Read gen Gɔ̃mèjèje be Xoma 2 Bible Online

Gɔ̃mèjèje be Xoma 2 - gen bible

Gɔ̃mèjèje be Xoma 2

¹Nène a ye wo ɖo jiŋùkusi, ànyigbã ku woabe emènuwo kpata yeŋu.

²Mawu ɖo àsitè na yebe èdɔa lè ŋùkèkè adrɛ̃gɔ̃ a gbè. E ɖo àsitè lè ŋùkèkè adrɛ̃gɔ̃ a gbè.

³Mawu tu sì na ŋùkèkè adrɛ̃gɔ̃ a eye e kɔ̀ e ŋuti, ɖo ŋùkèkè ŋua ye Mawu sɔ gbɔ̃jɛ̃ lè yebe èdɔ kèwo kpata be wɔ̀a mè.

⁴Nène a ye nyi ànyigbã ku jiŋùkusi be gɔ̃mèjèje wàlɛbɛ kè Mawu ɖo wo lè woabe dɛnua.

⁵Àgblèji be àti ɖekpekpe mu lè ànyigbã ji ò, eye ègbe ɖekpekpe cã mu mìɔ̃ ɖo e ji ò, ɖo Tɔhonɔ̀ Mawu mu na èji jà ɖo ànyigbã ji hàɖe ò. Eye àmè ɖe mu lè la dè ànyigbã ò.

⁶Vɔ̀a, èsì ɖe to so ànyigbã mè, eye e gbã ɖo ànyigbã kpata be ŋùkumè.

⁷Tɔhonɔ̀ Mawu sɔ ànyikɔ sɔ mè àmè. E gbɔ̃ àgbè gbɔ̃gbɔ̃ ɖo yebe ŋɔ̀tiwo mè, eye àmèa trɔ zũ àgbètɔ.

⁸Tɔhonɔ̀ Mawu sò àbɔ ɖe ɖo Edɛ̀n, lè èwèzɛ̃pe, eye e sɔ àmè kè e mèa do e mè.

⁹Tɔhonɔ̀ Mawu na àti kèwo nya kpɔ eye woabe èkusɛ̃sɛ̃wo nyɔ ne woa ɖù a, to so ànyigbã mè. Nène a ye àti kè nana àgbèa, mìɔ̃ lè àbɔ a be dòdòmè, ku àti kè nana wo nyana èvuɛ̃ ku ènyuɛ̃ cã mìɔ̃.

¹⁰Ètɔ̀ sàsra ɖe to so Edɛ̀n ne bèa sɔ wusì àbɔ a, eye so funua ètɔ̀a mã ɖo àkpa ènè.

¹¹Àlɔ̀zɛ̃ cucugbã be nyikɔ ye nyi Picɔ̀n. E ye nyi ètɔ̀ kè pòhla do Havilà be èdùa kpata, àfi kè wo ɖènà sìka lèa.

¹²Sìka kèa ɖo àsìxɔ̀xɔ gã ɖe sìgbè Bdelìum ku Ɔ̀nix-kpe nène.

¹³Àlɔ̀zɛ̃ èvègɔ̃a tɔ̀ Gihɔ̀n; e ye pòhla do Kucè be èdùa.

¹⁴Àlɔ̀zɛ̃ ètɔ̃gɔ̃a ye nyi Hidekɛ̀l. E ye srànà le Àsirìa be èwèzɛ̃pe. Àlɔ̀zɛ̃ ènègɔ̃a ye nyi Efratà.

¹⁵Tɔhonɔ̀ Mawu sɔ àmè kè be mèa ɖo Edɛ̀n be àbɔ a mè ne bèa dè è, gbà kpɔ e ji.

¹⁶Tɔhonɔ̀ Mawu do èse na àmèa, gblɔ̃ be: “Wò teŋu ɖù àti ɖekpekpe kè lè àbɔ a mèa be èkusɛ̃sɛ̃ fàa,

¹⁷vɔ̀a, mù gbà ɖù àti kè nana wo nyana èvuɛ̃ ku ènyuɛ̃ be èkusɛ̃sɛ̃ ò, ɖo gbè kè gbè wò la dù ìa, wò la ku.”

¹⁸Tɔhonɔ̀ Mawu be: “Mu nyɔ be àmè ɖèka bèa nɔ̀ ànyi ò. Mù la wɔ̀ kpeɖoŋutɔ na ɛ̀.”

¹⁹Tɔhonɔ̀ Mawu sɔ ànyikɔ mè ègbemèlãwo kpata ku àyamè xèviwo eye e kplɔ̀ wo va àmèa gbɔ ne Mawu bèa kpɔ àlekè àmèa la yɔ wo ɖoa, ne ènu àgbèagbe kèawo woa ɖo nyikɔ kè àmèa la yɔ na woa.

²⁰Eye àmèa ɖo nyikɔ na àxomèlãwo kpata, àyamè xèviwo ku ègbemèlãwo kpata, vɔ̀a, ye ŋutɔ ya mu kpɔ kpeɖoŋutɔ ɖekpekpe kè ɖo yebe nɔ̀nɔmè ò.

²¹Eye Tɔhonɔ̀ Mawu na àmèa dɔ̃ àlɔ̃ yì emè; eye e ɖè yebe àhàdaputi ɖèka, trɔ sɔ èlã ɖo ye tèpe.

²²Tɔhonɔ̀ Mawu wɔ̀ nyɔ̃nù ku àhàdaputi kè e ɖè lè àmèa ŋutia, eye e kplɔ̀ ɛ̀ va e gbɔ.

²³Eye àmèa gblɔ̃ be: “Fifìa ekèa ye nyi èpu so èpu nyèwo mè, ŋutilã nyè be ŋutilã. Eye wo la yɔ àmè kèa be nyɔ̃nù, ɖo wo ɖè è to lè ŋusù mè.”

²⁴Ekèa ŋuti ye ŋusù la gble ètɔa ku ènɔa ɖɛ, la tɛ ɖo èsrɔ̃a ŋuti, ye wo àmè èvèa la trɔ zũ ŋutilã ɖèka.

²⁵Eye wo àmè èvèa lè àma-àma, ŋusùa ku nyɔ̃nùa eye èŋù mu kpɛ̃nà wo ò.