Read gen Gɔ̃mèjèje be Xoma 41 Bible Online

Gɔ̃mèjèje be Xoma 41 - gen bible

Gɔ̃mèjèje be Xoma 41

¹Vɔ̀, le èpè èvè yomè a, Faraɔ̀n ku èdrɔ̃. E nɔ̀tè lè Ejiptè be ètɔ̀ gã to,

²eye ènyìnɔ adrɛ̃ kèwo nya kpɔ gbà do àmìawo to so ètɔ̀ gã mè. Wo tɔ ègbe ɖùɖu lè ètɔ̀a to.

³E yomè a, ènyìnɔ adrɛ̃ bu kèwo ɖìkù, gbà nyràwo cã to so ètɔ̀ gã mè. Wo va lè adrɛ̃ cucugbã tɔ̀awo gbɔ, lè ètɔ̀ gã to,

⁴eye ènyì ɖìkù kèwo nyrã kpɔkpɔawo ɖù ènyìnɔ doàmì kèwo nya kpɔawo. Eyomè kpòa, Faraɔ̀n fɔ̃ so àlɔ̃ mè.

⁵E gbà trɔ dɔ̃ àlɔ̃ eye e gbà kudrɔ̃ zè èvègɔ̃a. Eye e kpɔ èlùtikpe adrɛ̃ kèwo nya kpɔ eye wo lòlòa, lè àti ɖèka ŋuti.

⁶E yomè a, e gbà kpɔ èlùtikpe adrɛ̃ bu kèwo ɖìkù eye àya sɛ̃sɛ̃ na wo puawo lè mìɔ̃ lè àhàji na wo.

⁷Eye èlùtikpe ɖìkù kèwo jo puawo fɔ̀ èlùtikpe lòlòawo sɔ mì. Faraɔ̀n fɔ̃ so àlɔ̃a mè eye be kpɔ be èdrɔ̃ ye yè ku.

⁸Kè èŋù kèa, yebe susu titɔ, eye Faraɔ̀n na wo yɔ hũbonɔwo ku ènunyatɔwo kpata lè Ejiptè-nyigbã jia, va bɔ̀. Faraɔ̀n ɖè èdrɔ̃ kè be kua na wo, vɔ̀ àmè ɖekpe mu lè la ɖè wo gɔ̃mè na ɛ̀ ò.

⁹Eŋuã yomè ye, Faraɔ̀n be àhàkùtɔ gã, ɖè ènyà gblɔ̃ na Faraɔ̀n be: “Mù ɖo la ɖè àgɔ̀jèje nyèa gblɔ̃ egbè.

¹⁰Ekè Faraɔ̀n bijì do yebe sumɔ̃viawo, eye be sɔ mù tu ɖo ègàkpamè, ènyè ku kpɔ̃nɔnatɔ gãa,

¹¹mi kudrɔ̃ ɖe lè èzã ɖèka mè, ènyè ku kpɔ̃nɔnatɔa, eye mi àmè èvèa be èdrɔ̃wo ɖo gɔ̃mèsèse.

¹²Hebrù be ɖèkajɛ ɖe nɔ̀ ku mi, e le nyi ègàkpajikpɔtɔa be kluvi. Mi ɖè èdrɔ̃ kè mi kuawo na ɛ̀, eye e ɖè e gɔ̃mè na mi àmètɔ̀ àmètɔ̀.

¹³Vɔ̀, ŋùdãtɔ̀a, e va e mè pɛpɛpɛ sìgbè àlekè be gblɔ̃a nène be: wo la trɔ sɔ mù ɖo èdɔ nyèa nu, eye wo la do èkà ève na èvègɔ̃ nyèa.”

¹⁴Faraɔ̀n na wo yì kplɔ̀ Yosɛ̀f kè wo ɖè to lè ègàkpamè kpàtà-kpàtà a va. Wo plɔ ègɛ̃ na ɛ̀, e ɖɔ̀lì yebe àwùa eye e yì Faraɔ̀n gbɔ.

