Read gen Gɔ̃mèjèje be Xoma 4 Bible Online

Gɔ̃mèjèje be Xoma 4 - gen bible

Gɔ̃mèjèje be Xoma 4

¹Adàm ŋusùa dɔ̃ ku èsrɔ̃a Evà. Evà fɔfu eye e jì Kaɛ̃, e gblɔ̃ be: “Tɔhonɔ̀ na mù jì ŋusù.”

²E yomè a, Evà gbà jì Abɛ̀l, Kaɛ̃ be nɔ̀vi ŋusù. Abɛ̀l nyi àlɛ̃kplɔ̀tɔ, Kaɛ̃ ya nyi àgblèdètɔ.

³Ekèa yomè a, mu dìdì ò, Kaɛ̃ sɔ yebe àgblèmènukuwo yì savɔ na Mawu.

⁴Abɛ̀l cã sɔ yebe ŋùkɔ̀gbe be àlɛ̃vi doàmìwo yì savɔ na Mawu. Abɛ̀l ku yebe vɔsa jè ŋùmè na Tɔhonɔ̀,

⁵vɔ̀a Kaɛ̃ ku yebe vɔsa mu jè ŋùmè na Tɔhonɔ̀ ò. Kaɛ̃ bijì veku-veku eye be ɖo àdã.

⁶Tɔhonɔ̀ gblɔ̃ na Kaɛ̃ be: “Nukɛ ŋuti wò le bijì ɖo ò? Eye nukɛ ŋuti wò lè ŋuzĩzĩ mè ɖo ò?

⁷Nène a, e lè be ne wò wɔ̀ ènunyuɛ̃a àpo ŋùkumè la kɔ̀, vɔ̀ ne wò mu wɔ̀ ènunyuɛ̃ òa, èvuɛ̃ kè doxa ɖo àgbo wòa jia la nɔ dɔ̃ wò. Vɔ̀a, wò ya, ɖù e ji.”

⁸Kaɛ̃ pò nupo na nɔ̀via Abɛ̀l eye ekè wo yì àgblè mèa, Kaɛ̃ zrò jè nɔ̀via Abɛ̀l ji, sɔ wù.

⁹Tɔhonɔ̀ to na Kaɛ̃ be: “Fikɛ nɔ̀vi wò Abɛ̀l ɖe?” Kaɛ̃ ɖo e ŋuti be: “Nyè mu nya ò, nɔ̀vi nyè be ɖiatɔ ye mù nyia?”

¹⁰Eye Tɔhonɔ̀ gblɔ̃ na ɛ̀ be: “Nukɛ ye nyi ekèa wò wɔ̀ ò? Mù le sè nɔ̀vi wò be èhũa be ŋɛ̃ŋɛ̃ so kaka ànyigbã mè.

¹¹Kpɔɖa ànyigbã kè nù nɔ̀vi wò kè wò wùa be èhũa, la sɛ̃kpɛ̃ na wò.

¹²Eŋuã ŋuti, ne wò dè àgblèa, ànyigbã ma gbà na wò yebe àdɔ̀kùnuwo ò. Ètùjèmè la hùe do wò eye wò la nɔ dãgbã lè ànyigbã kèa ji.”

¹³Kaɛ̃ gblɔ̃ na Tɔhonɔ̀ be: “Àgɔ̀ nyèa kpɛ̃ ŋutɔ ne ma dro!

¹⁴Ne wò nyà mù jo lè àgblè nyigbã kèa jia, mù la wla do wò eye ètùjèmè la bu do mù. Kpɔɖa mù la nɔ dãgbã lè ànyigbã kèa ji eye àmè ɖekpekpe kè la kpɔ mù a, la wù mù.”

¹⁵Tɔhonɔ̀ gblɔ̃ na ɛ̀ be: “Aò ne àmè ɖe wù èwòa, wo la biɔ ɛ̀ èhlɔ̃ zè adrɛ̃.” Eye Tɔhonɔ̀ do jèsìdo Kaɛ̃ ŋuti ne àmè ɖe mu gbà wù ì ò.

¹⁶Ekèa na ye Kaɛ̃ si jo lè Tɔhonɔ̀ be ŋùkumè, yì sò àxue ɖo Nɔd be nyigbã ji, lè Edɛ̀n be èwèzɛ̃pe lɔ̀ge.

¹⁷Kaɛ̃ dɔ̃ ku èsrɔ̃a, nyɔ̃nùa fɔfu eye e jì ŋusùvi kè tɔ̀ Henɔ̀k. Eye Kaɛ̃ sò èdù ɖe ye e ɖo èvia be nyikɔ na èdùa (Henɔ̀k).

¹⁸Lè Henɔ̀k be èdùa mèa, Kaɛ̃ ku èsrɔ̃a jì Iràd. Iràd va jì Mèhuyà. Mèhuyà jì Mètucà, eye Mètucà jì Lemèk.

¹⁹Lemèk ɖè nyɔ̃nù èvè; ɖèka tɔ̀ Adà eye èvègɔ̃a tɔ̀ Silà.

²⁰Lemèk be èsrɔ̃ Adà jì Yabàl; ŋusù kè nyi àmè kèwo kpata nɔ̀nà ègòxɔ mè ku woabe àlɛ̃wo be ètɔ.

²¹Nɔ̀via be nyikɔ ye nyi Yubàl; e ya ye nyi àmè kèwo sɔna kàsãŋùgu ku èkpɛ̃wo jìnà èhà.

²²Lemèk be èsrɔ̃ Silà ya jì Kaɛ̃n-Tubàl, àmè kè nyi zògbɛ̀dɛ, wɔ̀nà gàkpo ku gàjɛ̃ ŋuti dɔa. Eyomètɔ̀ nyɔ̃nùa tɔ̀ Namàa.

²³Lemèk gblɔ̃ na èsrɔ̃awo be: “Adà ku Silà, mì sè àpe ègbè. Mì Lemèk be èsrɔ̃wo mì ɖoto mù! Ɛ̃ɛ, mù wù àmè ɖo àpe àbì tèpe, ɖèvi ɖe ɖo àpe pòpo tèpe.

²⁴Ɛ̃ɛ, wo la biɔ Kaɛ̃ be èhlɔ̃ zè adrɛ̃, vɔ̀a, wo la biɔ Lemèk tɔ̀ zè kàtakpo ci woeadrɛ̃.”

²⁵Adàm gbà dɔ̃ ku èsrɔ̃a Evà, eye e gbà jì ŋusùvi ke, e ɖo nyikɔ na be: “Setì” e gɔ̃mè nyi be “Ɖo Mawu na mù èvi bu ɖo Abɛ̀l tèpe, àmè kè Kaɛ̃ wùa.”

²⁶Setì cã jì ŋusùvi kè wo yɔna be Enɔ̀k. Eye wo tɔ Mawu yɔyɔ so Enɔ̀k ji be Tɔhonɔ̀.