Read gen Gɔ̃mèjèje be Xoma 8 Bible Online

Gɔ̃mèjèje be Xoma 8 - gen bible

Gɔ̃mèjèje be Xoma 8

¹Eye Mawu ɖo ŋùku Nɔà ku ègbemèlã kudo àxomèlã gbàkudo èlã klìviwo kpata, kèwo lè e gbɔ lè àɖakàhũa mèa ji, eye Mawu na àya pò ɖo ànyigbã ji eye èsìawo jè e mè.

²Ànyigbã mè be èsìwo nu sò, nènea ke ye jiŋùkusi cã nu tu yeŋu. Èsìjàja cã le ye ɖokoe ɖo jiŋùkusi (èjia tɔtè jàja).

³Eye èsì gbɛ̀lua tɔ miɔ̃-miɔ̃ lè ye ŋutɔ ɖokoe si. Èsìa le jè e mè xɔ̀ ŋùkèkè èkà ètɔ̃ takpo ci èwo (150).

⁴eye lè wètri adrɛ̃gɔ̃ a mè, lè yebe ŋùkèkè woeadrɛ̃a gbèa, àɖakàhũa yì li ɖo Àràratè be ètoa ji.

⁵Èsì gbɛ̀lua le ɖiɖi kpɔ̀tɔ̀ kaka va ɖo wètri èwogɔ̃a ji; lè wètri ŋua be ŋùkèkè cucugbã, ètowo be àɖɔ̀mèwo ze.

⁶Eŋuã lè ŋùkèkè èkà yomè a, Nɔà hũ àɖakàhũ kè e kpàa be flɛsɛ̀.

⁷E ɖè àkpàfiɔ̃ to eye e ɖèasi lè e ŋuti, be zrò le yì le gbɔ̀ va kaka va ɖo gàkèmè èsìawo la na èmɔ̃ ànyigbã pupuia.

⁸Kpòa, e ɖè àsi lè peplelu ŋuti ne bèa kpɔ be èsìa ɖiɖi keŋu-keŋu lè ànyigbã be ŋùmè mà a.

⁹Vɔ̀a, peplelua mu kpɔ àfi kè e la jè ɖo ò; e trɔ va Nɔà gbɔ lè àɖakàhũa be èmɔ̃ nu, ɖo èsì lè ànyigbã kpata ji. Nɔà drɛ̃ àsi ɖoɖa eye e le è do àɖakàhũa mè.

¹⁰Nɔà gbà nɔ̀tè ŋùkèkè adrɛ̃ eye e gbà ɖè àsi lè peplelua ŋuti be zrò jo yì.

¹¹Wètrɔgbɔa, peplelua trɔ gbɔ̀ va Nɔà gbɔ eye kpɔɖa àmìti be àmàkpa mumu lè ènu na ɛ̀! Nène a Nɔà nya be èsìa ɖè kpɔ̀tɔ̀ ŋutɔ lè ànyigbã ji.

¹²Nɔà gbà nɔ̀tè ŋùkèkè adrɛ̃ ke eye e gbà ɖè àsi lè peplelua ŋuti be gbà zrò jo yì, eye mu gbà trɔ va e gbɔ ɖe ò.

¹³Lè èpè èkà woeàtɔ̃ àgìgà mè, lè wètri cucugbã be ŋùkèkè cucugbã gbèa, èsìa na èmɔ̃ ànyigbã pupuia ze. Nɔà fo àɖakàhũa be èta mè jo eye e kpɔ be ànyigbã be ŋùmè pu.

¹⁴Wètri èvègɔ̃a mè, lè ŋùkèkè èwì vɔ adrɛ̃ a gbèa, ànyigbã pu keŋu-keŋu.

¹⁵Mawu gblɔ̃ na Nɔà be:

¹⁶“To lè àɖakàhũa mè, èwò, èsrɔ̃ wò, èvi wòwo ku woabe èsrɔ̃wo.

¹⁷Èlã kèwo kpata nɔ̀ ku wòa, ènu ɖekpekpe kè ɖo ŋutilã sìgbè xèviwo, àxomèlãwo, ègbemèlãwo nène kudo ènu ɖekpekpe kè gbe le hùã lè ànyigbã a, ɖè wo to bɔ̀ ɖo ɖokoe wò ŋuti ne woa hùã lè ànyigbã, ne woa jì ɖo ji, ne woa ɖɔ ànyigbã ji.”

¹⁸Nɔà to, eye èviawo, èsrɔ̃a ku èviawo be èsrɔ̃wo bɔ̀ ɖo e ŋuti.

¹⁹Èlãwo kpata, èlã klìviwo kpata xèviwo kpata, ku ènu ɖekpekpe kè gbe le hùã lè ànyigbã jiawo kpata to lè àɖakàhũa mè lè woabe nɔ̀nɔmè mè.

²⁰Nɔà ɖo vɔsakpe ɖèka na Tɔhonɔ̀. E sɔ lè èlã kɔ̀kɔ ɖekpekpe ku xèvi kɔ̀kɔ ɖekpekpe sɔ wɔ̀ vɔsa lè vɔsakpea ji na Tɔhonɔ̀.

²¹Tɔhonɔ̀ gbɔ̃ huɛ̃huɛ̃ gbigblia, e gblɔ̃ lè ye ɖokoe mè be: “Gbèɖe-gbèɖe, nyè mu la gbà sɛ̃kpɛ̃ na ànyigbã ɖo àgbètɔ ŋuti ɖe ò. Nyàwo, àgbètɔ be èjì yìnà èvuɛ̃ gbɔ so kaka yebe ɖèkajɛ mè, vɔ̀a gbèɖe nyè mu la gbà crɔ̃ ènu àgbèagbèwo sìgbè àlekè mù wɔ̀ ɛ̀a nène ò.

²²Kaka kè ànyigbã lèa, ènu dodowo ku ènu yàyawo, fàfa ku zòzo, dɔ̃ŋùkusu be hùenu ku èji be hùenu, ŋùkèkè ku èzã, wo nu ma va yì gbèɖe ò.”