Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 5 Bible Online

ራእዩ ለዮሐንስ 5 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 5

¹ ወእምዝ ርኢኩ ውስተ የማኑ ለውእቱ ዘይነብር ዲበ መንበር መጽሐፈ ጽሕፍተ እንተ ውስጣ ወእንተ አፍኣሃ ወኅትምት በሰብዐቱ ማኅተም።

²ወርኢኩ መልአክ ዐቢይ ይጸርሕ ወይብል በቃል ዐቢይ ለመኑ ይደልዎ ይክሥታ ለዛቲ መጽሐፍ ወይፍታሕ ማኅተሚሃ።

³ወአልቦ ዘክህለ ከሢቶታ ለይእቲ መጽሐፍ ወኢርእዮታ ኢበሰማይ ወኢበምድር።

⁴ወብዙኃን እለ በከዩ ወአነሂ ምስሌሆሙ እስመ አልቦ ዘተረክበ ዘይደልዎ ይክሥታ ለይእቲ መጽሐፍ ወይርአያ።

⁵ ወይቤለኒ አሐዱ እምውስተ እልክቱ ሊቃናት ኢትብኪ ናሁ ሞአ አንበሳ ዘእምነገደ ይሁዳ ዘእምውስተ ሥርዉ ለዳዊት ከመ ይፍትሓ ለይእቲ መጽሐፍ ወለማኅተሚሃ።

⁶ ወርኢኩ ማእከለ ዝኩ መንበር ወእልክቱ አርባዕቱ እንስሳሁ ወማእከለ እልክቱ ዕሥራ ወአርባዕቱ ሊቃናት ይቀውም በግዕ ከመ ዘርጉዝ ውእቱ ወቦ ሰብዐቱ አቅርንት ወሰብዐቱ አዕይንት ወዝንቱ ውእቱ መንፈሱ ለእግዚአብሔር ዘተፈነወ ውስተ ኵላ ምድር።

⁷ወመጽአ ወተመጠዋ ለይእቲ መጽሐፍ እምነ የማኑ ለዝክቱ ዘይነብር ዲበ መንበር።

⁸ ወሶበ ተመጠዋ ለይእቲ መጽሐፍ ሰገዱ ሎቱ ቅድሜሁ ለውእቱ በግዕ እልክቱ ዕሥራ ወአርባዕቱ ሊቃናት ወእልክቱ አርባዕቱ እንስሳሁ ወያጸንዑ ኵሎሙ ጽዋዓተ ወርቅ ዘምሉእ ዕጣነ ወመሰንቆ መዝሙር ወዝ ውእቱ ጸሎቶሙ ለቅዱሳን።

⁹ ወይዜምሩ በመዝሙር ሐዲስ ወይብሉ ይደልወከ ትንሥኣ ለዛቲ መጽሐፍ ወትፍታሕ ማኅተሚሃ እስመ ተቀተልከ ወተሣየጥከ በደምከ ለእግዚአብሔር እምነ ኵሉ ሕዝብ ወአሕዛብ ወነገድ ወበሓውርት።

¹⁰ ወረሰይከ እምኔሆሙ ለመንግሥተ እግዚአብሔር ካህናተ ወነገሥተ ከመ ይምልኩ ኵሎ ምድረ።

¹¹ ወሰማዕኩ ቃለ መላእክት ብዙኃን በዐውዱ ለውእቱ መንበር ወዘእንስሳሁኒ ወዘእልክቱኒ ሊቃናት ወኍልቆሙሰ እልፍ ወአእላፍ ወትእልፊተ አእላፋት ዘእልፍ አግዓዚ።

¹² ወይብሉ በቃል ዐቢይ ይደልዎ ለውእቱ በግዕ ዘተቀትለ ከመ ይንሣእ ኀይለ ወብዕለ ወጥበበ ወጽንዐ ወመንግሥተ ወክብረ ወስብሐተ ወበረከተ።

¹³ ወኵሉ ዘተፈጥረ ዘበሰማይ ወዘበምድር ወዘታሕተ ምድር ወዘውስተ ባሕር ወኵሉ ዘውስቴቶሙ ይብሉ ስብሐት ወክብር ወኀይል ወበረከት ለዘይነብር ዲበ መንበሩ ወለበግዑ ለዓለመ ዓለም አሜን።

¹⁴ ወይብሉ እልክቱ አርባዕቱ እንስሳሁ አሜን ወሰገዱ ሎቱ እልክቱ ሊቃናት።