Read gen Gɔ̃mèjèje be Xoma 48 Bible Online

Gɔ̃mèjèje be Xoma 48 - gen bible

Gɔ̃mèjèje be Xoma 48

¹Vɔ̀ lè àzã ŋuawo yomè a, wo gblɔ̃ na Yosɛ̀f be: “Kpɔ, ètɔ wò le le èdɔ̀.” Zè ɖèka, e kplɔ̀ èvi èvèawo Manasè ku Efràyim ɖo ŋuti yì ètɔa gbɔ.

²Wo sìa Yakɔb gblɔ̃ be: “Èvi wò Yosɛ̀f va la ji wò kpɔ.” Izràɛl do ŋusɛ̃ ye ɖokoe sitè nɔ̀ ànyi ɖo àba a ji.

³Kè Yosɛ̀f yì ètɔa Izràɛl gbɔa, Yakɔb gblɔ̃ na ɛ̀ be: “Mawu Ŋusɛ̃kpatatɔa, ze ɖo ji nyè lè Luz, lè Kanàn nyigbã ji. E tu sì na mù,

⁴eye e gblɔ̃ na mù be: “Mù la na wòa jì eye jìjimèvi wòwo la sùgbɔ kaka be dùkɔ̃ fuwo la to so èwò mè. Mù la sɔ ànyigbã kèa na àpo jìjimèviwo ne bèa nyi woa tɔ̀ tɛ̀gbɛ̀dò.”

⁵Eye fifìa, ɖèvi ŋusù èvè kèwo wo jì na wò lè Ejiptè-nyigbã ji keŋu gbɔ̀xue mù va Ejiptè a, wo nyi tɔ̀ nyè. Efràyim ku Manasè wo la nyi tɔ̀ nyè sìgbè àlekè Rubɛ̀n kudo Simeɔ̀n wo nyi tɔ̀ nyèa nène.

⁶Vɔ̀ èvi kèwo wò jì ɖo woa yomè a, wo nyi tɔ̀ wò eye woa fòfoawo be ècrɔ̃ nyigbã mè ye woa cã la kpɔ gomè lè.

⁷Na ènyèa, kè mù trɔ so Aràm be ègbà ji gbãnàa, ye Raxɛ̀l ku lè Kanàn nyigbã ji, lè èmɔ̃a ji, ne wò ji la ɖo Efratà be èdùa mè kpòa. Funua ye mù jrà ɛ̀ ɖo lè, lè Efratà be èmɔ̃ ji kè lè Bɛtlɛhɛ̀m.”

⁸Kè Yakɔb, Izràɛl kpɔ Yosɛ̀f be èvi ŋusù èvèawoa; e do àpa be: “Àmè kɛ ye wo nyi ò?”

⁹Yosɛ̀f ɖo e ŋuti na ètɔa be: “Èvi kèwo ye Mawu na mù lè fikèa ye.” Yakɔb yì e ji be: “Kplɔ̀ wo va àkɔ mè na mù, ne ma tu sì na wo.”

¹⁰Yakɔb be tɔgbe kukua wɔ̀ be mu gbà le kpɔ ènu ò, ɖo yebe ŋùkuviwo ji cɔ̃. E kè ye Yosɛ̀f kplɔ̀ ɖèviawo va àkɔmè na ɛ̀a, Izràɛl kpla àsi èkɔ̀ na wo gbà fã wo sɛ̃sɛ̃ɖe

¹¹e yomè a e gblɔ̃ na Yosɛ̀f be: “Mù kpɔ ɛ̀ va yì be nyè mu gbà la kpɔ ŋùku wò mè gbèɖe ò, eye kpɔɖa fifìa Mawu na mù kpɔ jìjimèvi wòwo ŋutɔ cã!”

¹²Eye Yosɛ̀f xɔ̀ ɖèvi èvè kèwo Yakɔb kɔkɔ ɖo àta jiawo lè e si eye be do èta gũ na ɛ̀.

¹³Yosɛ̀f le ɖèviawo ɖo àsi, Efràyim lè ɖùsimè kè le nyi Yakɔb be èmìɔ̃ mèa eye e le Manasè ɖo èmìɔ̃ mè kè le nyi Izràɛl be ɖùsi mèa. Nɔ̀nɔmè ŋua mè be kplɔ̀ wo yì ètɔa Izràɛl gbɔ ne bèa ɖo àsi èta na wo.

¹⁴Izràɛl drɛ̃ yebe ɖùsi lɔa dà ɖo Efràyim kè nyi vifɛ̃tɔa ji eye e sɔ yebe èmìɔ̃ lɔa dà ɖo Manasè be èta ji. E ɖɔ̀lì yebe àlɔ̀awo be tèpe ɖo Manasè ye le nyi àmègãxotɔa.

¹⁵E tu sì na Yosɛ̀f gblɔ̃ be: “Mawu kè be ŋùkɔ̀ ètɔ nyè Abràham ku Izàk wo zɔ̃ lèa, Mawu kè nyi àpe kplɔ̀tɔ so kaka àpe ɖèvi mèa,

¹⁶Mawu be àtikplɔtɔ kè ɖè mù to lè jɔ̀gbèvuɛ̃wo mèa, ne tu sì na ɖèvi ŋusù èvè kèawo, ne to woa jia, ènyè ku ètɔ nyè Abràham ku Izàk be nyikɔwo ne nɔ̀ ànyi, eye wo jì ɖo e ji lè gbɔsùsu mè lè ànyigbã kpata ji.”

¹⁷Yosɛ̀f kpɔ be ye tɔ sɔ yebe ɖùsi lɔa dà ɖo Efràyim be èta ji eye mu jɔ̀jì na ɛ̀ ò. E ɖè ètɔa be ɖùsi lɔa lè Efràyim be èta ji ne bèa sɔ ɛ̀ dà ɖo Manasè be èta ji.

¹⁸E gblɔ̃ be: “Mu nyi nène ye ò ètɔ nyè ɖo àmè kèa, kè lè ɖùsi mè na wòa ye nyi àmègãxotɔa. Dà ɖùsi lɔ wòa ɖo èta ji na ɛ̀.”

¹⁹Vɔ̀a, ètɔa Izràɛl gbe gblɔ̃ be: “Mù nya èvi nyè, mù nya be e cã la nyi èdùkɔ̃wo be tɔ. Gãkea e yomètɔ̀a la nyi àmègã wu ì, eye dùkɔ̃ sùgbɔ fu la to so yebe jìjimèviwo dòmè.”

²⁰E tu sì na wo gbèŋuãgbè gblɔ̃ be: “To ji wòa, Izràɛl la gblɔ̃ sìtunya kèa: Mawu ne trɔ wò sìgbè Efràyim ku Manasè nène!” E sɔ Efràyim vifɛ̃a dà ɖo ŋùkɔ̀ na Manasè be nyikɔa.

²¹Izràɛl gblɔ̃ na Yosɛ̀f be: “Mù le ja ku, vɔ̀a Mawu la nɔ̀ kudo mì eye be la kplɔ̀ mì trɔ va mìa tɔwo be ànyigbã ji.

²²Ènyè ya, mù gbà le sɔ Sikɛ̀m kè mù xɔ̀ lè Àmorìtɔwo si ku èwui ku èkpòa lè na wò.”