Read gen Gɔ̃mèjèje be Xoma 46 Bible Online

Gɔ̃mèjèje be Xoma 46 - gen bible

Gɔ̃mèjèje be Xoma 46

¹Izràɛl, Yakɔb so jè èmɔ̃ ku ènu kèwo keŋu nyi ye tɔ̀awo. E va yì ɖo Bɛr-Sevà eye e wɔ̀ vɔsa na ètɔa Izàk be Mawu a lè funu.

²Èzã ŋua mèa, Mawu pò nupo na Izràɛl lè èdrɔ̃ mè be: “Yakɔb, Yakɔb!” E ɖo e ŋuti na ɛ̀ be: “Ènyè ye kè!”

³Mawu gblɔ̃ be: “Mù nyi Ɛl, ètɔ wò be Mawu. Mù gbà vɔ̃ Ejiptè-nyigbã ji yìyi ò, ɖo funua ye mù la ɖo wò èdùkɔ̃ gãa lè.

⁴Mù la kplɔ̀ wò yì Ejiptè eye ènyè ke la gbà kplɔ̀ wò gbɔ̀. Eye lè àpo èku yomè a, Yosɛ̀f ye la miɔ̃ ŋùkuviwo na wò.”

⁵Yakɔb jo lè Bɛr-Sevà. Izràɛl be ŋusùviwo kplɔ̀ woa tɔ Yakɔb, woabe èviwo ku woa srɔ̃wo ɖo àgblèkèke kèwo Faraɔ̀n na be woa sɔ kù woa mè.

⁶Wo kplɔ̀ woabe èlãha ku ènu kèwo keŋu lè woa si lè Kanàn nyigbã jia. Yakɔb jo nènea yì Ejiptè-nyigbã ji ku yebe jìjimèviwo kpata,

⁷yebe èvi ŋusùwo, yebe èvi ŋusùwo be èviwo ɖo ŋuti, yebe èvi nyɔ̃nùwo, ku yebe èvi nyɔ̃nùwo be èvi nyɔ̃nùwo. E kplɔ̀ yebe jìjimèviwo kpata yì Ejiptè-nyigbã ji.

⁸Izràɛl be èvi ŋusù kèwo yì Ejiptè a wo be nyikɔwo ye kè: Yakɔb ku èvia ŋusùwo: Yakɔb be ŋusùvi cucugbã ye nyi Rubɛ̀n

⁹Rubɛ̀n be èvi ŋusùwo nyi: Hanɔ̀k, Palù, Hɛsrɔ̀n ku Karmì.

¹⁰Simeɔ̀n be èvi ŋusùwo nyi: Yemùɛl, Yamìn, Ohàd, Yakìn, Sohàr, Sawùl, Kanàn nyɔ̃nùa be èvi ŋusù.

¹¹Levì be èvi ŋusùwo nyi: Gɛrsɔ̀n, Kehàt ku Merarì.

¹²Yudà be èvi ŋusùwo nyi: Ɛr, Onàn, Selà, Perɛ̀s, Zeràh. Vɔ̀ Ɛr ku Onàn wo ku lè Kanàn nyigbã ji. Perɛ̀s be èvi ŋusù kèwo be jìa, wo nyi Hɛsrɔ̀n ku Hamul.

¹³Isakàr be èvi ŋusùwo nyi: Tolà, Puà, Yɔv, Simrɔ̀n.

¹⁴Zabulɔ̀n be èvi ŋusùwo nyi: Serɛ̀d, Elɔ̀n, Yàhelɛ̀l.

¹⁵Woawo ye nyi èvi ŋusù kèwo ye Leà jì na Yakɔb lè Aràm be ègbàjia ku Dinà èvia nyɔ̃nùa. Èvia ŋusù ku nyɔ̃nùawo kpata be hɛ̃hlɛ̃ mè lè gbã vɔ ètɔ̃ (33).

¹⁶Gad be èvi ŋusùwo nyi: Sifiɔ̀n ku Hàgui, Sunì ku Esobɔ̀n, Erì, Arodì ku Arelì.

¹⁷Àsɛr be èvi ŋusùwo nyi: Yimnà, Yisvà, Yisvì, Berìa ku woa nɔ̀vi nyɔ̃nù Sɛràh. Berìa be èvi ŋusùwo nyi: Hebɛ̀r kudo Malkìɛl.

¹⁸Woawo ye nyi Zilpà ke Labàn sɔ na èvia nyɔ̃nù Leà, eye Leà sɔ na Yakɔb be èvi ŋusùwo: woabe hɛ̃hlɛ̃ mè nyi àmè woeàdɛ̃.

