Read gen Gɔ̃mèjèje be Xoma 3 Bible Online

Gɔ̃mèjèje be Xoma 3 - gen bible

Gɔ̃mèjèje be Xoma 3

¹Lè ègbemèlã kèwo kpata Tɔhonɔ̀ Mawu wɔ̀a dòmèa, èdã nyi èlã kè ɖo àyè gɛdɛ wua. E gblɔ̃ na nyɔ̃nùa be: “Nyàwo ye Mawu gblɔ̃ be: “Mì mu gbà ɖù àbɔmètiawo be èkusɛ̃sɛ̃ ɖekpe òa?”

²Nyɔ̃nùa ɖo e ŋuti na èdã be: “Mi teŋu ɖù àbɔmètiawo be èkusɛ̃sɛ̃ fàa;

³vɔ̀a, so àti kè lè àbɔ a be dòdòmèa ŋutia, Mawu gblɔ̃ be: “Mì mu gbà ɖù yebe èkusɛ̃sɛ̃ ò, eye mì mu gbà tɔ ɛ̀ àsi ò ne mì mu gbà ku ò.”

⁴Èdãa gblɔ̃ na nyɔ̃nùa be: “Aò, mì mu la ku kpɔ ò,

⁵vɔ̀a, Mawu nya be wàlɛbɛ kè mì la ɖù ìa, mìabe ŋùkuwo la hũ eye mì la nɔ̀ sìgbè mawuwo nène, la ɖo ènunya sɔ jèsi ènyuɛ̃ ku èvuɛ̃.”

⁶Eye nyɔ̃nùa kpɔ be àtia nyɔ ne woa ɖù, eye e jro ŋùku nya kpɔkpɔ, eye e jè ne bèa do vòvòtoto ènu mè. E sɔ àtia be èkusɛ̃sɛ̃ ɖe ɖù; E na èɖe èsrɔ̃a cã e ɖù.

⁷Zè ɖèka woabe ŋùkuwo hũ eye wo kpɔ be yèwo lè àma-àma. Wo sɔ figìti be àmàkpawo sɔ wla woabe àmaa.

⁸Gà ŋua mè tutu ye wo sè Tɔhonɔ̀ Mawu be ègbè wàlɛbɛ kè e le ɖìsà lè àbɔ a mèa, ŋusùa ku nyɔ̃nùa wo wla woa ɖokoe do Tɔhonɔ̀ Mawu lè àbɔmètiawo dòmè.

⁹Tɔhonɔ̀ Mawu yɔ ŋusùa gblɔ̃ be: “Fikɛ èwò ɖe?”

¹⁰Àmèa ɖo e ŋuti be: “Mù sè àpo ègbè lè àbɔ a mè, eye vɔ̃vɔ̃ ɖo mù, ɖo mù lè àma-àma, eye mù wla.”

¹¹E gblɔ̃ na ɛ̀ be: “Àmè kɛ gblɔ̃ na wò be wò lè àma-àma ò? Wò ɖù àti kè be èse mù do na wòa be èkusɛ̃sɛ̃ ɖe yèa?”

¹²Àmèa ɖo e ŋuti be: “Nyɔ̃nù kè wò sɔ na mù a, ye na mù àtia be èkusɛ̃sɛ̃ eye mù ɖù.”

¹³Tɔhonɔ̀ Mawu gblɔ̃ na nyɔ̃nùa be: “Nukɛ nyi ekèa ye wò wɔ̀ ò?” Nyɔ̃nùa ɖo e ŋuti be: “Èdãa ye blè mù eye mù ɖù ì.”

¹⁴Tɔhonɔ̀ Mawu gblɔ̃ na èdãa be: “Ɖo wò wɔ̀ ekèa ŋutia, mù la sɛ̃kpɛ̃ na wò lè àxomèlãwo ku ègbemèlãwo kpata dòmè; pòdo ji ye wò la zɔ̃ lè, eye hũhũ la nyi àpo ènuɖùɖu àpo àgbèzãa keŋu.

¹⁵Mù la do vòklã èwò ku nyɔ̃nù dòmè, àpo jìjimèviwo ku nyɔ̃nù be jìjimèviwo dòmè. Jìjimè kèa la gbã èta na wò eye wò la ɖù àfɔ̀kpoji na ɛ̀.”

¹⁶Mawu to na nyɔ̃nùa be: “Mù la na wò la kpefũ lè èfufɔfɔ mè eye wò la le èku lè èvijìji be gàmè. Susu wò kpata la nɔ̀ èsrɔ̃ wò ji, vɔ̀a e la nyi àpetɔ ɖo ŋusɛ̃ ɖo ji wò.”

¹⁷Mawu gblɔ̃ na Adàm be: “Ɖo wò sè èsrɔ̃ wò be ègbè ye wò ɖù àti kè be èse mù do na wò be mù gbà ɖù òa be èkusɛ̃sɛ̃a, ànyigbã la ɖɔ ku kpɛ̃sɛ̃ ɖo ŋuti wò. E la sɛ̃ŋu na wò ŋutɔ gbɔ̀xue wò la kpɔ ŋùkèkè be ènuɖùɖu.

¹⁸Ànyigbã kèa la mìɔ̃ àklãŋùti ku àŋɔ̀ka na wò. Ègbemè be àmàkpawo la nyi àpo ènuɖùɖu.

¹⁹Wò la xa àde gbɔ̀xue wò la kpɔ ènuɖùɖu kaka va na gà kè mè wò la gbìgbɔ̀ trɔ yì ànyigbã mè ɖo e ye mè wo ɖè wò to lè. Ɛ̃ɛ, hũhũ ye wò nyi, eye wò la gbà trɔ yì ànyi ŋua ke mè.”

²⁰Ŋusùa ɖo nyikɔ na èsrɔ̃a be Evà kè be gɔ̃mè ye nyi àgbè, ɖo e ye nyi àmè àgbèagbèwo kpata be ènɔ̀.

²¹Tɔhonɔ̀ Mawu sɔ èlãgbàze wɔ̀ àwù do na Adàm ku èsrɔ̃a Evà.

²²Tɔhonɔ̀ Mawu gblɔ̃ be: “Kpɔɖa, àmè trɔ sìgbè mia dòmètɔ ɖe nène, le nya ènu kè nyi èvuɛ̃ ku ènyuɛ̃a. Fifìa, mu lè be bèa kpɔ èmɔ̃ lè àgbètia ŋuti ne bèa ɖù yebe èkusɛ̃sɛ̃ ne bèa kpɔ àgbè mà-vɔ ò.”

²³Tɔhonɔ̀ Mawu nyà àmèa lè Edɛ̀n bɔa mè ne bèa yì dè ànyigbã kè mè wo ɖè è to lè a.

²⁴Ekè Mawu nyà àmè lè àbɔ a mè a, E sɔ Kèrubimwo dà ɖo Edɛ̀n bɔ a be èwèzɛ̃pe. Wo le èwui bìɖà, dàzò ŋàŋlà ɖo àsi lè àgbètia be èmɔ̃ nu.