Read gen Gɔ̃mèjèje be Xoma 26 Bible Online

Gɔ̃mèjèje be Xoma 26 - gen bible

Gɔ̃mèjèje be Xoma 26

¹Àdɔ̀ ɖe va to lè èdùa mè kè tovò na cucugbãtɔ̀ kè jɔ̀ lè Abràham be hùenua. Izàk jo yì Abimèlɛk, Filistìtɔwo be èfìɔa gbɔ lè Geràr.

²Tɔhonɔ̀ ze ɖo e ji eye e gblɔ̃ na ɛ̀ be: “Mù gbà yì Ejiptè ò, vɔ̀ nɔ̀ èdù kè ma fiɔ àsi na wòa mè.

³Yì nɔ̀ èdù ŋua mè, mù la nɔ̀ ku wò eye mù la tu sì na wò. Nyàwo mù la sɔ ànyigbã kèa na èwò ku àpo jìjimèviwo eye mù la wɔ̀ ɖo àjɔ̀gbè kè mù fìã na ètɔ wò Abràham a ji.

⁴Mù la na àpo jìjimè la jì ɖo ji sìgbè jiŋùkusi wètriviwo nène, mù la sɔ ànyigbã kèawo kpata na ɛ̀ eye dùkɔ̃wo kpata la kpɔ sìtu so e mè,

⁵ɖo Abràham ɖoto àpe ègbè eye e le ŋùku ɖo àpe ɖoɖo, ènufiɔàmèwo ku èse nyèwo ŋuti.”

⁶Izàk sò àxue ɖo Geràr.

⁷Èdùamètɔwo biɔ ènyà so èsrɔ̃a ŋuti. E ɖo e ŋuti be: “Nɔ̀vi nyè nyɔ̃nù ye.” Ɖo e le vɔ̃ àmè kèwo lè funua be ne yè gblɔ̃ be yè srɔ̃ ye à, wo la wù yè ɖo Rebekà jè tùgbɛ̀jɛ eye e nya kpɔ ŋutɔ.

⁸E nɔ̀ funua dìdìɖe eye gbè ɖèka kè ye Filistìtɔwo be èfìɔ Abimèlɛk le kpɔ ènu to flɛsɛ̀ toa, e kpɔ be Izàk le gble ku èsrɔ̃a Rebekà.

⁹Abimèlɛk na wo yɔ Izàk va na ɛ̀ eye e gblɔ̃ na ɛ̀ be: “E lè e mè tutu be e nyi èsrɔ̃ wò! Nukɛ ŋuti ye wò gblɔ̃ be: “Nɔ̀vi nyè nyɔ̃nù ye ò?” Izàk ɖo e ŋuti na ɛ̀ be: “Mù gblɔ̃ ɛ̀, ɖo mù le vɔ̃ be wo la wù mù ɖo e ŋuti.”

¹⁰Abimèlɛk yì e ji be: “Nukɛ ye wò wɔ̀ ku mi leke ò! E kpɔ̀tɔ̀ viɖe ne ŋusù ɖe bèa dɔ̃ ku èsrɔ̃ wòa ne wòa sɔ mi wɔ̀ àgɔ̀jètɔ.”

¹¹Abimèlɛk do èse kèa na dùkɔ̃a be: “Àmè ɖekpekpe àmè kè la tɔ àsi ŋusù kèa ku èsrɔ̃a la jè na èku.”

¹²Izàk do ènuwo ɖo ànyigbã kèa ji eye e yà ènuwo lè èpè ŋua mè, nukua jì ɖo e ji tèpe kàvè takpo sɔ̃ŋu, ɖo Tɔhonɔ̀ tu sì na ɛ̀.

¹³Eye e trɔ àmè ŋùkuta ɖèka; ènu nɔ̀ àmèsiwo le sùgbɔ na ɛ̀ kaka va ɖo àdɔ̀kùnɔ̀wo be nɔ̀nɔmè.

¹⁴E va trɔ èlãkpa gã ɖe be àpetɔ, eye èlãwo ku ènyìwo lè e si gbàkudo sumɔ̃vi (kluvi) sùgbɔwo. Eye ŋuhuã ɖo Filistìtɔwo mè,

¹⁵wo sitè ɖo Izàk be ètɔ be sumɔ̃viwo be vudo kèwo wo ɖìa ŋuti, lè ètɔa Abràham be hùenua, eye wo lɔ èkɔ tu wo kpata.

¹⁶Abimèlɛk gblɔ̃ na Izàk be: “Jo lè mia gbɔ boo, ɖo wò trɔ zũ àmè kè ɖo ŋusɛ̃ ŋutɔa wu mi.”

¹⁷Izàk jo lè funua yì sò kɔpe ɖo Geràr be bàlìmè eye be nɔ̀ funua.

