Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 4 Bible Online

ራእዩ ለዮሐንስ 4 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 4

¹ ወእምድኅረ ዝንቱ ርኢኩ ኆኅተ ርኁተ ውስተ ሰማይ ወቀዳማየ ቃለ ሰማዕኩ ከመ ቃለ መጥቅዕ ይትናገር ምስሌየ ወይቤለኒ ዕርግ ዝየ ወአነ አርእየከ ዘሀለወ ይኩን እምድኅረ ዝንቱ።

² ወበጊዜሃ ኮንኩ በመንፈስ ወናሁ ርኢኩ[3] መንበር ውስተ ሰማይ ይንበር።

³ወዘዲቤሁ ይነብር ይመስል ኅብሩ ከመ ዕንቈ ኢያሰጲድ ወሰርዲኖ ወካህናት እለ ዐውዱ ለውእቱ መንበር ይመስል ኅብሮሙ ከመ መረግድ።

⁴ ወበዐውዱ ለውእቱ መንበር ዕሥራ ወአርባዕቱ መናብርት ወዲበ ውእቶን መናብርት ይነብሩ ዕሥራ ወአርባዕቱ ሊቃናት ወይለብሱ ጸዓድወ አልባሰ ወዲበ አርእስቲሆሙ አክሊላት ዘወርቅ።

⁵ ወእምነ ውእቱ መንበር ይወፅእ መብረቅ ወፀዓዕ ወነጐድጓድ ወቅድሜሁ ለውእቱ መንበር የኀትዉ ሰብዑ መኃትው ዘውእቱ መንፈስ ቅዱስ ዘእግዚአብሔር።

⁶ ወቅድሜሁ ለውእቱ መንበር ባሕር ከመ እንተ በረድ ወእምገበዋቲሁ ለውእቱ መንበር አርባዕቱ እንስሳሁ ወምሉኣን እሙንቱ አዕይንተ እምቅድም ወእምድኅር።

⁷ ወቀዳማዊ ይመስል ከመ አንበሳ ወካልኡ ይመስል ከመ ላሕም ወሣልሱ ይመስል ከመ ገጸ ዕጓለ እመሕያው ወራብዑ ይመስል ከመ ንስር ዘይሠርር።

⁸ ወለእሉ አርባዕቱ እንስሳሁ ለለአሐዱ አሐዱ እምኔሆሙ በበስድስቱ ክነፊሆሙ ወእንተ ኵለንታሆሙ ምሉኣን እሙንቱ አዕይንተ ወአልቦሙ ዕረፍት መዐልተ ወሌሊተ እንዘ ይብሉ ቅዱስ ቅዱስ ቅዱስ እግዚአብሔር አምላከ አማልክት ዘሀሎ ወይሄሉ።

⁹ ወሶበ ከመዝ ይብሉ እልክቱ እንስሳሁ ወይሁቡ ስብሐተ ወክብረ ወአኰቴተ ለዝክቱ ዘይነብር ዲበ መንበር ዘሕያው ለዓለመ ዓለም።

¹⁰ ወይሰግዱ ሎቱ ቅድሜሁ ለዝክቱ ዘይነብር ዲበ መንበር እልክቱ ዕሥራ ወአርባዕቱ ሊቃናት ለዝክቱ ዘሕያው ለዓለመ ዓለም ወያወርዱ[4] አክሊላቲሆሙ ቅድመ መንበሩ።

¹¹ ወይብልዎ ለከ ይደሉ እግዚኦ አምላክነ ስብሐት ወክብር ወኀይል እስመ አንተ ፈጠርከ ኵሎ ወበፈቃደ ዚኣከ ይሄሉ ኵሉ ዘተፈጥረ።