Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 19 Bible Online

ራእዩ ለዮሐንስ 19 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 19

¹ ወእምድኅረ ዝንቱ ተሰምዐ ቃል ዐቢይ እምሰማይ ከመ ዘብዙኅ ሰብእ ወይብሉ ሃሌ ሉያ እስመ ስብሐት ወፍርቃን ወኀይል ለአምላክነ።

² እስመ ጽድቅ ወርትዕ ኵነኔሁ እስመ ኰነና ለዐባይ ዘማ እንተ አማሰነት ምድረ በዝሙታ ወተበቀለ ደመ ኵሎሙ አግብርቲሁ እምእዴሃ።

³ ወይብሉ ዳግመ ሃሌ ሉያ።

⁴ ወዐርገ ጢስ ዘለዓለመ ዓለም ወሰገዱ እልክቱ ዕሥራ ወአርባዕቱ ሊቃናት ወእልክቱኒ አርባዕቱ እንስሳሁ ለእግዚአብሔር ዘይነብር ዲበ መንበሩ ቅዱስ ወይብሉ አሜን ሃሌ ሉያ።

⁵ ወወፅአ ቃል እምሰማይ እምውስተ መንበሩ ዘይብል ሰብሑ ለአምላክነ ኵልክሙ አግብርቲሁ ወእለ ትፈርህዎ ንኡስክሙ ወዐቢይክሙ።

⁶ ወእምዝ ሰማዕኩ ቃለ ከመ ዘብዙኅ ሰብእ ወከመ ቃለ ማይ ብዙኅ ወከመ ቃለ ነጐድጓድ ዐቢይ እንዘ ይብሉ ሃሌ ሉያ እስመ ነግሠ እግዚአብሔር ዘኵሎ ይመልክ።

⁷ ለንትፈሣሕ ወንትኀሠይ ወነሀብ ሎቱ ስብሐተ እስመ በጽሐ መርዓ በግዑ ወብእሲትኒ ድሉት ይእቲ።

⁸ ወተውህባ ላቲ ከመ ትልበስ ሜላተ ብርሃን ንጹሐ እስመ ውእቱ ሜላት ጽድቆሙ ለቅዱሳን።

⁹ወይቤለኒ ጸሐፍ ብፁዓን እለ ተጸውዑ ውስተ በዓለ መርዓ በግዑ እስመ ዝንቱ ቃለ ጽድቅ ዘእግዚአብሔር ውእቱ።

¹⁰ ወወደቁ ኀበ እገሪሁ ወሰገድኩ ሎቱ ወይቤለኒ ዑቅ ዮጊ ኢትስግድ ሊተ እስመ አነሂ ገብር ዘከማከ ወዘምስሌከ ወምስለ አኀዊከ ነቢያት እለ የዐቅቡ ሕጎ ለኢየሱስ ወባሕቱ ለእግዚአብሔር ንስግድ ኵልነ እስመ ሕጉ ለኢየሱስ መንፈሰ ተነብዮ።

¹¹ ወእምዝ ተርኅወ ሰማይ ወወፅአ ፈረስ ጸዓዳ ወዘይጼዐኖ ስሙ መሃይምን ወጻድቅ ወዘበጽድቅ ይኴንን ወይጸብእ።

¹² ወአዕይንቲሁ ከመ ነደ እሳት ወዲበ ርእሱ አክሊል ወጽሑፍ ውስተ ቀጸላሁ አስማት ዘአልቦ ዘየአምሮ ዘእንበለ ውእቱ ባሕቲቱ።

¹³ ወይለብስ ልብሰ ዘንዙኅ በደም ወሰመዩ ስሞ ቃለ እግዚአብሔር።

¹⁴ ወሐራ ሰማይ ይተልውዎ በአፍራስ ጸዓድው ወይለብሱ ሜላተ ብርሃን ንጹሐ።

¹⁵ ወይወፅእ እምነ አፉሁ ሰይፍ በሊኅ ዘቦቱ ይቀሥፎሙ ለአሕዛብ ወውእቱ ይርዕዮሙ በበትረ ኀጺን ወውእቱ ይከይዳ ለምክያደ ወይነ ሕምዘ መዓቱ ለእግዚአብሔር ዘኵሎ ይመልክ።

¹⁶ ወጽሑፍ ላዕለ ልብሱ ወውስተ ገቦሁ ስም ዘይብል ንጉሠ ነገሥት ወእግዚአ አጋእዝት።

¹⁷ ወእምዝ ቆመ አሐዱ መልአክ ውስተ ፀሓይ ወይጸርሕ በቃል ዐቢይ ወይቤ ለኵሉ አዕዋፍ ዘይሠርር ውስተ ማእከለ ሰማይ ንዑ ተጋብኡ ውስተ በዓሉ ለእግዚአብሔር ዐቢይ።

¹⁸ከመ ትብልዑ ሥጋ ነገሥት ወሥጋ መላእክት ወሥጋ ጽኑዓን ወሥጋ አፍራስ ወዘእለ ይጼዐንዎሙ ወሥጋ ኵሉ አግዓዚ ወገብር ወዘንኡስ ወዘዐቢይ።

¹⁹ ወእምዝ መጽአ ዝክቱ አርዌ ወነገሥተ ምድር ወሠራዊቶሙ ተጋብኡ ምስሌሁ ከመ ይጽብእዎ ለውእቱ ዘይጼዐን ላዕለ ፈረስ ጸዓዳ፥ ወለሠራዊቱ።

²⁰ ወእምዝ አኀዝዎ ለዝኩ አርዌ ወለሐሳዌ ነቢዩ ዘገብረ ተአምራተ በቅድሜሁ በዘያስሕቶሙ ለእለ ጸሐፉ ማኅተመ ስሙ ለውእቱ አርዌ ወሰገዱ ሎቱ ወለምስሉ ወወደይዎሙ ሕያዋኒሆሙ ውስተ ዐዘቅተ እሳት ዘይነድድ በተይ።

²¹ወለእለሰ ተርፉ ቀተልዎሙ በሰይፈ ዝክቱ ዘይጼዐን ላዕለ ፈረስ ጸዓዳ እንተ ትወፅእ እምአፉሁ ሰይፍ በሊኅ ወጸግቡ ኵሉ አዕዋፈ ሰማይ እምነ ሥጋሆሙ።