Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 6 Bible Online

ራእዩ ለዮሐንስ 6 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 6

¹ ወሶበ ፈትሐ ዝክቱ በግዕ አሐደ ማኅተመ እምነ ሰብዐቱ ማኅተሚሃ ይቤለኒ አሐዱ እምነ እልክቱ አርባዕቱ እንስሳሁ ነዓ ርኢ ወሰማዕኩ ቃሎ ከመ ነጐድጓድ።

²ወርኢኩ ናሁ ፈረስ ጸዐዳ ይወፅእ ወዘይጼዐኖ ቀስተ ያጸንዕ ወወሀብዎ አክሊለ ወወፅአ ከመ ይማእ ወሞአ።

³ ወሶበ ፈትሐ ካልአ ማኅተመ ይቤለኒ ካልእ እምውስተ እንስሳሁ ነዓ ርኢ።

⁴ ወወፅአ ካልእ ፈረስ ቀይሕ ወአዘዝዎ ለዘይጼዐኖ ከመ ይንሣእ ሰላመ እምነ ምድር ከመ ይትቃተሉ በበይናቲሆሙ ወመጠውዎ ዐቢየ መጥባሕተ።

⁵ ወሶበ ፈትሐ ሣልሰ ማኅተመ ይቤለኒ ሣልስ እምውስተ እንስሳሁ ነዓ ትርአይ ወወፅአ ፈረስ ጸሊም ወዘይጼዐኖ መዳልወ ያጸንዕ።

⁶ ወሰማዕኩ ቃለ በማእከሎሙ ለእልክቱ አርባዕቱ እንስሳሁ ከመ ቃለ ንስር ወይብል መስፈርተ ሥርናይ በዲናር ወሠለስቱ መስፈርተ ሰገም በዲናር ወወይንሰ ወቅብዕ ኢየዐብሩ።

⁷ወሶበ ፈትሐ ራብዐ ማኅተመ ዘሰማዕኩ ቃለ ዘይቤለኒ ራብዕ እምነ እንስሳሁ ነዓ ትርአይ።

⁸ ወወፅአ ፈረስ ሐመልሚል ወዘይጼዐኖ ሞት ስሙ ወሲኦል ትተልዎ ወወሀብዎ ሥልጣነ ላዕለ ራብዕተ እዴሃ ለምድር ከመ ያስተቃትሎሙ በኀጺን ወበረኃብ ወበሞት ወበአራዊተ ምድር።

⁹ ወሶበ ፈትሐ ኃምሰ ማኅተመ ርኢኩ ታሕተ ምሥዋዕ ነፍሶሙ ለእለ ተቀትሉ በእንተ ቃለ እግዚአብሔር ወበእንተ ዘዐቀቡ ሕጎ።

¹⁰ ወጸርሑ በቃል ዐቢይ ወይቤሉ እስከ ማእዜኑ እግዚኦ! ቅዱስ ወጻድቅ ኢትትቤቀሎሙኑ ወኢትኴንኖሙ በእንተ ደምነ እምእለ ይነብሩ ዲበ ምድር።

¹¹ ወወሀብዎሙ አልባሰ ብሩሀ ለለአሐዱ እምኔሆሙ ወይቤልዎሙ ከመ ያዕርፉ ዓዲ ኅዳጠ መዋዕለ እስከ አመ ይትፌጸሙ እለ ከማሆሙ አግብርተ እግዚአብሔር ወአኀዊሆሙ እለ ሀለዎሙ ይትቀተሉ ከማሆሙ።

¹² ወሶበ ፈትሐ ሳድሰ ማኅተመ ኮነ ካዕበ ዐቢይ ድልቅልቅ ወጸልመ ፀሓይ ወወርኅኒ ከመ ደም ኮነ ኵለንታሁ።

¹³ ወከዋክብትኒ ወድቁ እምሰማይ ከመ ቈጽለ በለስ ሶበ ይዘብጦ ዐቢይ ነፋስ።

¹⁴ወሰማይኒ ተጠውመት ከመ ክርታስ ዘይጠወም አድባርኒ ወደሰያት ሰሰሉ ኵሉ።

¹⁵ ወነገሥተ ምድርኒ ወመሳፍንት ወመላእክት ወአብዕልት ወዐበይት ወኵሉ ገብር ወአግዓዚ ተኀብኡ ውስተ በኣታት ወውስተ አድባር።

¹⁶ ወይቤልዎሙ ለአድባር ወለጸዋልዕት ደቁ ላዕሌነ ወክድኑነ እምገጸ ዘይነብር ዲበ መንበር ወእምነ መዓተ በግዑ።

¹⁷ እስመ በጽሐት ዕለተ መዓቱ ዐባይ ወመኑ ይክል ተቃውሞታ።