Read gen Gɔ̃mèjèje be Xoma 33 Bible Online

Gɔ̃mèjèje be Xoma 33 - gen bible

Gɔ̃mèjèje be Xoma 33

¹Yakɔb kɔ ŋùmè yì ji eye e kpɔ be Esaò gbãnà ku àgbètɔ èkà èwo. E mã sumɔ̃viawo ɖo Leà, Raxɛ̀l ku sumɔ̃vi nyɔ̃nù èvèawo nu.

²E sɔ sumɔ̃vi nyɔ̃nù èvèawo ku woabe èviawo ɖo ŋùkɔ̀, lè woa yomè a Leà ku èviawo, eye e yomè a Raxɛ̀l ku Yosɛ̀f.

³Ye ŋutɔ jè ŋùkɔ̀ na wo eye e blìbɔ̀ zè adrɛ̃ lè ànyigbã kaka va ɖo fòfoa gbɔ.

⁴Esaò pu dù yì dogò è, e fã ɛ̀, kù kpla èkɔ̀ na ɛ̀ eye be fã ɛ̀ sɛ̃sɛ̃ɖe; wo àmè èvèawo fã àvi.

⁵E yomè a, Esaò kɔ ŋùmè yì ji eye e kpɔ nyɔ̃nùawo ku sumɔ̃viawo. E gblɔ̃ be: “Àmè kɛwo ye ò?” Yakɔb ɖo e ŋuti be: “Sumɔvi kèwo Mawu na àpo sumɔ̃via ye.”

⁶Sumɔvi nyɔ̃nùawo zɔ̃ gogo è ku woabe èviawo eye wo do èta gũ na ɛ̀.

⁷Leà ku èviawo cã zɔ̃ yì do èta gũ na ɛ̀. E yomè a Yosɛ̀f ku Raxɛ̀l cã wo zɔ̃ yì eye wo do èta gũ na ɛ̀.

⁸Esaò gblɔ̃ be: “Nukɛ wò ja sɔ àsàɖa gbogbo kè mù dogòa sɔ wɔ̀ ò?” Yakɔb ɖo e ŋuti be: “Mù le ji be àpetɔ nyè ne kpɔ ɖo e mè na mù.”

⁹Esaò yì e ji be: “Ènu nɔ̀amèsi sù àsi nyè lè gbɔsùsu mè, nɔ̀vi nyè, ènu wòa ne nyi tɔ̀ wò kpò!”

¹⁰Yakɔb do àpa be: “Ào, mù ɖè kuku na wò! Ne wò teŋu kpɔ ɖo e mè na mù a, wò la lɔ̃-xɔ̀ ènunana nyèwo. Eye kè e nyi be mù kpɔ àpo ŋùmè sìgbè àlekè wo kpɔna Mawu be ŋùmè eye wò lɔ̃-xɔ̀ mù a,

¹¹xɔ̀ nyɔna kè ye so e mèa cã, ɖo Mawu ye sɔ wo sɔ na mù; ènu sia ènu lè àsi nyè.” E zĩ e ji eye e cã lɔ̃-xɔ̀ ɛ̀.

¹²Esaò gblɔ̃ be: “Mi gbã àsàɖa ne mia jo lè fikèa. Mù la zɔ̃ ku mì.”

¹³Yakɔb ɖo e ŋuti na ɛ̀ be: “Àpetɔ nyè nya be sumɔ̃viawo nyi gbɔ̀jɔ̀gbɔjɔmewo eye mù ɖo àlɛ̃nɔ ku ènyìnɔ kèwo jì èviawo; ne wo do nupo na woa, ne e gbà nyi ŋùkèkè ɖèka cã, àlɛ̃awo la ku.

¹⁴Ne e jro àpetɔ nyè ne bèa jè ŋùkɔ̀ na yebe sumɔ̃via. Ènyè ya mù la zɔ̃ blɛ̀wù ku àmèha kè kplɔ̀ mù do a lè ɖèviawo be àgbàgba jèje nu kaka va ɖo àpetɔ nyè gbɔ lè Seyirà.”

¹⁵Esaò gblɔ̃ be: “Mù jro be ma ɖè àsi lè àmè nyè ɖewo ŋuti na wò.” E ɖo e ŋuti be: “E gbà hiãa? Ne àpetɔ nyè gbe teŋu kpɔ ɖo e mè na mù kpòa, e vɔ̀!”

¹⁶Gbè ŋua gbè kea, Esaò yì yebe èmɔ̃ zɔ̃zɔ̃ a ji yì Seyirà.

¹⁷Wàlɛbɛ kè Yakɔb jo yì Sukɔ̀t àfi kè be tù àxue ɖo eye e gbà tù èkpawo na yebe èlãwo lèa; ènu kè ŋuti ye wo yɔ na tèpea be Sukɔ̀t, kè gɔ̃mè ye nyi èkpawo.

¹⁸Yakɔb trɔ gbɔ̀ so Aràm be ègbàji, va ɖo Sikɛ̀m be èdù kè lè Kanàn nyigbã jia sɛ̃sɛ̃ɖe eye e sò àxue ɖo èdùa be ŋùkɔ̀ je.

¹⁹Kudo klòsalò ga èkà èvè takpoa, e plè àgblè nyigbã lè Sikɛ̀m be ètɔ, Hamɔ̀r be èviwo si àfi kè e tù yebe gòxɔa ɖoa.

²⁰E li vɔsakpe ɖèka ɖo funua eye be yɔ ɛ̀ be: “Ɛl, Izràɛl be Mawu.”