¹⁵Àmè kèa gblɔ̃ na Yosɛ̀f be: “Mù kudrɔ̃ eye àmè ɖekpe mu teŋu ɖè e gɔ̃mè ò. Vɔ̀ mù sè so ŋuti wò be ne wo gblɔ̃ èdrɔ̃ kuku na wòa, wò teŋu ɖènà e gɔ̃mè.”

¹⁶Yosɛ̀f ɖo e ŋuti na Faraɔ̀n gblɔ̃ be: “Mu nyi ènyè ye ò, Mawu ye ɖo ɖoŋuti àdodoe na Faraɔ̀n be èdrɔ̃a.”

¹⁷Faraɔ̀n gblɔ̃ na Yosɛ̀f e yomè be: “Mù kudrɔ̃ be mù lètè lè ètɔ̀ gãa to.

¹⁸Zè ɖèka kpòa, ènyìnɔ doàmì gbà nya kpɔ adrɛ̃wo to so ètɔ̀a mè. Wo tɔ ègbe ɖùɖu lè ètɔ̀a to.

¹⁹E yomè a, ènyìnɔ adrɛ̃ bu kèwo ɖìkù eye wo nyrã kaka be nyè mu kpɔ woa hati ɖè lè Ejiptè be ànyigbã ji kpɔ òa, wo va lè woa gbɔ.

²⁰Ènyì ɖìkù, nyànyrãwo fɔ̀ ènyìnɔ doàmìawo sɔ mì.

²¹Kè wo fɔ̀ ènyìnɔ doàmìawo mìa, woabe nɔ̀nɔmè mu ɖì èlã kè ɖùnu ŋutɔ tètè ò, vɔ̀ wo gbà ɖìkù, gbà nyrã kpɔkpɔ wu sãa. Kè mù kpɔ ekèa kpòa ye mù jo fɔ̃,

²²vɔ̀a, mù gbà kpɔ èlùtikpe adrɛ̃ kèwo lòlò gbà nya kpɔ mìɔ̃ lè àti ɖèka ŋuti lè èdrɔ̃ mè.

²³E yomè a, èlùtikpe adrɛ̃ bu kèwo ɖìkù eye àya sɛ̃sɛ̃ na wo jo pu a lè mìɔ̃ lè àhàji na wo.

²⁴Èlùtikpe pupuawo fɔ̀ èlùtikpe kèwo lòlòawo sɔ mì! Mù gblɔ̃ ɛ̀ na hũbonɔwo eye àmè ɖekpe mu teŋu kɔ̀ e ŋuti na mù ò.”

²⁵Yosɛ̀f ɖo e ŋuti na Faraɔ̀n be: “Faraɔ̀n ne nya be ènu ɖèka kpò ye èdrɔ̃ èvèawo le gblɔ̃. Mawu sìa Faraɔ̀n ne ènu kè be ɖo la va wɔ̀a.

²⁶Ènyìnɔ doàmì adrɛ̃awo nyi èpè adrɛ̃, èlùtikpe adrɛ̃ kèwo lòlòawo nyi èpè adrɛ̃: nènea ènyà ɖèka kpò ye wo le gblɔ̃.

²⁷Ènyìnɔ ɖìkù adrɛ̃ kèwo va nɔ̀ ɖetɔawo gbɔawo nyi èpè adrɛ̃, nènea ke nyi èlùtikpe ɖìkù adrɛ̃ kèwo àya sɛ̃sɛ̃a puawo yeŋu; wo le nyi àdɔ̀toto be èpè adrɛ̃.

²⁸Ènyà kè mù ɖo la gblɔ̃ na Faraɔ̀n-a yeŋu, ɖo Mawu ɖè ènu kè Faraɔ̀n ɖo la wɔ̀a fiɔ ɛ̀.

²⁹Èpè adrɛ̃ la va eye àgblèmènukuwo la wɔ̀ lè gbɔsùsu mè lè Ejiptè-nyigbã kpata ji.

