Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 17 Bible Online

ራእዩ ለዮሐንስ 17 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 17

¹ ወመጽአ አሐዱ እምነ እልክቱ ሰብዐቱ መላእክት እለ ይጸውሩ ሰብዐተ ጽዋዓተ ወይቤለኒ ነዓ አርኢከ ደይና ለእንታክቲ ዘማ ዐባይ እንተ ትነብር ውስተ ማያት ብዙኅ።

² እንተ ምስሌሃ ዘመዉ ነገሥተ ምድር ወሰክሩ እለ ይነብሩ ዲበ ምድር እምነ ወይነ ዝሙታ።

³ ወእምዝ ወሰደኒ መንፈስ ገዳመ ወርኢኩ ብእሲተ ትጼዐን ላዕለ አርዌ ቀይሕ ዘምሉእ አስማተ ፅርፈት ዘሰብዐቱ አርእስቲሁ ወዐሠርቱ አቅርንቲሁ።

⁴ ወትለብስ ይእቲ ብእሲት ልብሰ ወርቅ ዘቦ ሜላት ወዘቦ ለይ ወዕንቍ ክቡር ወባሕርያት ወትጸውር ውስተ እዴሃ ጽዋዐ ወርቅ ዘምሉእ ርኵሰ ወግማኔ ዝሙታ።

⁵ ወጽሑፍ ውስተ ፍጽማ አስማተ ምሥጢራ ለባቢሎን ዐባይ ዘይብል እሞን ለዘማት ወዘርኵሳ ለምድር።

⁶ ወስክርት ይእቲ ብእሲት እምደሞሙ ለቅዱሳን ወእምደሞሙ ለጻድቃኒሁ ለኢየሱስ ወአንከርክዋ ሶበ ርኢክዋ ዐቢየ ተደመምኩ።

⁷ወይቤለኒ ዝክቱ መልአክ ምንተ ታነክር አነ እነግረከ ምሥጢራ ለዛቲ ብእሲት ወለዝክቱ አርዌ ዘይጸውራ ወሰብዐቱ አርእስቲሁ ወዐሠርቱ አቅርንቲሁ።

⁸ ወዝክቱኒ አርዌ ዘርኢከ ሀለወ ወኢሀለወ ወሀለዎ ይዕርግ እምነ ቀላይ ወየሐውር ለሙስና ወይዴመሙ በእንቲኣሁ እለ ይነብሩ ዲበ ምድር እለ ኢኮነ ጽሑፈ አስማቲሆሙ ውስተ መጽሐፈ ሕይወት ዘእምፍጥረተ ዓለም ሶበ ርእይዎ ለውእቱ አርዌ ከመ ሀለወ ወኢሀለወ እንዘ ሀለወ።

⁹ወዘቦ ልብ ወጥበብ የአምሮ ለዝንቱ ወለዝንቱሰ አርዌ ዘርኢከ ሰብዐቱ አርእስቲሁ ዝንቱ ሰብዐቱ አርእስት ሰብዐቱ አድባር እሙንቱ እለ ዲቤሆሙ ትነብር ዛቲ ብእሲት።

¹⁰ወሰብዐቱ አድባር ሰብዐቱ ነገሥት እሙንቱ ወኀምስቱ ወድቁ ወአሐዱ ባሕቲቱ ሀለወ ወአሐዱ ኢመጽአ ዓዲ ወሶበ መጽአ ይነብር ኅዳጠ መዋዕለ።

¹¹ ወዝክቱኒ አርዌ ዘሀለወ ወኢሀለወ ሳምኖሙ ውእቱ ወምስለ እሉ ሰብዐቱ ውእቱ የሐውር ለሙስና።

¹² ወእሉሰ ዐሠርቱ አቅርንቲሁ ዘርኢከ ዐሠርቱ ነገሥት እሙንቱ እለ ዓዲ ኢጸንዐት መንግሥቶሙ ወባሕቱ ከመ ነገሥት ሥልጣን ቦሙ ለአሐቲ ሰዓት ወይትነሥኡ ምስለ ዝኩ አርዌ።

¹³ወአሐዱ ምክሮሙ ወኀይሎሙ ወሥልጣኖሙ አግብኡ ለዝክቱ አርዌ።

¹⁴ ወይጻብኡ ምስለ በግዑ ወይመውኦሙ በግዑ እስመ እግዚአ አጋእዝት ውእቱ ወንጉሠ ነገሥት ውእቱ ወእለ ምስሌሁኒ ስሙያን ወኅሩያን ወመሃይምናን እሙንቱ።

¹⁵ ወዝንቱ ማያት ዘርኢከ ዘኀቤሆሙ ትነብር ዛቲ ብእሲት ዘማ አሕዛብ ወሕዝብ ወበሐውርት ወሰብእ እሙንቱ።

¹⁶ ወዝንቱ ዐሠርቱ አቅርንቲሁ ወዝንቱኒ አርዌ ዘርኢከ ይጸንሕዋ እሙንቱ ለዛቲ ዘማ ወያማስንዋ ወያዐርቅዋ ወይበልዕዋ ሥጋሃ ወኪያሃሰ ያውዕይዋ በእሳት።

¹⁷ እስመ እግዚአብሔር ወደየ ውስተ ልቦሙ ከመ ይኅበሩ በአሐዱ ምክር ወያግብኡ መንግሥቶሙ ለዝክቱ አርዌ እስከ አመ ይትፌጸም ቃለ እግዚአብሔር።

¹⁸ ወዛቲ ብእሲት እንተ ርኢካ ሀገር ዐባይ ይእቲ እንተ ትነግሥ ላዕለ መንግሥታተ ምድር።