Read gen Gɔ̃mèjèje be Xoma 45 Bible Online

Gɔ̃mèjèje be Xoma 45 - gen bible

Gɔ̃mèjèje be Xoma 45

¹Yosɛ̀f mu teŋu ɖù ye ɖokoe ji lè àmè kèwo kpata tɔtè lè funua gbɔ ò. E do àpa be: “Mì ɖè ŋutime nyèwo kpata to.” Woa dòmètɔ ɖekpe mu kpɔ̀tɔ̀ lè funu, wàlɛbɛ kè ye Yosɛ̀f ɖè ye ɖokoe fiɔ ètɔa be èviawo ò.

²E le do hèhè kaka be Ejiptèviwo kpata sè, eye Faraɔ̀n be àxuedo a ŋutɔ cã sè.

³Yosɛ̀f gblɔ̃ na ètɔa be èviwo be: “Ènyè ye nyi Yosɛ̀f. Ètɔ nyèa gbà lè àgbèa?” Vɔ̀ ètɔa be èviwo mu teŋu ɖo e ŋuti na ɛ̀ ò, ɖo wo jo tɔ hũhũ lè ŋùkɔ̀ na ɛ̀.

⁴Yosɛ̀f gblɔ̃ na ètɔviawo be: “Mì tètè gogo mù nyuɛ̃ ɖe.” Eye wo dɔ̃va e gbɔ. E gblɔ̃ be: “Mù nyi mìa nɔ̀vi Yosɛ̀f, ènyè kè mì sàa, ye va lè Ejiptè-nyigbãa ji.

⁵Vɔ̀ fifìa mì mu gbà nɔ̀ ŋuzĩzĩ mè ò, eye mu gbà ve mì ne mìa caka, ɖo mì va sà mù va fikèa ò, ɖo Mawu ye dɔ̃ mù jè ŋùkɔ̀ na mì be ma teŋu va hlùɛ̃ mìabe àgbè.

⁶Èpè èvè kpò ye àdɔ̀ to lè èdùa mè yà, vɔ̀ èpè àtɔ̃ buwo gbãnà ye èku la ɖì; wo mu la do ènu ɖe kaka la va yà ènu ɖe ò.

⁷Mawu dɔ̃ mù jè ŋùkɔ̀ na mì ne ma va ji ènuɖùɖu ɖɛ na mì lè èdùa mè, àlekea be mìa teŋu nɔ̀ àgbè ne mìa gã lè jɔ̀gbèvuɛ̃ a mè.

⁸Eŋuã mu nyi mìawo ye sɔ mù ɖoɖa fikèa ò, vɔ̀a Mawu. E ye ŋutɔ ke gbà ɖo mù Faraɔ̀n be ènujikpɔtɔ gã, yebe àxuedo a be àpetɔ ku Ejiptè-nyigbã kpata jikpɔtɔ.

⁹Mì ɖèbla trɔ yì ètɔ nyè gbɔ ne mìa gblɔ̃ na ɛ̀ be: “Nène a ye èvi wò Yosɛ̀f pò nupo be: “Mawu ɖo mù àpetɔ na Ejiptè-nyigbã kpata, ɖèbla va gbɔ nyè ètè mà-tɔ.

¹⁰Wò la sò àxue ɖo Gosɛ̀n nyigbã ji eye wò la sɔ̀ gbɔ nyè, èwò, èvi wòwo ku tɔgbeyɔvi wòwo, àlɛ̃ha wò ku ènyì wòwo gbàkudo ènu kè nyi tɔ̀ wòa kpata.

¹¹Funua ye mù la kpɔ ji wò lè, ne mù gbà ɖo èhiã mè ò, èwò, àxuedo wòa ku ŋutime wòwo, ɖo e gbà kpɔ̀tɔ̀ èpè àtɔ̃ na àdɔ̀totoa.”

¹²Yosɛ̀f gbà sɔ kpe è be: “Mì le kpɔ ɛ̀ ku mìa ŋutɔ be ŋùkuwo eye nɔ̀vi nyè Bɛnyamìn cã le kpɔ ɛ̀ be mù le pò nupo na mì ku àpe ènu.

¹³Mì yì gblɔ̃ àsì xɔ̀xɔ kè mù ɖo lè Ejiptè bliboa na ètɔ nyè ku ènu kèwo mìabe ŋùkuwo teŋu kpɔa; mì yì ɖèbla kplɔ̀ ètɔ nyè va fikèa.”

