Read gen Gɔ̃mèjèje be Xoma 27 Bible Online

Gɔ̃mèjèje be Xoma 27 - gen bible

Gɔ̃mèjèje be Xoma 27

¹Izàk sĩ, ku tɔgbe, yebe ŋùkuviwo ji cɔ̃ eye mu gbà le kpɔnu ò. E yɔ èvia àmègãxotɔa Esaò eye e gblɔ̃ na ɛ̀ be: “Èvi nyè ŋusù!” E ɖo e ŋuti be: “Ènyè ye kè!”

²E yì e ji be: “Wò kpɔ be mù sĩ, ku tɔgbe eye nyè mu nya gbè kè gbè mù la ku ò.

³Gàmè sù ne wòa sɔ àdègbe yìyi be ènu wòa kpla, àŋùti be àkpò ku àŋùdàti wòa; ne wòa yì àgblèta eye wòa dà àdè, wù èlã na mù.

⁴Wòa ɖà nuɖùɖu kè jɔ̀nàjì na mù a, wòa sɔ ɛ̀ va na mù eye ne mù ɖù ì vɔ̀a, mù la tu sì na wò gbɔ̀xue ne ma ku.”

⁵Rebekà le sè gàkèmè Izàk le pò nupo na èvia Esaò ŋusùa. Esaò yì dà àdè lè àgblèta ne bèa wù èlã.

⁶Rebekà gblɔ̃ na Yakɔb èvia be: “Kpɔ mù sè ètɔ wò pò nupo na Esaò fòfo wò. E gblɔ̃ na ɛ̀ be:

⁷“Yì wù àdè-lã va na mù ne wòa ɖà nuɖùɖu na mù ne mà-ɖù. Mù la tu sì na wò lè Tɔhonɔ̀ be ŋùkɔ̀ gbɔ̀xue la ku.”

⁸Fifìa, èvi nyè, ɖoto mù eye wòa wɔ̀ ènu kè mù ɖo na wòa:

⁹Yì èlãkpa mè ne wòa le àlɛ̃nɔvi nyuɛ̃ èvè, eye mù la ɖà ènu na ètɔ wò, sìgbè àlekè e jɔ̀nàjì na ɛ̀a.

¹⁰Wò la sɔ ɛ̀ yì na ètɔ wò, eye e la ɖù ì sɔ tu sì na wò gbɔ̀xue la ku.”

¹¹Yakɔb ɖo e ŋuti na Rebekà ènɔa be: “Vɔ̀, Esaò fòfo nyèa, èfume be nyi, nyè ya nyè mu to èfu ò.

¹²E teŋu va e mè be ètɔ nyè la lìlì àsi ŋuti nyè kpɔ eye e la sɔ mù sìgbè àjèɖàtɔ nène. Mù la hɛ̃ kpɛ̃sɛ̃ va ɖokoe nyè ji ɖo sìtu tèpe.”

¹³Ènɔa gblɔ̃ na ɛ̀ be: “Kpɛ̃sɛ̃ wòa ne va ji nyè. Ào èvi nyè, ɖoto mù kpò, yì wɔ̀ ènu kè mù gblɔ̃ na wòa.”

¹⁴E yì le àlɛ̃nɔvi èvèawo va na ènɔa eye be ɖà nuɖùɖu kè jɔ̀nàjì na ètɔa.

¹⁵Rebekà sɔ Esaò èvia ŋusù àmègãxotɔa be àwùwo, àwù kèwo xɔ̀ àsì ye wo lè e gbɔa, e sɔ wo do na Yakɔb èvia vifɛ̃a.

¹⁶E sɔ àlɛ̃ gbàze tre ɖo Yakɔb be àlɔ̀wo ku yebe èkɔ̀ àfi kè èfu ɖekpe mu lè òa.

¹⁷E sɔ nuɖùɖu kè be ɖà ku kpɔ̃nɔ, dà ɖo èvia Yakɔb be àlɔ̀wo mè.

¹⁸Eye e yì ètɔa gbɔ, gblɔ̃ be: “Ètɔ nyè!” E ɖo e ŋuti be: “Ènyè yekè; àmè kɛ wò nyi ò, èvi nyè?”