¹⁸Izàk trɔ kù vudo kèwo wo kù lè ètɔa Abràham be hùenu eye Filistìtɔwo tu lè Abràham be ku yomè a. E trɔ ɖo nyikɔ kèwo ètɔa ɖo na wo sã na wo.

¹⁹Izàk be sumɔ̃viwo le kù bàlìamè eye wo kè ɖo èsì nyuɛ̃ be vudo ɖe ŋuti.

²⁰Geràr be àlɛ̃kplɔ̀tɔwo sitè ɖo Izàk be àlɛ̃kplɔ̀tɔwo ŋuti gblɔ̃ na wo be: “Èsì kèawo nyi mia tɔ̀.” E yɔ vudo kèa be Esɛ̀k ɖo funua ye wo ɖù e ji lè.

²¹Wo gbà kù vudo bu ekè ŋuti wo gbà sitè ɖoa; e ɖo nyikɔ na ɛ̀ be Sìtanà.

²²Lè funua, e jo yì kù vudo bu ekè ŋuti wo mu gbà sitè ɖo òa eye e yɔ ɛ̀ be Rèhobɔ̀t gblɔ̃ be “Fifìa ye Tɔhonɔ̀ na mù vòvo tèpe eye mù kpɔ ànyigbã be kusɛ̃sɛ̃wo.”

²³So funua, e jo yì Ber-Sevà.

²⁴Tɔhonɔ̀ ze ɖo ji èzã ŋua mè ke gblɔ̃ na ɛ̀ be: “Mù nyi Abràham ètɔ wò be Mawu mù gbà vɔ̃ ò, ɖo mù lè ku wò. Mù la tu sì na wò eye mù la na àpo jìjimè la ji ɖo ji drì, ɖo àpe sumɔ̃vi Abràham ŋuti.”

²⁵Funua, Izàk li vɔsakpe ɖo eye e mlã Tɔhonɔ̀ be nyikɔ. E tù yebe gòxɔ ɖo funu eye yebe sumɔ̃viwo kù vudo ɖèka.

²⁶Abimèlɛk so lè Geràr ku yebe ètopòɖotɔ Àhuzàt gbàkudo Pikɔ̀l yebe àhùaga.

²⁷Izàk gblɔ̃ na wo be: “Nukɛ ŋuti mì va gbɔ nyè ò? Mì crì àpe ènyà, eye mì nyà mù to.”

²⁸Wo ɖo e ŋuti be: “Mi kpɔ ɛ̀ jèsi be Tɔhonɔ̀ lè ku wò eye mi gblɔ̃ lè mia nɔ̀nɔwo dòmè be: “Àtãŋu kãkã ɖo la nɔ̀ àkpa èvèa kpata, lè èwò ku mia dòmè; ne mia ɖùzò ku wò!”

²⁹Eŋuã, tanu be yè mu la wɔ̀ ènu bàɖà ɖe ku mi ò, nènea ke mia cã mi mu la wɔ̀ èvuɛ̃ ɖe na wò sìgbè àlekè ènyuɛ̃ kpò ye mi wɔ̀ na wò kaka va na fifì eye mi ɖè wò to lè èdùa mè ye àfi ɖekpe mu kã na wòa, èwò kè nyi Tɔhonɔ̀ be sìtume fifìa.”

³⁰E wɔ̀ ènuɖùɖu na wo, wo ɖù gbà nù,

³¹wo fɔ̃ ŋùdekɛ̃nyɛ fùtù, eye àmè sia àmè kã àtãŋu na nɔ̀via. Izàk yì ɖo wo eye wo jo lè e gbɔ lè fàfa mè.

³²Vɔ̀ lè ŋùkèkè ŋua ji ke ye Izàk be sumɔ̃viwo gbɔ̀ va ɖo àkɔ̃ŋùta na ɛ̀ so vudo yeye kè wo kùawo ŋuti. Wo gblɔ̃ na ɛ̀ be: “Mi kpɔ èsì!”

³³E ɖo nyikɔ na vudo kèa be Sivà; ènu kè ŋuti ye egbè egbèa èdù a be nyikɔ kpɔ̀tɔ̀ nyi Bɛr-Sevà, e be gɔ̃mè ye nyi “Àtãŋukãkã be vudo”.

³⁴Esaò xɔ̀ èpè èkà wàlɛbɛ kè be ɖè Yehudì, Hitìtɔ Berì be vi nyɔ̃nù, ku Basmàt Elɔ̀n Hitìtɔa be vi nyɔ̃nù.

³⁵Nyɔ̃nùvi èvè kèawo xɛ̃ tukaɖa sùgbɔ va Izàk ku Rebekà be àgbè mè.