Read gen Gɔ̃mèjèje be Xoma 16 Bible Online

Gɔ̃mèjèje be Xoma 16 - gen bible

Gɔ̃mèjèje be Xoma 16

¹Saraì, Abràm be èsrɔ̃a mu jì èvi na ɛ̀ ò. E ɖo sumɔ̃vi nyɔ̃nù Ejiptètɔ kè wo yɔna be Hagàr,

²eye Saraì gblɔ̃ na Abràm be: “Kpɔɖa Tɔhonɔ̀ tu èmɔ̃ na mù ne ma jì èvi. Yì dɔ̃ ku àpe sumɔ̃via, ta mu nyɔ òa, to e jia, mù la va ɖo ŋusùvi ɖèka.” Abràm ɖoto Saraì be ètopòɖoa.

³Lè èpè èwo yo mè ekè Abràm sò àxue ɖo Kanàn nyigbã ji vɔ̀a, Saraì èsrɔ̃a kplɔ̀ Hagàr, yebe sumɔ̃vi ejiptètɔa, ne bèa sɔ na Abràm sìgbè èsrɔ̃a nène.

⁴E dɔ̃ ku Hagàr ye e fɔfu. Ekè e kpɔ be yè fɔ èfua, yebe àpenɔ̀a mu gbà nyi ènu ɖe lè ŋùmè na ɛ̀ ò.

⁵Saraì gblɔ̃ na Abràm be: “Èzũ kè wo le zũ na mù a kpɔ ŋùkumè na wò. Ènyè ye sɔ àpe sumɔ̃via do èxɔ̀ na wò. Kaka kè e kpɔ be yè fɔfu kpòa, nyè mu gbà nyi ènu ɖe lè yebe ŋùkumè ò. Tɔhonɔ̀ ne wɔ̀ cãcã lè ènyè gbà ku èwò dòmè!”

⁶Abràm ɖo e ŋuti na Saraì be: “Kpɔɖa, sumɔ̃vi nyɔ̃nù wòa lè àpo ŋusɛ̃ gɔ̃mè, wɔ̀ ènu kè nyɔ na wòa ku ì.” Nène a, Saraì do fùnya-fùnya na Agàr kaka e yì sò ci zògbè ji.

⁷Tɔhonɔ̀ be àtikplɔtɔ va kè ɖo e ŋuti lè èsìdo ɖe to lè ègbegbàji, èsìdo kè lè Sur be èmɔ̃ jia,

⁸eye e gblɔ̃ be: “Hagàr, Saraì be sumɔ̃vi nyɔ̃nù, fikɛ wò so eye fikɛ wò le yì ò?” E ɖo e ŋuti be: “Mù si lè àpenɔ̀ nyè Saraì gbɔ.”

⁹Tɔhonɔ̀ be àtikplɔtɔa gblɔ̃ na ɛ̀ be: “Trɔ yì àpenɔ̀ wòa gbɔ ne wòa bɔ̀bɔ̀ ɖo yebe ègbèɖèɖe gɔ̃mè.”

¹⁰Tɔhonɔ̀ be àtikplɔtɔa gblɔ̃ na ɛ̀ be: “Mù la na àpo jìjimè la ji ɖo ji kaka be wo mu la teŋu hlɛ̃ ɛ̀ ò.”

¹¹E gbà gblɔ̃ na ɛ̀ be: “Kpɔɖa wò fɔfu eye wò la jì ŋusùvi, wò la ɖo nyikɔ na ɛ̀ be Ismàɛl, ɖo Tɔhonɔ̀ kpɔ àpo ènuxàxa.

¹²Ŋusùvi kèa la nɔ̀ sìgbè ègbe-sɔ-àkɛtɛ àdodoe nène! Yebe àlɔ̀ la sitè ɖo àmèwo kpata ŋuti eye àmèwo kpata be àlɔ̀wo la sitè ɖo ye ɖèka ŋuti, lè nɔ̀viawo kpata be ŋùmèa, e la nɔ̀ àzɔ̀ge.”

¹³Hagàr pòmlã Tɔhonɔ̀ kè pò nupo na ɛ̀a be nyikɔ be: “Wò nyi Mawu kè le kpɔ mù a.” E gblɔ̃ ŋutɔ be: “Fikèa ye mù kpɔ wàlɛbɛ kè e kpɔ mù a?”

¹⁴Ènu kè ŋuti wo yɔna vudoa be: “Làhaì kè kpɔ mù a be vudo”; vudo kèa lè Kadɛ̀s ku Berɛ̀d dòmè.

¹⁵Hagàr jì èvi ŋusù na Abràm; e ɖo na ɛ̀ be Ismàɛl ŋusùvi kè Hagàr na ɛ̀a.

¹⁶Abràm ɖo èpè èkà èvè ci àdɛ̃ wàlɛbɛ kè Hagàr na ɛ̀ Ismàɛl.