Read gen Gɔ̃mèjèje be Xoma 29 Bible Online

Gɔ̃mèjèje be Xoma 29 - gen bible

Gɔ̃mèjèje be Xoma 29

¹Yakɔb so jè èmɔ̃ yì Kedɛ̀m be vi ŋusùwo be ànyigbã ji.

²E ɖè ŋùku kpɔ, eye kpɔɖa vudo ɖèka lè àgblèa ji. Àlɛ̃ha ètɔ̃ mlɔ̃ ànyi lè vudoa gbɔ ɖo àlɛ̃hawo le nù èsì lè funu. Èkpe gã ɖe ye wo sɔ tu vudoa nu.

³Wàlɛbɛ kè ye àlɛ̃hawo kpata bɔ̀ vɔ̀a, wo mlìnà èkpe gãa lè vudoa nu, eye wo nana àlɛ̃awo èsì wo nùnà, e yomè a, wo gbà sɔna èkpea tu vudoa nu.

⁴Yakɔb gblɔ̃ na àmèawo be: “Nɔ̀vi nyèwo, fikɛ tɔwo mì nyi ò?” Wo ɖo e ŋuti be: “Haràn viwo ye mi nyi.”

⁵E gblɔ̃ na wo be: “Mì jèsi Nàhɔr be vi ŋusù Labàn-a?” Wo ɖo e ŋuti be: “Mi jèsi ì.”

⁶E gblɔ̃ na wo be: “E fɔ̃ nyuɛ̃ ɖe a?” Wo ɖo e ŋuti be: “E fɔ̃ nyuɛ̃ ɖe, kpɔɖa èvia nyɔ̃nù Raxɛ̀l ye kplɔ̀ àlɛ̃wo gbãnà ŋua”.

⁷E yì e ji be: “Mì kpɔɖa! Dɔ̃ŋùkusua gbà lètè gãa; mu nyi wàlɛbɛ kè mì la bɔ̀ àlɛ̃awoa ye yà ò. Mì na wo èsì ne woa nù eye mì kplɔ̀ wo yì ne woa yì ɖùgbe.”

⁸Wo ɖo e ŋuti na ɛ̀ be: “Mi mu la teŋu wɔ̀ ɛ̀ ne àlɛ̃hawo keŋu mu bɔ̀ ɖodu ò; ɖo e yomè ye wo la mlì èkpea jo lè vudoa nu eye mi la na èsì àlɛ̃awo.”

⁹E gbà kpɔ̀tɔ̀ le pò nupo ku wo wàlɛbɛ kè Raxɛ̀l va ɖo kudo ètɔa be àlɛ̃wo, ɖo àlɛ̃kplɔ̀tɔ be nyi.

¹⁰Ekè Yakɔb kpɔ Raxɛ̀l, Labàn kè nyi ènɔa be nɔ̀vi ŋusùa be vi nyɔ̃nùa, ku ènɔa be nɔ̀vi ŋusù be àlɛ̃awoa, e zɔ̃ yì mlì èkpea jo lè vudoa nu eye be na èsì ènɔa be nɔ̀vi Labàn be àlɛ̃wo nù.

¹¹Yakɔb fã Raxɛ̀l, e kɔ ègbèe yì ji fã àvi.

¹²Yakɔb na Raxɛ̀l nya be ètɔa be àmè yè nyi eye yè nyi Rebekà be vi ŋusù. E pu dù yì sìa ètɔa.

¹³Ekè Labàn gbe sè nɔ̀via nyɔ̃nù be vi ŋusù Yakɔb be nyikɔ kpòa, e pu dù va dogò è. E kebe è, fã ɛ̀ eye be kplɔ̀ ɛ̀ yì yebe àxomè; Yakɔb ɖè ènyà kpata gblɔ̃ na ɛ̀.

¹⁴Labàn gblɔ̃ na ɛ̀ be: “Àpe ŋutilã ku àpe èpuwo ye wò nyi nyàwo”, eye Yakɔb nɔ̀ e gbɔ xɔ̀ wètri ɖèka.

¹⁵Labàn gblɔ̃ na Yakɔb be: “Nɔ̀vi nyè wò nyi, ye ŋutia wò la wɔ̀ èdɔ na mù gbaloa? Gblɔ̃ ènu kè la nyi àpo fɛ̃tua na mù.”

¹⁶Vɔ̀ Labàn ɖo èvi nyɔ̃nù èvè, àmègãxotɔa nyi Leà eye vifɛ̃a tɔ̀nà Raxɛ̀l.

¹⁷Leà be ŋùkumè lè kpɔ̃ eye Raxɛ̀l jètùgbɛ̀jɛ, nya kpɔ ŋutɔ.

