Read gen Gɔ̃mèjèje be Xoma 7 Bible Online

Gɔ̃mèjèje be Xoma 7 - gen bible

Gɔ̃mèjèje be Xoma 7

¹Tɔhonɔ̀ gblɔ̃ na Nɔà be: “Ɖo àɖakàhũa mè, èwò ku àxuedo wòa kpata, ɖo mù kpɔ be wò ɖèka kpò ye nyi àmè jɔ̀jɔɛ lè jìjimè kèa dòmè.

²Wò la sɔ èlã kɔ̀kɔ ɖekpekpe àsu ku ènɔ, èvè-èvè tèpe adrɛ̃, eye èlã mà-kɔ̀ mà-kɔ̀ a, àsu ku ènɔ tèpe ɖèka,

³nèneake e la nyi na àyamè xèviwo àsu ku ènɔ èvè-èvè tèpe adrɛ̃ ne woabe jìjimè mu gbà bu lè ànyigbã ji ò.

⁴Ɖo lè ŋùkèkè adrɛ̃ yomè a, mù la na èji la jà kɔ̀ ɖo ànyigbã ji ŋùkèkè èkà, eye mù la tutu ènu àgbèagbe kèwo mù wɔ̀a, lè ànyigbã ji.”

⁵Eye Nɔà wɔ̀ ɖo àlekè Tɔhonɔ̀ gblɔ̃ na ɛ̀a ji.

⁶Nɔà xɔ̀ èpè èkà woeàtɔ̃ (600) wàlɛbɛ kè ye èsìɖɔɖɔ èdùgbàjà ɖè ànyigbã kpataa.

⁷Ɖo èsìɖɔɖɔa ŋutia, Nɔà ɖo àɖakàhũa mè, e ye ku èviawo, èsrɔ̃a ku èviawo be èsrɔ̃wo.

⁸Èlã kɔ̀kɔwo ku èlã mà-kɔ̀ mà-kɔ̀wo, àyamè xèviwo kudo ènu ɖekpekpe kè le hùã lè ànyigbã jia,

⁹èvè-èvè, àsu ku ènɔ, wo ɖo àɖakàhũa mè lè Nɔà gbɔ sìgbè àlekè Mawu gblɔ̃ ɛ̀ na Nɔà nène.

¹⁰Ŋùkèkè adrɛ̃ a va yì, ye èsìɖɔɖɔ èdùgbàjà xɔ̀ ànyigbã kpata ji.

¹¹Ekè Nɔà xɔ̀ èpè èkà woeàtɔ̃a (600), lè wètri èvègɔ̃a mè, lè ŋùkèkè woeadrɛ̃gɔ̃a gbèa, lè gbè ŋua gbè tutua, ànyigbã ŋɔ eye jiŋùkusi hũ (èsì kè lè èjia ku kè lè ànyigbã be gɔ̃mèawo ŋɔ ènu kè sò woa dòmèa).

¹²Èji jà kɔ̀ ɖo ànyigbã ji ŋùkèkè èkà, èzã èkà.

¹³Lè gbè ŋua gbè, ye Nɔà ɖo àɖakàhũa mè ku èviawo, Sɛm, Cam kudo Jafɛ̀t, e ye gbàkudo wo, èsrɔ̃a kudo ɖèviawo be èsrɔ̃ ètɔ̃awo.

¹⁴Eye èlãwo lè woabe dɛnu, ègbemèlã ku àxomèlãwo lè woabe dɛnu, ènu ɖekpekpe kè le hùã lè ànyigbã jia lè yebe dɛnu, xèviwo lè woabe dɛnu, èlã zòzrowo ku èlã ɖo àwàdawo lè woabe dɛnu.

¹⁵Èlãwo kpata yì àɖakàhũa mè lè Nɔà gbɔ, èvè-èvè, ènuɖoɖo kè mè àgbè gbɔ̃gbɔ̃ gbe lè kpòa.

¹⁶Wo zɔ̃ àsu ku ènɔ yì àɖakàhũa mè; wo ɖo e mè sìgbè àlekè Mawu gblɔ̃ɛ na Nɔà nène. Eye Tɔhonɔ̀ tu hɔ̃tru a do è.

¹⁷Èsìɖɔɖɔa xɔ̀ ànyigbã ji kpata ŋùkèkè èkà. Èsìa sùgbɔ kaka, kɔkɔ àɖakàhũa yì ji lè ànyigbã be ŋùmè.

¹⁸Èsìawo bɔ̀ ɖodu, trɔ èsì gbɛ̀lu ɖe lè ànyigbã a ji, eye àɖakàhũa le kplà lè ŋùkumè na ɛ̀.

¹⁹Èsìɖɔɖɔa be gbɔsùsua le yì e ji lè ànyigbã ji, lè lilikpoawo gɔ̃mè kaka be le èto gã yì ji hũiwo, eye e bu èta na wo,

²⁰ɖo èsìa kɔkɔ yì ji àbɔ woeàtɔ̃. Kè èsìa ɖɔ kaka bu ètowoa,

²¹ènu àgbèagbe ɖekpekpe kè lè ànyigbã jia ku, xèviwo, èlã klìviwo ègbemèlãwo, àxomèlãwo, èlã kèwo gbe hùãnà lè ànyigbã jia ku àgbètɔwo.

²²Ènu kèwo ɖo ŋɔ̀ti sɔ gbɔ̃nà àgbè-yawo, ènu kèwo keŋu lè àgbè lè ànyigbã pupuia jiawo ku.

²³Nène a ye Tɔhonɔ̀ tutu ènu àgbèagbeawo kpata jo lè ànyigbã ji, àgbètɔ, àxomèlãwo, ègbemèlãwo, èlã klìviwo, kudo àyamèxèviwo ŋutɔ cã. Woa kpata wo tutu wo jo, eŋuã Nɔà ɖèka ku ènu kèwo ɖo àɖakàhũa mè kudo èa kpò wo ye kpɔ̀tɔ̀.

²⁴Èsìa nɔ̀ ànyigbã ji gbɛ̀lu xɔ̀ ŋùkèkè èkà ètɔ̃ takpo ci èwò (130).