Read gen Gɔ̃mèjèje be Xoma 28 Bible Online

Gɔ̃mèjèje be Xoma 28 - gen bible

Gɔ̃mèjèje be Xoma 28

¹Izàk yɔ Yakɔb va eye be tu sì na ɛ̀. E sɔ ègbè do àsi kèa na ɛ̀; e gblɔ̃ na ɛ̀ be: “Wò mu la ɖè Kanàn nyɔ̃nùvi ò.”

²Sitè yì Aràm be ègbàji lè ènɔ̀ wò be ètɔ Betùɛl be àxomè funu, yì kplɔ̀ ènɔ̀ wò be nɔ̀vi ŋusù Labàn be vi nyɔ̃nùwo dòmètɔ ɖèka ne bèa nyi èsrɔ̃ wò.

³“Mawu ŋusɛ̃kpatatɔa ne tu sì na wò, ne na wò èvi lè gbɔsùsu mè ne wòa trɔ zũ dùkɔ̃wo be jɔ̀pe!

⁴Ne bèa sɔ Abràham be sìtua na wò, na èwò ku àpo jìjimè, ne àmèjro nyigbã wòa bèa trɔ zũ tɔ̀ wò, ànyigbã kè Mawu sɔna Abràham a.”

⁵Izàk ɖo Yakɔb ɖoɖa Aràmtɔ Betùɛl be vi ŋusù Labàn gbɔ lè Aràm be ègbàji, Labàn kè nyi Rebekà kè jì Yakɔb ku Esaò be nɔ̀vi ŋusùa.

⁶Esaò kpɔ be Izàk tu sì na Yakɔb eye be ɖo è ɖoɖa Aràm be ègbàji ne bèa yì ɖè èsrɔ̃, eye e sɔ ègbè do àsi kèa na ɛ̀ lè yebe èsìtutua mè be: “Wò mu la ɖè Kanàn vi nyɔ̃nù ò.”

⁷Eye Yakɔb sè ètɔa ku ènɔa be ègbè eye be jo yì Aràm be ègbàa ji.

⁸Esaò sè e mè be Kanàn nyɔ̃nùviwo be ènu mu jɔ̀nàjì na yè tɔ Izàk ò,

⁹E yì kpɔ Ismàɛl eye sɔ kpe èsrɔ̃awoa, e ɖè Màhalàt, Nebayɔ̀t be nɔ̀vi nyɔ̃nù, kè nyi Ismàɛl kè Abràham jìa be vi nyɔ̃nù.

¹⁰Yakɔb to lè Bɛr-Sevà eye e tùtà Haràn.

¹¹E ci àfiɖe dɔ̃ lè èmɔ̃a ji ɖo èwè ɖoxɔ̀ do è lè èmɔ̃a ji. E sɔ èkpe ɖe lè funu, sɔ ɖo èkɔ̀ eye be dɔ̃ àlɔ̃ ɖo funu.

¹²E kpɔ ènu ɖe lè àlɔ̃ mè: kpɔɖa wo sɔ àcrɔɛ ɖe tù ànyi eye yebe àɖɔ̀ mè tɔ jiŋùkusi; Mawu be àtikplɔtɔwo le lia ɛ̀ le yì èji gbà le ɖì.

¹³Kpɔɖa Tɔhonɔ̀ va tɔtè ɖo e gbɔ gblɔ̃ na ɛ̀ be: “Mù nyi Tɔhonɔ̀, ètɔ wò Izàk ku Abràham be Mawu. Ànyigbã kè ji wò mlɔ̃ a, mù la sɔ ɛ̀ na èwò ku àpo jìjimè.

¹⁴Àpo jìjimè la nɔ̀ sìgbè ànyigbã be hũhũ nène. Wo la kãkã yì èwèɖoxɔ̀pe, èwèzɛ̃pe, èvègo ku àpùgo; lè èwò ku àpo jìjimè mèa, wo la tu sì na ànyigbã ji be xòmèwo kpata.

¹⁵Kpɔ! Mù lè ku wò eye mù la kpɔ èji wò lè àfi ɖekpekpe kè wò la yìa, eye mù la gbà kplɔ̀ wò va ànyigbã kèa ji ɖo nyè mu la gble wò ɖɛ kaka ma wɔ̀ ènu kè mù gblɔ̃ na wòa ò.”

¹⁶Yakɔb fɔ̃ so yebe àlɔ̃a mè eye e do àpa be: “Nyàwo be Tɔhonɔ̀ lè fikèa, vɔ̀ nyè mu nya ò!”

¹⁷Vɔ̃vɔ̃ ɖo è eye e do àpa be: “Tèpea ɖo vɔ̃vɔ̃ ŋutɔ! Mu nyi àfi bu wu Mawu be àxomè ò, jiŋùkusi be àgboa ye.”

¹⁸Yakɔb fɔ̃ ŋùdekɛ̃nyɛ fùtù, e sɔ èkpe kè be sɔ ɖo èkɔ̀a, li ì ɖo funu eye be kɔ̀ àmì ɖo e ji.

¹⁹E ɖo nyikɔ na funua be Betɛ̀l ekè gɔ̃mè ye nyi 'Mawu be àxomè'; vɔ̀ sãa, wo yɔna èdùa be Luz.

²⁰E yomè a, Yakɔb fìã àjɔ̀gbè kèa be: “Ne Mawu nɔ̀ ku mù eye be kpɔ ji nyè lè àzɔ̃lì nyèa mè, ne e na mù ènu mù ɖù, ne e na mù àwù mù do,

²¹eye ne mù trɔ gbɔ̀ va ètɔ nyè be àxomè sɛ̃sɛ̃ɖea, Tɔhonɔ̀ la trɔ zũ àpe Mawu.

²²Èkpe kè mù lia la nyi Mawu be àxomè eye lè ènu kèwo keŋu wo la na mù a mèa, mù la ɖè èwogɔ̃a na wò.”