³⁰Eye lè e yomè a, àdɔ̀ la to èpè adrɛ̃ kaka be wo la ŋlɔ̀be àgblèmènuku nyuɛ̃awo be èpè kèwo va yìa lè Ejiptè-nyigbã kpata ji. Àdɔ̀totoa la nyrã lè ànyigbã ji,

³¹kaka be wo la dã ènu kè ènu gbɛ̀lu be àsì xɔ̀xɔ nyi lè ànyigbã jia, ɖo àdɔ̀toto bàɖà ŋuti.

³²Ne Faraɔ̀n kudrɔ̃ ɖèka ŋùkumèa zè èvèa, e gɔ̃mè ye nyi be Mawu ɖo èkpe ji eye be le ja wɔ̀ ɛ̀ sɔ̀sɔɛɖe.

³³Eŋuã fifìa, Faraɔ̀n ne ji àmè nyanu, ɖè àɖàŋù ne bèa sɔ èdɔ kèa do àsi na ɛ̀ lè ànyigbã ji.

³⁴Eye Faraɔ̀n ne ɖo ènujikpɔtɔwo ànyi ne woa jɔ̀ àgblèmènukuwo be àkpa àtɔ̃gɔ̃a lè Ejiptè-nyigbã kpata ji lè èpè adrɛ̃ be nuku bɔ̀bɔ̀wo mè!

³⁵Wo la bɔ̀ ènukuwo lè èpè nyuɛ̃ adrɛ̃ kèwo gbãnà mè eye wo la sɔ wo ɖo Faraɔ̀n be jiɖùɖu gɔ̃mè lè èdù gãwo mè.

³⁶E la nyi ènu pòtɛ ɖɛ na èdù bliboa, lè àdɔ̀toto be èpè adrɛ̃ kèwo la va ànyigbã jia mè: nènea ye àdɔ̀toto gã mu gbà la crɔ̃ ànyigbã ji viwo ò.”

³⁷Àɖàŋù kèa jè e ji na Faraɔ̀n ku yebe ŋutimewo.

³⁸Faraɔ̀n gblɔ̃ na wo be: “Mi la kpɔ àmè ɖe kè ji Mawu be gbɔ̃gbɔ̃a la nɔ̀ sìgbè àmè kèa nènea?”

³⁹Eye Faraɔ̀n gblɔ̃ na Yosɛ̀f be: “Kè e nyi be Mawu fiɔ ènu kèa keŋu-a, àmè ɖekpe mu gbà lè kè nya ènu gbà la teŋu ɖè àɖàŋù tovò lè e ŋuti ò.

⁴⁰Èwò ye la nyi àpe èdɔjikpɔtɔ gã. Dùkɔ̃ nyèa kpata la nɔ̀ àpo ègbèɖèɖe gɔ̃mè eye èfìɔzìkpea ɖèka kpò ye la nyi vòvòtoto lè nyè gbàkudo èwò dòmè.”

⁴¹Faraɔ̀n gblɔ̃ na Yosɛ̀f be: “Kpɔ, mù sɔ wò ɖo Ejiptè be èdùa kpata nu.”

⁴²E yomè a, e ɖè yebe àlɔ̀gàvi lè àlɔ̀ sɔ do àlɔ̀vi na Yosɛ̀f, e do àwù ɣe biɖibiɖi na ɛ̀ eye be sɔ sìka-wlɔ do èkɔ̀ na ɛ̀.

⁴³E yomè a, e sɔ ɛ̀ do yebe àhùakèkevi èvègɔ̃a mè eye wo le do àpa kplɔ̀ ɛ̀ do be: “Àgòo!… Àgòo!” Nène a ye Faraɔ̀n sɔ ɛ̀ ɖo Ejiptè-nyigbã kpata nu.

⁴⁴Eye e gblɔ̃ na Yosɛ̀f be: “Ènyè ye nyi Faraɔ̀n, vɔ̀, àmè ɖekpe mu la teŋu wɔ̀ ènu ɖekpe lè Ejiptè-nyigbã ji, ne mu xɔ̀ ègbèɖèɖe so gbɔ wò ò.”

