Read gen Gɔ̃mèjèje be Xoma 38 Bible Online

Gɔ̃mèjèje be Xoma 38 - gen bible

Gɔ̃mèjèje be Xoma 38

¹Vɔ̀ lè gà ŋua mèa, Yudà jo lè nɔ̀viawo gbɔ yì Adulàm be ŋusù ɖe kè wo yɔna be Hiràa gbɔ.

²Lè funua, Yudà kpɔ Kanàntɔ kè wo yɔna be Cuà be èvi nyɔ̃nùa. E kplɔ̀ ɛ̀, si, eye be dɔ̃ kudo è,

³e fɔfu eye e jì ŋusùvi kè Yudà yɔ be Ɛr.

⁴Nyɔ̃nùa gbà jì ŋusùvi bu kè e ɖo nyikɔ na be Onàn.

⁵E yomè a, e gbà jì ŋusùvi ètɔ̃gɔ̃a eye be yɔ ɛ̀ be Celà. Kèziv be èdùa mè ye Yudà lè, eye wo jì Celà.

⁶Eye e kplɔ̀ Tamàr tùgbɛ̀jɛvia na Ɛr èvia cucugbãa.

⁷Yudà be èvi cucugbãa, Ɛr nyi àmè bàɖà lè Tɔhonɔ̀ be ŋùmè, eye be na e ku.

⁸Yudà gblɔ̃ na Onàn be: “Yì dɔ̃ ku fòfo wò kè kua be èsrɔ̃a. Wɔ̀ kudo è sìgbè lekè e jè nène, ne wòa do xòmè na fòfo wòa.”

⁹Vɔ̀ ekè Onàn nya be jìjimèa mu la va nyi yè tɔ̀ òa, ne e yì le dɔ̃ ku fòfoa be èsrɔ̃a, e ɖènà èfudodo be èsìa kɔ̀nà ŋùgbe, ne mu gbà do xòmè na fòfoa ò.

¹⁰Ènu kè be le wɔ̀a nyi ènu bàɖà lè Tɔhonɔ̀ be ŋùmè, eye be na e cã ku.

¹¹Yudà va gblɔ̃ na ètoyɔvia Tamàr be: “Yì nɔ̀ àhòvɔa mè lè ètɔ wò be àxomè kaka ne èvi nyè Celà bèa sĩ.” Tututu ye be gblɔ̃ ekèa ɖo be: “Mu nyɔ be ɖèvi kèa cã bèa gbà ku sìgbè fòfoawo ke nène ò!” Tamàr jo yì ci ètɔa be àxomè.

¹²Àzã fuuwo va yì eye Cuà be nyɔ̃nùvi kè nyi Yudà be èsrɔ̃a ku. E kè wo ɖo àsi àkɔ na ɛ̀ vɔ̀a, Yudà ku èxlɔ̃a Hirà Adulàmtɔ a, wo yì Timnà be èdùa mè lè yebe èlãha be èfukpàtɔwo gbɔ.

¹³Wo yì sìa Tamàr be: “Kpɔ, èto wò yì Timnà be èdùa mè ne yebe èlãha be èfukpàkpa.”

¹⁴E ɖè yebe àhòvɔa dà ɖɛ eye e sɔ ŋùmèxenu cɔ̃ ŋùkumè ne wo mu gbà jèsi ò, e yomè a e yì nɔ̀ ànyi lè Ènayìm be kɔpe kè lè Timnà be èmɔ̃ jia be mɔnu. Ɖo e nya nyuɛ̃ ɖe be Celà sĩ vɔ̀, co Yudà mu sɔ yè sɔ na ɛ̀ ne bèa ɖè ò.

¹⁵Kè Yudà kpɔ ɛ̀a, e kpɔ ɛ̀ sìgbè àhasìtɔ nène ɖo e sɔ ènu cɔ̃ ŋùkumè.

¹⁶E zɔ̃ yì e gbɔ lè èmɔ̃a tomè gblɔ̃ na ɛ̀ be: “Fifìa mù ji be ma dɔ̃ ku wò!” Ɖo, mu kpɔ ɛ̀ jèsi be yèbe ètoyɔvi ye ò. Tamàr ɖo e ŋuti be: “Nukɛ wò la na mù ne wò dɔ̃ ku mù ò?”