¹⁹Yakɔb gblɔ̃ na ètɔa be: “Èvi wò àmègãxo Esaò ye mù nyi. Mù wɔ̀ ènu kè wò gblɔ̃ na mù a vɔ̀. Sitè, tɔ̀ wò jɔ̀, nɔ̀ ànyi eye wòa ɖù àdèlã nyèa ne wò ŋutɔ wòa tu sì na mù.”

²⁰Izàk ɖo e ŋuti na èvia be: “Èvi nyè, wò kpɔ èlã wù kaba ŋutɔ ɛ?” E gblɔ̃ be: “Tɔhonɔ̀ àpo Mawu a ye kpe ɖo ŋuti nyè.”

²¹Eye Izàk gblɔ̃ na Yakɔb be: “Tètè gogo mù nyuɛ̃ ɖe èvi nyè, ne ma lìlì àsi ŋuti wò. Èwò ye nyi èvi nyè Esaò tutua?”

²²Yakɔb dɔ̃ gogo Izàk ètɔa eye be lìlì àsi ye ŋuti gblɔ̃ be: “Ègbèa nyi Yakɔb be ègbè, vɔ̀a àlɔ̀awo ya nyi Esaò tɔ̀.”

²³Mu kpɔ ɛ̀ do jèsi ò, ɖo èfu lè yebe àlɔ̀wo ŋuti sìgbè fòfoa Esaò tɔ̀ nène; eye e tu sì na ɛ̀.

²⁴E gblɔ̃ na ɛ̀ be: “Èwò ye nyi èvi nyè Esaò tutua?” E ɖo e ŋuti be: “Ènyè ye!”

²⁵E yì e ji be: “Èvi nyè, wɔ̀ nuɖùɖua na mù, ne mà-ɖù àdè-lã eye ne nyè ŋutɔ ma tu sì na wò.” Yakɔb wɔ̀ nuɖùɖua na ɛ̀ eye e ɖùnu; e sɔ vɛ̃ va na ɛ̀ eye be nù.

²⁶Funua ye ètɔa Izàk gblɔ̃ na ɛ̀ be: “Tètè va gbɔ nyè èvi nyè ne wòa fã mù.”

²⁷E tètè gogo è eye be fã ɛ̀. Izàk sè yebe àwùawo be huɛ̃huɛ̃ eye be tu sì na ɛ̀ gblɔ̃ be: “O! Èvi nyè be huɛ̃huɛ̃ lè sìgbè àgblè kè Tɔhonɔ̀ tu sì na be huɛ̃huɛ̃ nène.

²⁸Mawu ne na wò jiŋùkusi be àhũ jàja ku ànyigbã nyuɛ̃wo, èlù kudo vɛ̃ lè gbɔsùsu mè!

²⁹Ne ànyigbã ji dùkɔ̃wo ne sumɔ wò eye dùkɔ̃wo ne do èta gũ lè ŋùkɔ̀ na wò! Wòa nyi èga na nɔ̀viwo, eye ne ènɔ̀ wò be viwo woa do èta gũ lè ŋùkɔ̀ na wò! Kpɛ̃sɛ̃ na àmè kè la sɛ̃kpɛ̃ na wòa, sìtu na àmè kè la tu sì na wòa!”

³⁰Ekè Izàk wu Yakɔb be èsìtutua nu, eye Yakɔb to jo lè ètɔa gbɔ trolo kpò ye fòfoa Esaò trɔ gbɔ̀ so àdègbe.

³¹E cã yì ɖà nuɖùɖu yì na ètɔa. Eye e gblɔ̃ na ɛ̀ be: “Ètɔ nyè ne sitè ne bèa ɖù èvia be àdè-lã; nènea ye wò ŋutɔ wò la teŋu tu sì na mù.”

³²Ètɔa Izàk ɖo e ŋuti be: “Àmè kɛ ye wò nyi ò?” E gblɔ̃ be: “Mù nyi èvi wò àmègãxotɔa Esaò”.

³³Izàk dàvò ku àdɔ̀mèze gã ɖe gblɔ̃ be: “Àmè kɛ ye yì dà àdè eye be hɛ̃ àdè-lã vana mù ò? Mù ɖù ènu kpò ye wò va. Mù tu sì na ɛ̀, eye sìtume be la nyi.”

