Read gen Gɔ̃mèjèje be Xoma 49 Bible Online

Gɔ̃mèjèje be Xoma 49 - gen bible

Gɔ̃mèjèje be Xoma 49

¹Yakɔb yɔ èvia ŋusùawo bɔ̀, gblɔ̃ na wo be: “Mì bɔ̀ ɖodu ne ma gblɔ̃ ènu kè la va jɔ̀ ɖo mìa jia, na mì.

²Mì bɔ̀ ɖodu eye mì ɖoto mìa Yakɔb be èvi ŋusùwo, mì ɖoto Izràɛl mìa tɔa be ègbè.

³Èwò Rubɛ̀n, wò nyi èvi nyè cucugbã, ɖèkajɛ nyè mè vi cucugbã, ŋusɛ̃ ku èhũ wɔ̀ àdã lè àsi wò.

⁴Mù gbà gbãgo sìgbè ètɔ̀ kèwo fìɔnà nène ò! Kè e nyi be wò ji ètɔ wò be èsrɔ̃ Bilhà, wò pòɖi àba kè ji mù mlɔ̃ a.

⁵Simeɔ̀n ku Levì, wo nyi nɔ̀viwo. Woabe ènyà pòpòsèwo nyi èhlɔ̃dãdãwo.

⁶Nyè mu le yì woabe ènyà lele kpɔwo tèpe ò, nyè mu ji la kpɔ jìjɔɛ ɖo woabe èdunɔ̀nɔ ŋuti ò, ɖo lè woabe èjìbibi mèa, wo wù àgbètɔwo, eye lè woa be gbegble mèa, wo ja ènyì-suwo.

⁷Kpɛ̃sɛ̃ na woabe àdɔ̀mèze kaɖi kaɖia! Kudo woabe gigli bàɖàa! Mù la ma wo lè Yakɔb mè, mù la kãkã wo ɖo Izràɛl kpata.

⁸Yudà, èwò ye ètɔvi wòwo la kafu. Àpo àlɔ̀ la kpɛ̃ lè kɛ̃tɔ wòwo be èhũɖòmè, ètɔ wò be èviwo la do èta gũ na wò.

⁹Oò Yudà, jãŋùtavi ye wò nyi, oò èvi nyè, wò gbɔ̀ so ènutɛ̃trɛ̃ gbe! E ŋɛ̃ èklò eye e mlɔ̃ ànyi sìgbè jãŋùta-su nène eye sìgbè jãŋùta-nɔ nènea, àmè kɛ ye la fɔ̃ ɛ̀ ò?

¹⁰Èfìɔ be nɔ̀nɔmè mu la klã lè Yudà ŋuti kpɔ ò, eye èfìɔtikplɔ la nɔ̀ yebe jìjimèviwo si kaka va ɖo àmè kè ɖo la xɔ̀ ɛ̀, eye èdùkɔ̃wo ɖo la do bùbu e ŋutia, ji.

¹¹Àmè kè ye do èkà yebe èsɔàkɛtɛ ɖo vɛ̃ti ŋuti eye be do èkà yebe èsɔàkɛtɛvi ɖo àlɔ̀zɛ̃a ŋutia, e nyà yebe àwù lè vɛ̃ si mè eye yebe àwù gãa, lè vɛ̃ kpòwo be èhũ mè.

¹²Yebe ŋùkuviwo jì cɔ̃ sìgbè vɛ̃si nène eye yebe àɖuwo ɣe sìgbè ènyìnɔsi nène.

¹³Zabulɔ̀n la sò àxue ɖo àpùa to. E ya, la bɔ̀ àpùjihũwo ɖo àgo eye yebe ànyigbã la kèkè yì Sidɔ̀n gowo ji.

¹⁴Isakàr nyi èsɔ àkɛtɛ kpɔ lãmè kè mlɔ̃ ànyi ɖo èlãkpawo dòmè.

¹⁵E kpɔ be jɛ̃gbɔ̃gbɔ̃ nyɔ eye ànyigbã ji cã nyɔ. E bɔ̀bɔ̀ yebe àbɔtawo ɖo àgbã gɔ̃mè, e nyɔ ne kluvi be dɔwo wɔ̀wɔ.

