Read gen Gɔ̃mèjèje be Xoma 14 Bible Online

Gɔ̃mèjèje be Xoma 14 - gen bible

Gɔ̃mèjèje be Xoma 14

¹Vɔ̀a, Sinèa be èfìɔ Àmàràfɛ̀l be hùenua, Àriɔk Èlazàr be èfìɔ, Kedòr-Laomà Elàm be èfìɔ ku Tidèal Gòim be èfìɔ

²wo wɔ̀ àhùa ku Berà Sodɔ̀m be èfìɔ, kudo Bìrasà Gòmɔrà be èfìɔ, gbàkudo Sìneav Admà be èfìɔ, ku Semebɛr Sevàim be èfìɔ kudo Belà Soà be èfìɔawo.

³Ekèawo kpata ɖo la bɔ̀ lè Sidìm be bàlìa mè lè àpù vejè kpàa kè wo yɔna be àpù 'kukua' be tèpe.

⁴Wo sumɔ Kèdor-Laomà èpè woèvè, vɔ̀a lè èpè woètɔ̃gɔ̃a mèa, wo sitè ɖo e ŋuti.

⁵Lè èpè woènègɔ̃a mèa, Kèdor-Laomà va ku èfìɔ kèwo bɔ̀ ɖo e ŋutia. Wo ɖù Rèfayitètɔwo ji lè Àsàtarotè-kàrànaim, Zùzitètɔwo ji lè Ham, Èmitètɔwo ji lè Sawè-kìrìataim,

⁶Hòritètɔwo ji lè woabe ètoa ji so Sèir kaka va ɖo Ɛ̀l-Paràm kè gogo zògbè jia.

⁷E yomè a, wo trɔ yì Eiŋ-Mìsapàt lɔ̀ge lè Kadɛ̀s, wo gbã Àmàlɛktɔ kèwo lè Hàsasɔ̀m-Tamàa ŋutɔ cã.

⁸E na be Sodɔ̀m be èfìɔa sitè kplà jè ŋùkɔ̀, eye Gòmɔrà, Admà, Sèvoìm kudo Belà so Soàr be èfìɔwo bɔ̀ ɖo ŋuti. Wo wɔ̀ ɖoɖo sɔ wɔ̀ àhùa ku wo lè Sidìm be bàlìa mè,

⁹sitè ɖo Kèdora-Laomà Elàm be èfìɔ, Tidèal Gòim be èfìɔ, Àmeàrafɛ̀l Sìneàr be èfìɔ, Àriɔk Èlazàr be èfìɔ ŋuti: èfìɔ ènè sitè ɖo àtɔ̃ ŋuti.

¹⁰Sidìm be bàlìa mè kpata nyi àŋɔ̀ vudowo ɖèɖe; lè woabe sisi mèa, Sodɔ̀m ku Gòmɔrà be èfìɔawo jè àŋɔ̀ vudoawo mè, eye àmè kpɔ̀tɛawo si yì èto ji.

¹¹Wo lɔ Sodɔ̀m ku Gòmɔrà be àdɔ̀kùnuwo, woabe ènuɖùɖuwo kpata eye wo jo.

¹²Wo le Lɔt, Abràm be àtàviyɔvia ku yebe àdɔ̀kùnuwo kpata eye wo jo. Lɔt sò àxue ɖo Sodɔ̀m nyigbã ji.

¹³Eye, àmè si àhùa ɖe va ɖè ènyà a na Abràm Hebrùvi a, kè kpɔ̀tɔ̀ lè Namirè be lokòtiwo dòmè, ekè wo yɔna be Àmoritètɔ, Èsokɔ̀l ku Anɛ̀r be nɔ̀vi ŋusù; wo nyi Abràm be xlɔ̃wo.

¹⁴Ekè e sè ènyà be wo le yè nɔ̀vi zè ɖèkaa, e bɔ̀ yebe sumɔ̃vi èkà adrɛ̃ takpo ci woènyi, kèwo wo jì lè ye ŋutɔ be àxomèa. E nyà wo kaka va ɖo Dàn.

¹⁵E ma yebe àmèawo ne bèa xa kɛ̃tɔawo lè èzã mè. E wɔ̀ àhùa ku wo, ɖù woa ji, nyà wo kaka yì ɖo Havà kè lè Dàmaskò be èvègoa.

¹⁶E trɔ xɔ̀ àdɔ̀kùnuwo kpata gbɔ̀. E kplɔ̀ nɔ̀via Lɔt ku yebe àdɔ̀kùnuwo kudo yebe dùkɔ̃a cã gbɔ.

¹⁷Sodɔ̀m be èfìɔ to yì Sawɛ̀ be bàlìa mè, ekè wo yɔna be èfìɔ be bàlìa, ne bèa yì dogò Abràm kè yì ɖù èfìɔ Kèdora-Laomà ku èfìɔ kèwo kplɔ̀ ɛ̀ doawo ji lè àhùa gbe ji trɔ gbãnà.

¹⁸Mɛlkisedɛk, Salɛ̀m be èfìɔa ye na kpɔ̃nɔ ku vɛ̃. E nyi Mawu èji-hũitɔa be hũbonɔ,

¹⁹eye e tu sì na Abràm gblɔ̃ be: “Sìtuɖèɖe e nyi na Abràm to Mawu èji-hũitɔa ji, ekè ɖo jiŋùkusi ku ànyigbã!

²⁰Sìtuɖèɖe ye nyi Mawu èji-hũitɔ̀ kè ɖè 'èkɛ̃tɔ wòwo' do àsi mè na wòa!” Abràm na ɛ̀ ènu kè lè e sia be àkpa èwogɔ̃a.

²¹Sodɔ̀m be èfìɔa gblɔ̃ na Abràm be: “Sɔ àmèawo na mù, eye wòa trɔ sɔ àdɔ̀kùnɔ̀awo.”

²²Abràm ɖo e ŋuti na ɛ̀ be: “Mù kɔ àlɔ̀ nyè ɖoɖa Tɔhonɔ̀a, Mawu èji-hũitɔ kè ɖo jiŋùkusi ku ànyigbã:

²³èkà kui-ɖèka cã, àfɔ̀kpa be èkà ɖekpe ŋutɔ cã! Mù le kã ɖo e ji na wò be nyè mu la sɔ ènu ɖekpe kè nyi tɔ̀ wò ò. Ne mù gbà va gblɔ̃ be ènyè ye na Abràm ɖo àdɔ̀kùnuwo.

²⁴Ènu ɖekpe mu kã mù ò, sɔ wu ɖèkajɛ nyèwo be ènuɖùɖu; ku àmè kèwo kplɔ̀ mù do a: Anɛ̀r, Èsokɔ̀l kudo Namrè ŋutia, wo ŋutɔ wo la xɔ̀ woa tɔ̀.”