³⁴Wàlɛbɛ kè Esaò sè ènyà kè ètɔa gblɔ̃a, e do àpa sɛ̃sɛ̃ɖe, lè veve sèse gã ɖe mè, eye e gblɔ̃ na ètɔa be: “Oò ètɔ nyè! Tusì na mù, na ènyè cã!”

³⁵E ɖo e ŋuti be: “Nɔ̀vi wò wɔ̀ àyè va xɔ̀ àpo sìtua vɔ̀.”

³⁶Esaò yì e ji: “Ɖo ekè e tɔ̀ Yakɔb ŋuti ye be trɔ mù to e mè zè èvè sɔ̃ŋu ɖoa? E xɔ̀ ŋùkɔ̀gbevi nyinyi nyèa eye kpɔɖa fifìa e gbà xɔ̀ àpe sìtua cã. Wò mu gble sìtu ɖe kpɔ̀tɔ̀ na mù a?”

³⁷Izàk xɔ̀ ènyà gblɔ̃ na Esaò be: “Kpɔ! Mù sɔ ɛ̀ ɖo èga na wò, mù sɔ nɔ̀viawo wɔ̀ yebe sumɔ̃viwo. Mù na ɛ̀ èlì ku vɛ̃ yeye. Nukɛ mù la teŋu wɔ̀ na wò èvi nyè!”

³⁸Esaò ɖo e ŋuti na ètɔa be: “Sìtu ɖèka kpò ye lè àsi wòa, ètɔ nyè? Tusì na mù, ènyè cã!” Esaò kɔ ègbè yì ji, fã àvi ŋutɔ.

³⁹Eye Izàk xɔ̀ ènyà gblɔ̃ be: “Kpɔ, ànyigbã nyuɛ̃a godo ye àxue wò la nɔ̀ eye wò mu la kpɔ jiŋùkusi be àhũ jàja ò.

⁴⁰Wò la nɔ̀ àgbè to èwui wòa ji, vɔ̀a wò la sumɔ nɔ̀vi wòa, eye lè àpo àgbàgba jèjewo mèa, wò la ɖè yebe kɔ̀kùtia jo lè àpo èkɔ̀.”

⁴¹Esaò sɔ Yakɔb ɖo kɛ̃tɔ ɖo sìtu kè be xɔ̀ lè ètɔa gbɔa ŋuti. E le gblɔ̃ lè ye ɖokoe mè be: “Ètɔ nyè be ècɔwɔ̀wɔ be gàmè le sù eye mù la teŋu wù nɔ̀vi nyè Yakɔb.”

⁴²Wo yì to ènu kè Esaò èvia àmègãxoa le bùkpɔa na Rebekà. E na wo yɔ Yakɔb, èvia vifɛ̃a na ɛ̀ eye be gblɔ̃ be: “Kpɔɖa, fòfo wò Esaò le ji la biɔhlɔ̃ ne bèa wù wò.

⁴³Fifìa, èvi nyè ɖoto mù; sitè! Si yì nɔ̀vi nyè Labàn gbɔ lè Haràn.

⁴⁴Wò la yì nɔ̀ e gbɔ ŋùkèkè viɖe kaka va na gàkèmè fòfo wò la ɖè àsi lè àdɔ̀mèze ŋutia.

⁴⁵Ne fòfo wò be èjì bibia nu va yìa eye e ŋlɔ̀be ènu kè wò wɔ̀ na ɛ̀a, mù la dɔ̃ àmè la va kplɔ̀ wò lè funu. Nukɛ ŋuti mù la bu èvi nyè èvèawo gbè ɖèka ɖo ò?”

⁴⁶Rebekà gblɔ̃ na Izàk be: “Àgbèa tìkɔ̀ na mù ɖo Hitìvi-nyɔ̃nù èvè kèawo ŋuti. Ne Yakɔb cã yì ɖè ànyigbã kèa be nyɔ̃nùvi kè la nɔ̀ sìgbè ekèawo nènea, nukɛ ŋuti mù la gbà nɔ̀ àgbè ɖo ò?”