¹⁸Yakɔb lɔ̃ Raxɛ̀l be ènyà gbɔ. E gblɔ̃ be: “Mù la wɔ̀ èdɔ na wò èpè adrɛ̃ sɔ ɖè èvi wò Raxɛ̀l ɖèvia.”

¹⁹Labàn yì e ji be: “Na mù a, e nyɔ wu ne ma sɔ ɛ̀ na wò, sɔ wu be ma sɔ ɛ̀ na àmè bu; nɔ̀ ku mù.”

²⁰Yakɔb wɔ̀ èdɔ èpè adrɛ̃ na Raxɛ̀l be ɖèɖe, eye wo nɔ̀ na ɛ̀ sìgbè ŋùkèkè ɖewo kpò nène ɖo e lɔ̃ ɛ̀ ŋutɔ.

²¹Yakɔb gblɔ̃ na Labàn e yomè be: “Sɔ èsrɔ̃ nyèa na mù. Àzã nyèa sù eye mù ji be ma ɖè è fifì.”

²²Labàn bɔ̀ àmè kèwo keŋu lè funua eye be ɖù àzã gã ɖe.

²³Kè fìɛ̃si ɖoa, Labàn kplɔ̀ èvia nyɔ̃nù Leà eye e kplɔ̀ ɛ̀ yì na Yakɔb ne bèa dɔ̃ ku ì.

²⁴Labàn sɔ yebe sumɔ̃vi nyɔ̃nù Zilpà sɔ na Leà ne bèa sumɔ ɛ̀.

²⁵Eye kè èŋù kèa, ŋùdãtɔ̀ a, Leà ye! Eye Yakɔb gblɔ̃ na Labàn be: “Nukɛ ye wò wɔ̀ ku mù ŋua ò? Mu nyi Raxɛ̀l ŋuti mù wɔ̀ èdɔ na wò ɖoa? Nukɛ ŋuti wò blè mù ɖo ò?”

²⁶Labàn ɖo e ŋuti be: “Miabe kɔ̀dowo mu ɖè èmɔ̃ be woa sɔ vifɛ̃a na àsu jè ŋùkɔ̀ na àmègãxɔtɔa ò.

²⁷Nɔ̀ ku ì xɔ̀ kuasiɖa ɖèka e yomè a mù la sɔ e yomètɔ̀a na wò ɖo èdɔ kè wò la gbà wɔ̀ èpè adrɛ̃ a nu.”

²⁸Ènu kèa ye Yakɔb wɔ̀. E vɔ̀ kuasiɖaa nu ku Leà, eye Labàn sɔ èvia nyɔ̃nù Raxɛ̀l sɔ na ɛ̀ be ɖè.

²⁹Labàn sɔ yebe sumɔ̃vi nyɔ̃nù Bilhà na Raxɛ̀l ne bèa sumɔ ɛ̀.

³⁰Yakɔb dɔ̃ ku Raxɛ̀l cã eye e lɔ̃ Raxɛ̀l wu Leà: e wɔ̀ èdɔ na Labàn xɔ̀ èpè adrɛ̃.

³¹Ekè Tɔhonɔ̀ kpɔ be wo mu lɔ̃ Leà òa, e na ɛ̀ èvi jìji mɔnu vɔ̀ Raxɛ̀l ci èkò.

³²Leà fɔfu eye e jì èvi ŋusù kè be yɔ be Rubɛ̀n ɖo e gblɔ̃ be: “Tɔhonɔ̀ ɖè ŋùku kpɔ àpe ègbɔɖìamèa, fifìa èsrɔ̃ nyèa la lɔ̃ mù.”

³³E gbà fɔfu ke eye e jì ŋusùvi eye e do àpa be: “Ɛ̃ɛ Tɔhonɔ̀ nya be wo mu lɔ̃ mù ò; ye ŋuti ye e gbà na mù ɖèvi kèa cã.” Eye e ɖo nyikɔ na ɛ̀ be Simeɔ̀n.

³⁴E gbà fɔfu bu, e jì ŋusùvi eye e gblɔ̃ be: “fifìa ŋutɔ ye àsu nyèa la tɛ ɖo ŋuti nyè, ɖo mù jì ŋusùvi ètɔ̃ sɔ̃ŋu na ɛ̀.” Ènu kè ŋuti Yakɔb yɔ ɛ̀ be Levìa yeŋu.

³⁵E gbà fɔfu ɖe, e jì ŋusùvi eye be do àpa be: “Fifìa ya mù la kafu Tɔhonɔ̀!” Ènu kèa ŋuti ye be yɔ ɛ̀ be Yudà. E yomè a e tɔtè èvi jìji.