¹⁹Yakɔb be èsrɔ̃ Raxɛ̀l be èvi ŋusùwo nyi: Yosɛ̀f ku Bɛnyamìn.

²⁰Lè Ejiptè-nyigbã jia, Asenàt kè nyi Pòtiferà, Onè be hũbonɔa be èvi nyɔ̃nùa jì ŋusùvi èvè Manasè ku Efràyim na Yosɛ̀f.

²¹Bɛnyamìn be èvi ŋusùwo nyi: Belà, Bekɛ̀r ku Asbɛ̀l, Gerà kudo Naamàn, Ehì kudo Rɔs, Mùpim, Hùpim kudo Ardà.

²²Woawo ye nyi èvi ŋusù kèwo ye Raxɛ̀l jì na Yakɔb, woabe hɛ̃hlɛ̃ mè lè àmè woènè.

²³Dàn be èvi ŋusù ye nyi Husìm

²⁴Neftalì be èvi ŋusùwo nyi: Yahsɛ̀l, Gunì, Yesɛ̀r, Silɛ̀m.

²⁵Woawo ye nyi Bilhà kè Labàn sɔ na èvia nyɔ̃nù Raxɛ̀l eye be sɔ ɛ̀ na Yakɔb, èsrɔ̃a be èvi ŋusùwo. Woabe hɛ̃hlɛ̃ mè lè àmè adrɛ̃.

²⁶Àmè kèwo kpata nyi Yakɔb tɔ̀ ku kèwo kplɔ̀ ɛ̀ do yì Ejiptè-nyigbã jia be hɛ̃hlɛ̃ mè nyi èkà takpo-ci-èwo, co èvia ŋusùwo be èsrɔ̃wo mu lè hɛ̃hlɛ̃ kèa mè ò.

²⁷Yosɛ̀f be èvi ŋusù kèwo wo jì na ɛ̀ lè Ejiptè a, nyi àmè èvè. Yakɔb be àxomè tɔ kèwo kplɔ̀ ɛ̀ do yì Ejiptè a, wo nyi àmè èkà takpo-ci-èwo.

²⁸Yakɔb dɔ̃ Yudà jè ŋùkɔ̀ na ɛ̀ ɖoɖa Yosɛ̀f ne bèa va dogò è lè Gosɛ̀n be àgowo ji. Wàlɛbɛ kè wo va ɖo Gosɛ̀n be ànyigbã jia,

²⁹Yosɛ̀f cã sɔ yebe àhùakèkevia eye e tùtà Gosɛ̀n ne bèa yì dogò ètɔa Izràɛl (Yakɔb). Ekè e ɖo funua, kaka kè ètɔa la kpɔ ɛ̀a, Yosɛ̀f tìkpo jè ànyi eye e kpla àsi èkɔ̀ na ètɔa eye e fã àvi ŋutɔ.

³⁰Ètɔa, Izràɛl gblɔ̃ na ɛ̀ be: “Fifìa kè mù kpɔ àpo ŋùkumèa, mù lɔ̃ be ma ku ɖo wò gbà lè àgbè.”

³¹Yosɛ̀f gblɔ̃ na ètɔviawo ku ètɔa be àxuedo a kpata be: “Mù la yì sìa Faraɔ̀n eye mù la gblɔ̃ na ɛ̀ be: “ètɔvi nyèwo ku ètɔ nyè be àxuedo kèwo lè Kanàn nyigbã jia va gbɔ nyè,

³²ŋusù kèawo nyi èlã kplɔ̀tɔwo eye èlã kpò wo nyìnà. Wo kplɔ̀ woabe èlãwo kpata ɖo ŋuti ku ènu kèwo keŋu nyi woa tɔ̀ lè Kanàn.”

³³Nène a, ne Faraɔ̀n va yɔ mì eye be biɔ mì sè be èdɔ kɛ ye mì wɔ̀nà mà a,

³⁴mì ɖo e ŋuti be: “àpo sumɔ̃vi wòwo nyi èlã nyìtɔwo so kaka woabe vifɛ̃mè va ɖo fifì; mì nyi èlã nyìtɔ sìgbè mìa tɔwo ke nène.” Eŋuã mì la teŋu nɔ̀ Gosɛ̀n be ànyigbã ji, ɖo Ejiptètɔwo crì èlãkplɔ̀tɔ be ènyà gbɔ.”