሙ ሰብእ በሕማም።

¹¹ ወእስከ ይፀርፉ ላዕለ እግዚአ ሰማይ እምነ ሕማመ አጽልዕቲሆሙ ወኢነስሑ እምነ ግብሮሙ።

¹² ወከዐወ ሳድስ መልአክ ጽዋዖ ውስተ ፈለግ ዐቢይ ዘኤፍራጥስ ወየብሰ ማዩ ከመ ትደሎ ፍኖቶሙ ለነገሥት እለ እምነ ምሥራቀ ፀሓይ።

¹³ ወእምዝ ወፅኡ እምነ አፉሁ ለዝንቱ አርዌ ቀዳማዊ ወእምአፉሁ ለአንበሳ ወእምአፉሁ ለሐሳዌ ነቢይ ሠለስቱ አጋንንት ርኩሳን ወከመ ቈርነናዓት እሙንቱ መንፈሰ አጋንንት።

¹⁴ወይገብሩ ተአምራተ ወይወፅኡ ላዕለ ኵሉ ነገሥት እለ ውስተ ኵሉ ዓለም ወያስተጋብእዎሙ ይትቃተሉ በዕለት ዐባይ እንተ እግዚአብሔር ዘኵሎ ይመልክ።

¹⁵ ወናሁ እመጽእ ግብተ ከመ ሰራቂ ወብፁዕ ዘይተግህ፥ ወየዐቅብ አልባሲሁ ከመ ኢይሑር ዕራቆ ወኢያስተርኢ ኀፍረቱ።

¹⁶ ወአስተጋብኦሙ ውስተ መካን ዘስሙ አርማጌዶን በዕብራይስጥ።

¹⁷ወከዐወ ሳብዕ መልአክ ጽዋዖ ውስተ ነፋስ ወወፅአ ቃል ዐቢይ እምነ መቅደሱ ወእም ኀበ መንበሩ ዘይብል ኀልቀ።

¹⁸ ወእምዝ ኮነ መብረቅ ወቃለ ነጐድጓድ ወመጽአ ዐቢይ ድልቅልቅ ዘኢኮነ ከማሁ እምአመ ተፈጥረ ዕጓለ እመሕያው ውስተ ምድር ወኢይከውንሂ ዘከማሁ ድልቅልቅ ዐቢይ።

¹⁹ ወኮነት ሀገር ዐባይ ሠለስተ መክፈልተ ወአህጉረ አሕዛብኒ ወድቃ ወለባቢሎንኒ ዐባይ ተዘከርዋ ቅድመ እግዚአብሔር ከመ ይመጥውዋ ጽዋዐ ሕምዘ ወይነ መዓቱ ለእግዚአብሔር።

²⁰ ወጠፍኣ ኵሎን ደሰያት ወአድባርኒ ኢተረክቡ።

²¹ ወወረደ እምሰማይ ላዕለ ሰብእ ዐቢይ በረድ ዘመጠነ መካልይ ወፀረፉ ሰብእ ላዕለ ስመ እግዚአብሔር በእንተ ውእቱ መቅሠፍተ በረድ እስመ ዐቢይ ውእቱ መቅሠፍቱ ጥቀ።