Read gen Gɔ̃mèjèje be Xoma 13 Bible Online

Gɔ̃mèjèje be Xoma 13 - gen bible

Gɔ̃mèjèje be Xoma 13

¹Eye Abràm jo lè Ejiptè yì Nègev, e ye, èsrɔ̃a ku ènu kè kpata lè e sia. Lɔt lè ku do è.

²Abràm ɖo àdɔ̀kùnuwo lè èlãha gomè, lè klòsalò ku sìka gomè.

³E yì sò Nègev, gbɔ̃jɛ̃ lè èmɔ̃a ji kaka va ɖo Betɛ̀l, kaka va ɖo tèpe kè e nɔ̀ sã lè Betɛ̀l ku Aì dòmèa.

⁴Ekè e va ɖo fikè e li vɔsakpe ɖoa, Abràm pò mlã Tɔhonɔ̀ be nyikɔ.

⁵Lɔt, kè kplɔ̀ Abràm do a, cã ɖo ègbɔ ku àlɛ̃wo, ènyìwo ku gòxɔwo cã.

⁶Ànyigbã a mu gbà sù ne woabe hiãhiãwo ɖodu ò, ɖo woabe àdɔ̀kùnuwo sùgbɔ kaka be wo mu gbà teŋu nɔ̀ èdu ò.

⁷Àjrè ɖe va jè Abràm be èlãha ji-kpɔtɔwo ku Lɔt be èlãha ji-kpɔtɔwo dòmè, wàlɛbɛ kè Kanàntɔwo ku Perizìtɔwo lè ànyigbã ji xoxoa,

⁸eye Abràm gblɔ̃ na Lɔt be: “Àjrè mu gbà nɔ̀ ènyè ku èwò dòmè ò, lè àpe èlãha-ji-kpɔtɔ kudo tɔ̀ wòawo dòmè ò: nɔ̀viwo ye mi nyi.

⁹Ànyigbã kpata mu lè ŋùkɔ̀ na wò ò a? Eŋuã klã jo lè ŋuti nyè. Ne wò sɔ èvègo a, mù la yì àpùgo; ne àpùgo ye à, mù la yì èvègo.”

¹⁰Lɔt kɔ ŋùkumè yì ji, kpɔ Yɔrdàn be àgowo kpata ji: funua do àmà, ɖo èsì lè ànyigbã kpata mè. Keŋu gbɔ̀xue Tɔhonɔ̀ la crɔ̃ Sodɔ̀m ku Gòmɔràa, ànyigbã a va kaka Soà, sìgbè Tɔhonɔ̀ be àbɔ mè nène, sìgbè Ejiptè be ànyigbã nène.

¹¹Lɔt cã Yɔrdàn be àgo a kpata na ye ɖokoe eye e sò àxue ɖo èwèzɛ̃pe. Wo mã lè woa nɔ̀nɔwo ŋuti,

¹²Abràm ci Kanàn nyigbã ji eye Lɔt lè Yɔrdàn be àgo be èdùwo mè. Àmè kèa sò àxue kaka va ɖo Sodɔ̀m.

¹³Èdù kè mè tɔwo nyi àmè bàɖà eye wo wɔ̀nà èvuɛ̃ ɖo Tɔhonɔ̀ ŋuti.

¹⁴Tɔhonɔ̀ gblɔ̃ na Abràm, kè Lɔt klã lè e ŋuti vɔ̀a be: “Kɔ ŋùkumè yì ji eye so àfi kè wò lèa, kpɔ èvègo, àpùgo, èwèzɛ̃pe ku èwèɖoxɔ̀pe.

¹⁵Ɛ̃ɛ, ànyigbã kè kpata wò le kpɔa, mù sɔ na wò ku àpo jìjimè kaka sɔ yì.

¹⁶Mù la na àpo jìjimè la jì ɖo e ji sìgbè ànyigbã be hũhũ nène, kaka na be ne wo la teŋu hlɛ̃ ànyigbã be hũhũa, eŋuã wo la hlɛ̃ àpo jìjimè cã.

¹⁷Sitè, gbà zɔ̃ lè ànyigbã ji, ne wòa kpɔ yebe kèkemè ku yebe dìdimè, ɖo mù sɔ na wò.”

¹⁸Abràm so ku yebe gòxɔwo eye be sò àxue ɖo Namirè be lokòtiawo dòmè lè Hebrɔ̀n; e li vɔsakpe ɖèka ɖo funu na Tɔhonɔ̀.