Read gen Gɔ̃mèjèje be Xoma 15 Bible Online

Gɔ̃mèjèje be Xoma 15 - gen bible

Gɔ̃mèjèje be Xoma 15

¹Lè ènu kèawo yomè a, Tɔhonɔ̀ be ènyà ɖì na Abràm lè ŋùtègã nukpɔkpɔ mè. E gblɔ̃ be: “Mù gbà vɔ̃ ò, Abràm, ènyè àpo àkpoxɔ̀nua ye; àpo àjɔ̀a la jì ɖo ji kpe è.”

²Abràm ɖo e ŋuti be: “Tɔhonɔ̀ Mawu, nukɛ wò la na mù ò? Mù le yì èvi mà ji, eye àxue nyè be ècrɔ̃ɖùtɔa, Èliezà so Dàmaskò ye.”

³Abràm gblɔ̃ be: “Kpɔ be wò mu na mù jìjimèviwo ò, eye àpe àxomè tɔ ɖèka ɖo la ɖù ècrɔ̃nu nyè.”

⁴Ekèa na be Tɔhonɔ̀ pò nupo na ɛ̀ lè ènyà kèawo mè be: “Mu nyi e ye la nyi àpo ècrɔ̃ɖùtɔ ò, vɔ̀a àmè kè la to lè àpo àdɔ̀mèa ye la nyi àpo ècrɔ̃ɖùtɔ.”

⁵E kplɔ̀ ɛ̀ yì xixenu eye e gblɔ̃ na ɛ̀ be: “Ɖè ŋùku kpɔ jiŋùkusi, hlɛ̃ wètriviwo ne wò la teŋu gbe hlɛ̃ wo kpòa.” E yomè a e gblɔ̃ na ɛ̀ be: “Nène a ye àpo jìjimè la va nɔ̀.”

⁶Abràm ɖo xɔ̀se ɖo Tɔhonɔ̀ ji, eye ɖo eŋuã ŋutia Tɔhonɔ̀ sɔ ɛ̀ sìgbè àmè jɔ̀jɔɛ nène.

⁷E gblɔ̃ na ɛ̀ be: “Ènyè Tɔhonɔ̀ ye ɖè wò to lè Kaldeatɔwo be èdù Ur mè ne ma sɔ ànyigbã kèa na wò.”

⁸Abràm gblɔ̃ be: “Tɔhonɔ̀ Mawu, àleke mù la wɔ̀ sɔ nya be e la va trɔ zũ tɔ̀ nyè ò?”

⁹E gblɔ̃ na ɛ̀ be: “Ji ènyì ènɔvi kè xɔ̀ èpè ètɔ̃a, ègbɔ-nɔ kè xɔ̀ èpè ètɔ̃a, àgbò kè xɔ̀ èpè ètɔ̃a, peplelu ku àhɔ̃ne vi ɖèka va na mù.”

¹⁰Abràm yì ji èlã kèawo kpata va na ɛ̀, e ma woa mè to dòdòmè eye e ɖo wo èvè-èvè, eye àkpa èvèawo kpãŋùkɔ̀ woa nɔ̀nɔwo; mu ma èxè zòzroawo dòmè ò.

¹¹Àklàsuwo pò vàvà ɖo èlã kukuawo, vɔ̀a Abràm nyà wo.

¹²Ekè èwèa le ɖo èxɔ̀a, àkpɔ̃ ɖɔ Abràm. Kpɔɖa vɔ̃vɔ̃ gã ku vìvìti klìkò ɖe ɖɔ ɛ̀.

¹³Tɔhonɔ̀ gblɔ̃ na Abràm be: “Nya nyuɛ̃ ɖe be àpo jìjimè la va nɔ̀ ànyigbã kè mu nyi ye tɔ̀ òa ji. Wo la wɔ̀ ɛ̀ kluvi, wo la zĩ ì ɖoto xɔ̀ èpè èkà èwo.

¹⁴Ne mù ɖo kòjo na dùkɔ̃ kè wo la sumɔa vɔ̀a, eŋuã wo la to jo ku àdɔ̀kùnu gãgãwo.

¹⁵Èwò ya, fàfa mè ye wò la zɔ̃ trɔ yì ètɔwòwo gbɔ eye wo la ɖì wò ne wò ɖù àgbè lè àpo sĩsĩ mè vɔ̀a.

¹⁶Lè jɔ̀jɔmè ènègɔ̃a mèa, àpo jìjimè la trɔ gbɔ̀ va fikèa, ɖo Àmorìtɔwo be vuɛ̃ mu kpɔ ɖo àdɔ̀mèze tèpe ò.”

¹⁷Èwèa ɖo xɔ̀ eye lè vìvìti mèa, kpɔɖa, èzò hɛ̀ ku èzòtiwo to èlã fɛ̃fɛ̃ ɖo èvèawo dòmè.

¹⁸Lè àzã ŋua gbèa, Tɔhonɔ̀ ɖùzò ku Abràm lè ènyà kèawo mè: “Àpo jìjimè ye mù sɔ ànyigbã kèa na, so Ejiptè be ètɔ̀a gbɔ yì ètɔ̀ gãa, Efratà be ètɔ̀a gbɔ.

¹⁹Kènitètɔwo, Kènizìtɔwo, Kàdòmɔnìtɔwo,

²⁰Hitìtɔwo, Perizìtɔwo, Rèfaìtètɔwo,

²¹Àmorìtɔwo, Kanàntɔwo, Gìragasìtɔwo ku Yebusìtɔwo.”