¹⁶Dàn la ɖo kòjo na yebe dùkɔ̃a sìgbè Izràɛl be kɔ̀tawo dòmètɔ ɖèka nène.

¹⁷Dàn la nyi èdã lè èmɔ̃a ji, lè èmɔ̃ via jia, e la nyi jàkpàtà kè la ɖù èsɔa be àfɔ̀ gɔ̃mè eye èsɔ kùtɔa la gɛ̃, sɔ èkpomè tù ànyi.

¹⁸Lè àpo hlùɛ̃gã mèa, Oò Tɔhonɔ̀ mù lè ŋùɖo mè!

¹⁹Na Gad, àmèwo la nɔ̀ àjòha mè na ɛ̀ eye e ya la ɖè wo ɖo ènu.

²⁰Èlã doàmìwo la so Àsɛr na ènuɖùɖu eye e la nɔ wɔ̀ èfìɔwo be kekè.

²¹Nɛftalì nyi vòvo be àvũgbɛ kè nana nuku nyuɛ̃woa.

²²Yosɛ̀f nyi àti do àmà vi, àti do àmà vi kè lè ètɔ̀ toa eye yebe àlɔ̀zɛ̃wo fla èkpa jè e godo.

²³Wo ji ènyà lè e ŋuti, wo wɔ̀ àjrè ku do è, àŋùtidàtɔwo wɔ̀ àhùa ku do è,

²⁴vɔ̀a, e likè goŋu lè ŋùkɔ̀ na wo eye yebe àbɔ ku àlɔ̀wo wɔ̀ àvũ. To Yakɔb be àbɔ sɛ̃sɛ̃a ji, to Izràɛl be èkpe kè le nyi kplɔ̀tɔa be nyikɔ ji.

²⁵Ètɔ wò Ɛl ne hlùɛ̃ wò gã, Mawu ŋusɛ̃kpatatɔa ne tu sì na wò! Jiŋùkusi be sìtuwo, ànyigbã gɔ̃mè be sìtuwo, ànɔwo kpata be sìtuwo

²⁶ètɔ wò be sìtu kèwo wu gã gbèɖegbè-tɔwo be sìtuwo, ènu jro àmè kèwo so ètokɔ̃ɛwo mèa. Woa kpata ne kɔ̀ ɖo Yosɛ̀f be èta ji, kɔ̀ ɖo àmè kè wo ɖo àsi èta na lè ètɔviawo dòmèa ji.

²⁷Bɛnyamìn nyi gbète trɛ̃ ènu, ŋùdekɛ̃nyɛ̃a e gbà kpɔ̀tɔ̀ le ɖù ènu eye lè fìɛ̃sia e mã àmɔ̀nyɔ̀nu a.”

²⁸Izràɛl be kɔ̀ta woèvè ye lè. Eye ènyà kèawo ye woa tɔa gblɔ̃ na wo wàlɛbɛ kè be tu sì na wo eye be gblɔ̃ sìtu-nya na wo ɖèka-ɖèkaa.

²⁹E yomè a, e do ègbè àsi na wo gblɔ̃ be: “Mù la trɔ yì tɔgbe nyèwo gbɔ. Mì yì ɖì mù ɖo ètɔ nyèwo gbɔ, lè àkpãdo kè lè Hitìtɔ Efrɔ̀n be àgblèa mè,

³⁰lè àkpãdo kè lè Màkpelà be àgblè kè kpãŋùkɔ̀ Màmrà kè lè Kanàn nyigbã jia mè, àgblè kè ye Abràham plè lè Efrɔ̀n Hitìtɔ si eye be sɔ wɔ̀ àmèɖìpe a.

³¹Funua ye Abràham ɖì èsrɔ̃a Sarà ɖo, funua ye wo ɖì Izàk ku èsrɔ̃a Rebekà ɖo, funua ke ye mù ɖì Leà ɖo.

³²Wo plè àgblèa ku àkpãdo kè lè e mèa lè Hɛtì be èvi ŋusùwo si.”

³³Wàlɛbɛ kè Yakɔb sɔ ègbèawo do àsi na èvia ŋusùawo vɔ̀a, e sɔ yebe àfɔ̀wo dà ɖo àba a ji, e jo gbɔ̃gbɔ̃a ɖɛ eye e yì tɔgbeawo gbɔ.