Read Ge'ez NT – ሐዲስ ኪዳን በልሳነ ግእዝ ራእዩ ለዮሐንስ 8 Bible Online

ራእዩ ለዮሐንስ 8 - Ge'ez NT – ሐዲስ ኪዳን በልሳነ ግእዝ bible

ራእዩ ለዮሐንስ 8

¹ ወሶበ ፈትሐ ሳብዐ ማኅተመ አርመመ ኵሉ ዘበሰማይ ወዘበምድር እስከ መንፈቀ ሰዓት።

² ወእምዝ ርኢኩ ሰብዓተ መላእክተ እለ ይቀውሙ ቅድመ እግዚአብሔር ወወሀብዎሙ ለእልክቱ መላእክት ሰብዓተ መጣቅዕተ።

³ ወመጽአ ካልእ መልአክ ወቆመ ቅድመ ምሥዋዕ ወያጸንዕ ማዕጠንተ ወርቅ ወወሀብዎ ብዙኀ ዕጣናተ ከመ የሀብ ለጸሎተ ኵሎሙ ቅዱሳን በዲበ ምሥዋዕ ዘወርቅ ዘቅድመ መንበሩ።

⁴ ወዐርገ ጢሱ ለውእቱ ዕጣን ምስለ ጸሎቶሙ ለቅዱሳን እምውስተ እዴሁ ለውእቱ መልአክ ቅድመ እግዚአብሔር።

⁵ ወነሥአ ውእቱ መልአክ ማዕጠንተ እምኀበ እሳት ዘምሥዋዕ ወአውረደ ውስተ ምድር ወሶበ አውረደ ውስተ ምድር ኮነ ነጐድጓድ ወፀዓዕ ወመብረቅ ወድልቅልቅ።

⁶ወእልክቱኒ ሰብዐቱ መላእክት እለ ያጸንዑ ሰብዐተ መጣቅዕተ ተደለዉ ከመ ይጥቅዑ ቦሙ።

⁷ ወሶበ ጠቅዐ ቀዳማዊ መልአክ ኮነ በረድ ወእሳት ምስለ ደም ድሙር ወወረደ ውስተ ምድር ወውዕየ ሣልስተ እዴሃ ለምድር ወውዕዩ ኵሉ ዕፅ ወሣዕር ወሐመልማል።

⁸ ወሶበ ጠቅዐ ካልእ መልአክ ወረደ ውስተ ባሕር እሳት ዐቢይ ዘመጠነ ደብር እንዘ ይነድድ ወኮነ ደመ ሣልስተ እዴሃ ለባሕር።

⁹ ወሞተ ሣልስተ እዴሁ ለዘሀሎ ውስተ ባሕር ዘተፈጥረ ዘቦ መንፈሰ ሕይወት ወሣልስተ እዴሆን ለአሕማር ማሰና።

¹⁰ ወሶበ ጠቅዐ ሣልስ መልአክ ወረደ እምሰማይ ኮከብ ዐቢይ እንዘ ይነድድ ከመ እሳት ወወረደ ውስተ ሣልስተ እዴሆሙ ለአፍላግ ወለአንቅዕተ ማያት።

¹¹ወስሙ ለውእቱ ኮከብ ዕጉሥታር ወኮነ ዕጉሥታረ ሣልስተ እዴሆሙ ለማያት ምስለ ዐውሎ ወብዙኅ ሰብእ ዘሞተ እምነ ምረሮሙ ለማያት።

¹² ወሶበ ጠቅዐ ራብዕ መልአክ ተቀሥፈት ፀሓይ ወጸልመ ሣልስተ እዴሃ ወሣልስተ እዴሃ ለወርኅ ወሣልስተ እዴሆሙ ለከዋክብት ከመ ኢያብርሁ ወሣልስተ እዴሆሙ ለዕለት ወለሌሊት።

¹³ ወሰማዕኩ አሐዱ ንስር ይሠርር ማእከለ ሰማይ ወምድር ወይብል በዐቢይ ቃል አሌ ሎሙ አሌ ሎሙ ለእለ ይነብሩ ዲበ ምድር እምነ ዘተርፈ ቃለ መጥቅዖሙ ለሠለስቱ መላእክት እለ ሀለዎሙ ይጥቅዑ።