⁴⁵E yomè a, Faraɔ̀n ɖo nyikɔ na Yosɛ̀f be Safnàt-Pàneàh, kè gɔ̃mè ye nyi àmèwo be àgbèhlùɛ̃tɔ, eye be sɔ Pòtiferà kè nyi Onè be hũbonɔa be èvi nyɔ̃nù, Àsenà na ɛ̀ be ɖè. Yosɛ̀f yì sã lè Ejiptè-nyigbã a kpata ji, kpɔ ènuwo keŋu be zɔ̃zɔ̃ sui.

⁴⁶Yosɛ̀f ɖo èpè ègbã, wàlɛbɛ kè be yì Faraɔ̀n kè nyi Ejiptè be èfìɔa be ŋùkɔ̀. E yomè a, e jo lè e gbɔ, yì sã to Ejiptè-nyigbã kpata ji.

⁴⁷Lè àgblèmènuku wɔ̀wɔ gbɛ̀lu be èpèawo mèa, ànyigbã na àgblèmènuku sùgbɔ fuu.

⁴⁸Yosɛ̀f lɔ nukuawo ku ènuɖùɖuawo lè èpè adrɛ̃awo mè lè Ejiptè-nyigbã keŋu ji eye e bɔ̀ wo ɖo èdù gã vòvòwo mè; e bɔ̀ àgblèmènuku kèwo wo ɖè lè àgblètawo ɖo èdù gã kèwo sɔ̀ woa gbɔawo mè.

⁴⁹Eye Yosɛ̀f bɔ̀ èlù lè gbɔsùsu mè sìgbè àpùta kɔ nène kaka be mu gbà teŋu le hlɛ̃ wo ò, ɖo wo mu gbà teŋu le jije wo ò.

⁵⁰Keŋu gbɔ̀xue àdɔ̀toto be èpèa la vaa, Pòtiferà, Onè be hũbonɔa be èvi nyɔ̃nù Àsenà jì ŋusùvi èvè na Yosɛ̀f.

⁵¹E yɔ àmègãxotɔa be Manasè, ɖo e gblɔ̃ be: “Mawu tu àpe tagbãwo be èfɛ̃ na mù eye e na mù ŋlɔ̀be ètɔ nyè be àxuedo a cã.”

⁵²Eyomètɔ̀a, e yɔ ɛ̀ be Efràyim ɖo e gblɔ̃ be: “Mawu na mù jì ì lè àpe àyàɖùɖu nyigbã ji”.

⁵³Àgblèmènukuwo be wɔ̀wɔ nyuɛ̃ be èpèawo va yì lè Ejiptè-nyigbã ji

⁵⁴eye àdɔ̀toto be èpèawo jè e gɔ̃mè sìgbè àlekè Yosɛ̀f gblɔ̃ ɛ̀ sãa nène. Àdɔ̀ to àlegbègbè lè èdùwo kpata mè, vɔ̀a, lè Ejiptè-nyigbã kpata jia, ènuɖùɖu lè.

⁵⁵Ekè àdɔ̀ va le wù Ejiptètɔwoa, dùkɔ̃a kpata do àpa lelele biɔ kpɔ̃nɔ Faraɔ̀n. Na Ejiptèviwo kpata, e ɖo e ŋuti be: “Mì yì kpɔ Yosɛ̀f ne mìa wɔ̀ ènu kè be gblɔ̃a.”

⁵⁶Àdɔ̀totoa le yì e ji lè ànyigbã kpata ji. Eye Yosɛ̀f na wo hũ ènu lè nuɖùɖu kè wo bɔ̀ lè èdù gãwo mè ɖɛa ŋuti ne woa sà nukuawo na Ejiptèviwo. Ɖo àdɔ̀totoa ɖèfũ lè Ejiptè-nyigbã ji.

⁵⁷Àmè sia àmè ye yìnà Ejiptè, va yì plènà nuku lè Yosɛ̀f si ɖo àdɔ̀toto sɛ̃nu ŋutɔ lè ànyigbã kpata ji.