¹⁴Yosɛ̀f kpla àsi èkɔ̀ na nɔ̀via Bɛnyamìn le fã àvi eye Bɛnyamìn cã le fã àvi kù kpla fòfoa.

¹⁵Yosɛ̀f kpɔ̀tɔ̀ le fã àvi wàlɛbɛ kè be kpla àsi èkɔ̀ na fòfoawoa eye e yomè a ètɔviawo teŋu pò nupo kudo è.

¹⁶Ènyà kèa yì ɖì lè Faraɔ̀n be àxomè be: “Yosɛ̀f be ètɔviwo va ɖo èdùa mè!” Vɔ̀ Faraɔ̀n ku yebe ŋutimewo hɔ̀ ènyàa ku jìjɔɛ

¹⁷eye Faraɔ̀n gblɔ̃ na Yosɛ̀f be: “Gblɔ̃ na ètɔvi wòawo be: “Mì wɔ̀ ekèa: mì do àgbã na mìabe èlãwo, mì ɖèbla yì Kanàn

¹⁸eye mìa yì kplɔ̀ mìa tɔ ku mìabe ŋutimewo, e yomè a mì trɔ gbɔ̀ va gbɔ nyè, ne ma na mì Ejiptè-nyigbã ji be ènu nyuɛ̃wo eye ne mìa sè èdùa be vivi.”

¹⁹Na èwò ya, sɔ ègbè kèa do àsi na ètɔvi wòawo be: “Mì wɔ̀ ekèa: mì sɔ àgblè kèkewo lè Ejiptè-nyigbã ji na mìa srɔ̃wo ku mìabe èviwo, mì yì kplɔ̀ mìa tɔ ne mìa trɔ gbɔ̀ va;

²⁰mì mu gbà sɔ ŋùku kpɔ ènu kèwo mì la gble ɖɛawo ɖo ènu nyuɛ̃ kèwo lè Ejiptè-nyigbã jia keŋu la nyi mìa tɔ̀.”

²¹Eye ènukèa ye Yakɔb Izràɛl be ŋusùviawo wɔ̀. To Faraɔ̀n be ègbè ɖèɖe jia, Yosɛ̀f na ètɔviawo àgblè kèkewo ku èmɔ̃ zɔ̃zɔ̃ be ènu hiãmèwo keŋu.

²²E na àmè sia àmè àwù xɔ̀asì yeye, vɔ̀a, e na nɔ̀via Bɛnyamìn klòsalòga àlɔ̀ ètɔ̃ ku àwù yeye xɔ̀asì àtɔ̃.

²³E do Ejiptè be ènu xɔ̀asìwo be àgbã na èsɔ àkɛtɛ àtɔ̃ ku èlù be àgbã na èsɔ àkɛtɛ-nɔ àtɔ̃, ènuɖùɖuwo ku èmɔ̃zɔ̃nuwo ɖoɖa ètɔa na yebe èmɔ̃ zɔ̃zɔ̃.

²⁴Eye e ɖè àsi lè ètɔviawo ŋuti ne woa jè èmɔ̃ eye keŋu gbɔ̀xue wo la joa, e gblɔ̃ na wo be: “Mì mu gbà hɛ̃ ènyà lè èmɔ̃a ji ò”.

²⁵E kè wo trɔ jo lè Ejiptè a, wo va ɖo woa tɔ Yakɔb gbɔ lè Kanàn

²⁶eye wo gblɔ̃ na ɛ̀ be: “Èvi wò Yosɛ̀f gbà lè àgbè eye e nyi Ejiptè-nyigbã kpata be èga!” Vɔ̀a, Yakɔb be èjì mu xɔ̀ ènyà kèa ò. Ɖo mu kã ɖo woa ji ò.

²⁷Eye wo gblɔ̃ ènyà kèwo kpata Yosɛ̀f gblɔ̃ na woa na Yakɔb. E yomè a, e kpɔ àgblèkèke kèwo Yosɛ̀f sɔ ɖoɖa ne woa sɔ kplɔ̀ ɛ̀ va Ejiptè a, eye woa tɔ Yakɔb be susu mè hũ.

²⁸Yakɔb, Izràɛl do àpa be: “E sù vɔ̀, èvi nyè Yosɛ̀f gbà kpɔ̀tɔ̀ lè àgbè! Mù ji la yì kpɔ ɛ̀ gbɔ̀xue ma va ku.”