¹⁷E gblɔ̃ be: “Mù la sɔ àlɛ̃nɔvi ɖèka ɖoɖa wò.” Tamàr yì e ji be: “Mù la lɔ̃ ne wò sɔ ènu ɖe sɔ ɖo èkpe e ji na mù kaka va ɖo gà ŋua mèa.”

¹⁸E gblɔ̃ be: “Àwòbanu kɛ ye mù la na wò ò?” E ɖo e ŋuti be: “Àpo àlɔ̀ga tu ènu jia, ègojiblanu wòa, ku èkpò kè lè àsi na wòa ye.” Yudà sɔ wo sɔ na, dɔ̃ kudo è eye e fɔfu na ɛ̀.

¹⁹Tamàr sitè e yomè jè èmɔ̃ eye kè be ɖè ŋùmèxenua joa, e trɔ sɔ àhò be àwùa do.

²⁰Yudà sɔ àlɛ̃nɔvia na èxlɔ̃a kè so Adulàm-a, dɔ̃ ɛ̀ ɖoɖa nyɔ̃nùa gbɔ ne bèa xɔ̀ àwòbanuawo va. Èhlɔ̃a mu va yì kpɔ nyɔ̃nùa lè funu ò,

²¹eye e biɔ àmè kèwo lè funua gblɔ̃ be: “Fikɛ ye àhasìtɔ kè lè Ènayìm be èmɔ̃ jia lè ò?” Wo ɖo e ŋuti be: “Àhasìtɔ ɖekpe mu nɔ̀ funu kpɔ ò”.

²²E trɔ va Yudà gbɔ eye e va gblɔ̃ na ɛ̀ be: “Nyè mu kè ɖo e ŋuti ò, eye àmè kèwo lè funua, gblɔ̃ be àhasìtɔ ɖekpe mu nɔ̀ funua kpɔ ò.”

²³Yudà yì e ji be: “E nya wɔ̀ ye! Mi mu gbà do nupo na mia ɖokoe ò, mù sɔ àlɛ̃nɔvia ɖoɖa eye wò yì vɔ̀ mu lè funua ò!”

²⁴Vɔ̀ wètri ètɔ̃ yomè a, wo va sìa Yudà be: “Tamàr, ètoyɔvi wòa yì wɔ̀ àhasì, wu ekèa, e fɔfu kpe è!” Yudà ɖè ègbè be: “Wo ne ɖè è to eye woa tɔ ɛ̀ èzò!”

²⁵Wàlɛbɛ kè wo le ɖè è toa, e dɔ̃ àmè ɖoɖa ètoa gblɔ̃ be: “Ŋusù kè tɔ̀ ye nyi ènu kèawoa ye mù fɔ èfua na.” E yomè a, e gblɔ̃ be: “Jè àgbàgba ne wòa ji àmè kè tɔ̀ ye nyi àlɔ̀gàvi tu ènu ji, ègojiblanu ku èkpò kèawo!”

²⁶Yudà kpɔ wo jèsi eye e gblɔ̃ be: “E wɔ̀ ànùkua wu mù ɖo nyè mu sɔ ɛ̀ na èvi nyè Celà be ɖè ò.” Vɔ̀, e yomè a, mu gbà dɔ̃ kudo è gbèɖe ò.

²⁷Lè yebe èvijìji be gàmèa, wo kpɔ be vènàvi ye be le ja jì.

²⁸Ekè wo le jì èviawo na ɛ̀a, ɖèvi ɖèka ɖè àlɔ̀ to eye nyɔ̃nù kè le ji èvia na ɛ̀a, sɔ èkà jɛ̃ bla ɖo yebe àlɔ̀tinu gblɔ̃ be: “Ekèa ye to cucugbã.”

²⁹E yomè a, e trɔ ŋlɔ̃ yebe àlɔ̀a eye nɔ̀via ye wo va jì cucugbã. Nyɔ̃nùa gblɔ̃ be: “Èmɔvi kè wo ɖèa be gɔ̃mè ɖe?” Eye wo yɔ ɖèvia be nyikɔ be Perɛ̀s, ekè gɔ̃mè ye nyi èmɔ̃vi ɖèɖe.

³⁰Ɖèvi kè be àlɔ̀tinu wo bla èkà jɛ̃ ɖoa, cã va to e yomè, eye wo yɔ ɛ̀ be Zeràh.