Read gen Gɔ̃mèjèje be Xoma 21 Bible Online

Gɔ̃mèjèje be Xoma 21 - gen bible

Gɔ̃mèjèje be Xoma 21

¹Tɔhonɔ̀ ɖo ŋùku àjɔ̀gbè kè e fìã na Saràa ji eye e wɔ̀ ɛ̀ na Sarà sìgbè àlekè e gblɔ̃a nène.

²E fɔfu eye e jì èvi ŋusù na Abràham lè yebe nyagãkuku mè lè àzã kè ye Mawu gblɔ̃ na ɛ̀a ji.

³Abràham yɔ ŋusùvi kè Sarà jì na ɛ̀a be nyikɔ be Izàk.

⁴E sò èvo na èvia Izàk lè ŋùkèkè ènyi gbè sìgbè àlekè Mawu ɖo è ɖɛ na ɛ̀a nène.

⁵Abràham xɔ̀ èpè èkà èvè takpo wàlɛbɛ kè wo jì èvia Izàk na ɛ̀a.

⁶Sarà do àpa be: “Mawu na mù ènu kòkoe be èvi! Ɖo mù la ɖì kòkoe na àmè sia àmè kè la sè ènyà kèa.”

⁷E yì e ji gblɔ̃ be: “Àmè kɛ teŋu gblɔ̃ na Abràham be Sarà la va na ànɔ èvi ò? Eye mù jì ŋusùvi lè yebe tɔgbekuku mè!”

⁸Ɖèvia le sĩ eye wo xɔ̀ ànɔ lè e si. Abràham ɖù àzã gã ɖe lè ŋùkèkè kè ji wo xɔ̀ ànɔ lè Izàk sia.

⁹Ekè Sarà kpɔ be Ejiptè nyɔ̃nù Hagàr be èvi ŋusù kè e jì na Abràham yè srɔ̃a, le gble ku Izàk yèbe èvia,

¹⁰e gblɔ̃ na Abràham be: “Nyà sumɔ̃vi nyɔ̃nù nyèa ku èvia ŋusùa, ɖo sumɔ̃vi nyè kèa be èvi ŋusù mu la ɖùcrɔ̃ ku èvi nyè Izàk ò.”

¹¹Ènyà kèa ve Abràham ŋuti ŋutɔ ɖo èvia ŋusù ke e cã nyi.

¹²Vɔ̀a, Mawu gblɔ̃ na ɛ̀ be: “Mù gbà bijì ɖo èvi wò ku sumɔ̃vi wò nyɔ̃nùa be ènyà ŋuti ò. Ɖoto èsrɔ̃ wò Sarà be ègbè, ɖo, to Izàk ji ye jìjimèwo la xɔ̀ àpo nyikɔ.

¹³Vɔ̀, mù la na dùkɔ̃wo la to so sumɔ̃vi nyɔ̃nù wòa be èvi ŋusùa cã mè, ɖo àpo jìjimèvi ye be nyi.”

¹⁴Abràham fɔ̃ ŋùdekɛ̃nyɛ fùtù, sɔ kpɔ̃nɔ, kù èsì ɖo èlãgbàzegò mè, sɔ na Hagàr. E kɔ èvia Ismàɛl dà ɖo àbɔta na ɛ̀ eye be nyà ɛ̀ to. E jè ègbe, le dã lè Bɛr-Sevà be zògbè ji.

¹⁵Wàlɛbɛ kè ye èsìa vɔ̀ lè èlãgbàzegoa mèa, e sɔ ɖèvia dà ɖo àti ɖe gɔ̃mè.

¹⁶E yomè a, e yì nɔ̀ ànyi lè àzɔ̀ge boo, sìgbè èhuãvi dàda ɖèka be dìdimè nène. Eye be gblɔ̃ be: “Mù gbà jro ne ma kpɔ ɖèvi a be èku tèpe ò!” E nɔ̀ ànyi lè àzɔ̀ge eye be kɔ ègbè yì ji, fã àvi.

