Read gen Gɔ̃mèjèje be Xoma 9 Bible Online

Gɔ̃mèjèje be Xoma 9 - gen bible

Gɔ̃mèjèje be Xoma 9

¹Mawu tu sì na Nɔà ku èviawo, gblɔ̃ na wo be: “Mì jì ɖo e ji eye mìa sùgbɔ ne mìa ɖɔ ànyigbã kpata ji.

²Mì la nyi vɔ̃vɔ̃ ku ŋɔji donu na èlãwo kpata lè ànyigbã ji ku àyamèxèviwo kpata. Ènu ɖekpekpe kè le hùã lè ànyigbã ji ku èsì mè a, èlãwo kpata lè mìa simè.

³Ènu ɖekpekpe kè lè àgbè le hùã, la nyi mìabe ènuɖùɖu sìgbè àlekè ègbe mumu ya lè na mì vɔ̀a nène, mù sɔ ènuwo kpata na mì.

⁴Vɔ̀ gãkea, mì mu la ɖù èlã àgbèagbe ò, e gɔ̃mè ye nyi be èlã kè mè èhũ lè ò.

⁵Eye nènea ke be nyi ne mìabe èhũ, kè nyi mìabe àgbèa, mù la biɔ yebe èhlɔ̃ èlã ɖekpekpe eye mù la gbà biɔ àgbètɔ na àmè sia àmèa, mù la biɔ ɛ̀ nɔ̀via be àgbè be èhlɔ̃.

⁶Àmè kè kɔ̀ àgbètɔ be èhũ ɖo ànyi a, wo la kɔ̀ ye cã be èhũ ɖo ànyi; ɖoa, ɖo Mawu be nɔ̀nɔmè mè ye Mawu wɔ̀ àgbètɔ.

⁷Kè mìawo ya mì jì ɖo e ji ne mìa sùgbɔ, mì hùã ɖo e ji lè ànyigbã ji eye mìa ɖɔ ànyigbã ji.”

⁸Mawu gblɔ̃ na Nɔà ku èviawo be:

⁹“Mù la ɖùzò ku mì, kudo mìabe jìjimèviwo,

¹⁰gbàkudo ènu àgbèagbèwo kpata kèwo lè gbà ku mìa: xèviwo, àxomèlãwo, ègbemèlãwo kpata kèwo lè gbà kudo mìa, kpoe ɖe a, ènu kèwo kpata to lè àɖakàhũa mè kudo mìa, ègbemèlãwo ŋutɔ cã.

¹¹Ma ɖùzò ku mì: ŋutilã ɖekpekpe mu la gbà kpɔ cɔ̃crɔ̃ to èsì gbɛ̀lu ɖɔɖɔ mè ò; èsìɖɔɖɔ gbɛ̀lu mu la gbà ɖè ànyigbã gbèɖe ò.”

¹²Mawu gblɔ̃ be: “Kpɔɖa jèsì kè ma sɔ ɖo èkpe zòɖùɖu kè mù wɔ̀ ku mì ku ènu àgbèagbe ɖekpekpe sɔ na jìjimèwo kpata kèwo gbãnà ye kè.

¹³Mù sɔ àpe ànyiɖohùɛɖo dà ɖo lilikpoa mè ne bèa nyi zòɖùɖu be jèsì lè ènyè ku ànyigbã dòmè.

¹⁴Wàlɛbɛ kè mù la na lilikpowo la va àyamè lè ànyigbã ji eye wò la kpɔ ànyiɖohùɛɖo la ze lè lilikpoa mèa,

¹⁵ma ɖoŋù zòɖùɖu kè lè ènyè ku mì kudo ènu àgbèagbe ɖekpekpe dòmèa ji; èsìwo mu la gbà va trɔ èsìɖɔɖɔ gbɛ̀lu sɔ crɔ̃ ŋutilã gbèɖe ò.

¹⁶Ànyiɖohùɛɖo a la nɔ̀ lilikpoa mè eye mù la kpɔ ɛ̀ sɔ ɖoŋù zòɖùɖu kòkòɖàbì lè Mawu ku ènu àgbèagbe ɖekpekpe dòmèa, ŋutilã ɖekpekpe kè lè ànyigbã jia.”

¹⁷Mawu gblɔ̃ na Nɔà be: “Ekèa ye le nyi zòɖùɖu kè mù wɔ̀ ku ŋutilã ɖekpekpe kè lè ànyigbã jia be jèsìdo.”

¹⁸Sɛm, Cam ku Jafɛ̀t wo nyi Nɔà be èvi kèwo to lè àɖakàhũa mèa; Cam, ye nyi Kanàn be ètɔ.

¹⁹Wo, àmè ètɔ̃awo ye nyi Nɔà be èvi ŋusùwo. Woabe jìjimèviwo ye gbã kpe ànyigbã ji.

²⁰Nɔà ye nyi àgblèdàtɔ cucugbã tɔ̀a. E do vɛ̃ti,

²¹eye e nù vɛ̃a, be mu ì eye e ci àma-àma lè yebe gòxɔa mè.

²²Kanàn be ètɔ, Cam kpɔ àma mè na ètɔa eye e yì to è na nɔ̀viawo lè xixe nu.

²³Sɛm ku Jafɛ̀t wo sɔ Nɔà be àwùgãa, ekè wo sɔ dà ɖo woabe àbɔta, wo zɔ̃ ŋùgbe-ŋùgbe, sɔ àwùa sɔ yì cɔ̃ woa tɔa be àma. Ekè wo trɔ ŋùkumè le kpɔ àfi bua, wo mu kpɔ woa tɔa be àma ò.

²⁴Wàlɛbɛ kè àhà kɔ̀ na Nɔà eye be va nya ènu kè èvia dòmètɔ̀a wɔ̀a,

²⁵E do àpa gblɔ̃ be: “Kpɛ̃sɛ̃ ne nɔ̀ Cam be èvi Kanàn ji, ne bèa nyi kluviwo be kpɔ̀tɛ na nɔ̀viawo.”

²⁶Sɔ kpea, e gblɔ̃ be: “Sìtu ye nyi Tɔhonɔ̀, Sɛm be Mawu a, ne Kanàn bèa nyi kluvi na ɛ̀!

²⁷Na Mawu be àsi ne nɔ̀ Jafɛ̀t ji, ne bèa nɔ̀ Sɛm be gòxɔawo mè tɛ̀gbɛ̀, eye Kanàn bèa nyi woabe kluvi.”

²⁸Lè èsìɖɔɖɔ gbɛ̀lua yomè a, Nɔà nɔ̀ àgbè èpè èkà ènyi takpo ci èwo (350).

²⁹Yebe àgbè nɔ̀ zã kpata nyi èpè èkà èwì vɔ ètɔ̃ takpo ci èwo (950) eye e ku.