Read gen Gɔ̃mèjèje be Xoma 22 Bible Online

Gɔ̃mèjèje be Xoma 22 - gen bible

Gɔ̃mèjèje be Xoma 22

¹Vɔ̀ lè ènyà kèawo yomè a, Mawu do Abràham kpɔ eye e gblɔ̃ na ɛ̀ be: “Abràham”; e ɖo e ŋuti be: “Ènyè ye kè”.

²E yì e ji gblɔ̃ be: “Sɔ èvi wò ŋusù àkòŋùgòvia, Izàk, kè wò lɔ̃a. Jè èmɔ̃ yì Mɔ̀rijà nyigbã ji eye funua, sɔ ɛ̀ savɔ lè èto kèwo dòmètɔ mù la fiɔ àsi na wòa ji.”

³Abràham fɔ̃ ŋùdekɛ̃nyɛ fùtù, bla àgbã na yebe èsɔ àkɛtɛa, kplɔ̀ yebe sumɔ̃vi èvè ku èvia ŋusù Izàk ɖo àsi. E ji ànakè kè e la sɔ wɔ̀ vɔsaa. E so jè èmɔ̃ tùtà àfi kè Mawu fiɔ àsi na ɛ̀a.

⁴Lè ŋùkèkè ètɔ̃ gbèa, e kɔ ŋùkumè yì ji eye e kpɔ tèpea ɖoɖa lè dìdìpe boo.

⁵Abràham gblɔ̃ na yebe sumɔ̃viawo (èvèawo) be: “Mì nɔ̀ fikè kpɔ mi, mìa ku èsɔ àkɛtɛa; ne ènyè ŋutɔ kudo ɖèkajɛvi nyèa, mia yì sumɔ lè ètoa ji; e yomè a mi la trɔ va mìa gbɔ.”

⁶Abràham sɔ ànakèa, dro è na èvia Izàk; e sɔ èzòdonua ku kàkla ɖo àsi, eye wo àmè èvèa wo jè èmɔ̃.

⁷Izàk pò nupo na ètɔa Abràham. E gblɔ̃ be: “Ètɔ nyè!”, Eye Abràham ɖo e ŋuti be: “Ènyè ye kè èvi nyè.” E yì e ji gblɔ̃ be: “Kpɔɖa, èzòdonua ku ànakèa yekè, fikɛ vɔsa be àlɛ̃via ya ɖe?”

⁸Abràham ɖo e ŋuti be: “Èvi nyè, Mawu la na vɔsa mème be àlɛ̃via.” Wo àmè èvèawo gbà le èmɔ̃ yì.

⁹Wàlɛbɛ kè wo ɖo tèpe kè Mawu fiɔ àsi na ɛ̀a, Abràham ɖo vɔsakpe eye e sɔ ànakèa ɖo vɔsakpea ji. E bla èvia Izàk, sɔ ɛ̀ dà ɖo ànakèa ji lè vɔsakpea ji.

¹⁰Abràham drɛ̃ àlɔ̀ la sɔ kàkla sɔ sò èkɔ̀ na èvia ŋusùa.

¹¹Eye, Tɔhonɔ̀ be àtikplɔtɔa do àpa, yɔ ɛ̀ so jiŋùkusi be: “Abràham! Abràham!” E ɖo e ŋuti be: “Ènyè yekè.”

¹²E yì e ji gblɔ̃ be: “Mù gbà tɔ àsi ɖèkajɛvia ò. Mù gbà wɔ̀ ènu ɖekpe na ɛ̀ ò, ɖo fifìa mù nya be wò vɔ̃na Mawu, èwò kè mu hlùɛ̃ àkòŋùgòvi wòa be àgbè ɖo ŋuti nyè òa.

¹³Abràham kɔ ŋùkumè yì ji, kpɔɖa e kpɔ àgbò ɖèka kè be àzòwo jã ɖo àve viɖe mè. E yì le è, sɔ wɔ̀ ènumème vɔsa ɖo èvia tèpe.

¹⁴Abràham ɖo nyikɔ na tèpe kèa be: “Tɔhonɔ̀ le kpɔ ènuwo keŋu”; eye ŋuti wo gblɔ̃nà egbè egbè be: “Èto kèa ji ye Tɔhonɔ̀ ɖè ye ɖokoe fìɔ lè.”

¹⁵Tɔhonɔ̀ be àtikplɔtɔa gbà yɔ Abràham zè èvègɔ̃a so jiŋùkusi

¹⁶eye e gblɔ̃ be: “Mù tà ɖokoe nyè na wò, Tɔhonɔ̀ ye gblɔ̃ ɛ̀. Kè wò dojì wɔ̀ ènu kèa eye wò mu hlùɛ̃ àkòŋùgòvi wòa be àgbè òa,

¹⁷mù ɖo e be ma tu sì na wò, eye mù la na jìjimèvi wòwo la jì ɖo ji fuu, sìgbè jiŋùkusi wètriviwo ku àpùtà-kɔkuiwo nène. Àpo jìjimèviwo la xɔ̀ woabe èkɛ̃tɔwo be èdù;

¹⁸eye woa mè ye wo la tu sì na ànyigbã ji dùkɔ̃wo kpata lè, ɖo wò ɖoto àpe ègbè.”

¹⁹Abràham trɔ va yebe sumɔ̃viawo gbɔ; wo sitè eye woa kpata wo le èmɔ̃ trɔ yì Bɛr-Sevà. Abràham nɔ̀ Bɛr-Sevà.

²⁰Lè ènyà kèawo yomè a, wo gblɔ̃ na Abràham be: “Kpɔɖa, Milkà cã jì ŋusùviwo na nɔ̀vi wò ŋusù Nàhɔr:

²¹ŋusùvi àmègãxoa nyi Usè, e yomètɔ̀a nyi Buzè, eye Kemùɛl nyi Aràm be ètɔ,

²²Kesɛ̀d, Hazò; Pìladàs; Yìdalàf ku Betùɛl.”

²³Betùɛl ji Rebekà. Woawo ye nyi èvi ŋusù ènyi kèwo Milkà jì na Nàhɔr, Abràham be nɔ̀vi ŋusùa.

²⁴Milkà be àsusì, kè wo yɔna be Rèumà cã jì èviwo: Tevàh, Gàham, Tahàs ku Maakà.