¹⁷Mawu sè ɖèvia be ègbè eye, so jiŋùkusia, Mawu be àtikplɔtɔa yɔ Hagàr. E gblɔ̃ na ɛ̀ be: “Nukɛ ye le wɔ̀ wò Hagàr? Mù gbà vɔ̃ ò, ɖo Mawu sè ɖèvia be ègbè, lè àfi kè be lèa.

¹⁸Sitè! Yì kɔkɔ ɖèvia, ne wòa le yebe àlɔ̀tinu, ɖo dùkɔ̃ gã ɖe la to so e mè.”

¹⁹Mawu hũ ŋùkuviwo na ɛ̀ eye e kpɔ vudo ɖe kè mè èsì lèa. E yì kù èsìa, ɖɔ èlãgbàzegoa eye e na ɖèvia be nù.

²⁰Mawu nɔ̀ ku ɖèvia be sĩ eye e sò àxue ɖo zògbè ji. E trɔ zũ èhuãvidàtɔ;

²¹e sò àxue ɖo Paràn be zògbè ji eye ènɔa ɖè Ejiptè nyɔ̃nù na ɛ̀.

²²Vɔ̀a lè gà ŋua mè kea, èfìɔ Abimèlɛk ku Pikɔ̀l, yebe àhùakɔ̃ be ga, gblɔ̃ na Abràham be: “Mawu lè ku wò lè ènu kè wò le wɔ̀a kpata mè.

²³Tà Mawu na mù, lè fikè fifì, be yè mu la blè nyè ŋutɔ, èvi nyèwo ku jìjimèvi-nyèwo ò: be wò ɖo la ɖo lɔ̃lɔ̃ ɖèka ŋùku mè na mù ku ànyigbã kè ji wò lèa sìgbè àlekè mù lɔ̃ wòa nène.”

²⁴Abràham ɖo e ŋuti be: “Mù tà ɛ̀.”

²⁵Abràham sɔ ènyà na Abimèlɛk ɖo vudo kè yebe sumɔ̃vi ŋusùwo xɔ̀ lè èsìa ŋuti.

²⁶Abimèlɛk do àpa be: “Nyè mu nya àmè kè wɔ̀ ènu kèa ò; wò mu na mù nya tètè ò eye nyè ŋutɔ cã nyè mu sè kpɔ kaka va na egbè ò.”

²⁷Abràham sɔ àlɛ̃wo ku ènyìwo sɔ na Abimèlɛk eye wo àmè èvèa, wo ɖùzò.

²⁸Abràham ɖè àlɛ̃nɔvi adrɛ̃ ɖovò lè èlãwo dòmè.

²⁹Abimèlɛk gblɔ̃ na Abràham be: “Nukɛ ye àlɛ̃nɔvi adrɛ̃ kèwo wò ɖe ɖovòa, la wɔ̀ lè fikè ò?”

³⁰E ɖo e ŋuti be: “Ne wòa xɔ̀ àlɛ̃ nɔvi adrɛ̃awo lè àlɔ̀ nyè mè. Wo la nyi ɖase na mù be ènyè ye ɖè vudo kèa.”

³¹Ènu kè ŋuti ye wo yɔna funua be Bɛr-Sevà, ɖo funua ye wo àmè èvèa wo kã àtãŋu lè.

³²Wo ɖùzò lè Bɛr-Sevà. Abimèlɛk sitè e ye ku Pikɔ̀l yebe àhùakɔ̃a be ga, e trɔ yì Filistìtɔwo be ànyigbã ji.

³³Abràham do àtikusɛ̃sɛ̃wo ɖo Bɛr-Sevà àfi kè be mlã Tɔhonɔ̀ Mawu kòkòɖàbìa be nyikɔ lèa.

³⁴Abràham nɔ Filistìtɔwo be ànyigbã ji xɔ̀ àzã sùgbɔ.