Read gen 2Samuɛl 11 Bible Online

2Samuɛl 11 - gen bible

2Samuɛl 11

¹Ekè èpè trɔa, kè wàlɛbɛ kè èfìɔwo yìnà àhùa-gbe jia ɖoa, èfìɔ David dɔ̃ àhùaga Yoab ku yebe àhùakplɔ̀tɔwo keŋu, lè ŋùkɔ̀ na Izràɛl be àhùakɔ̃ bliboa. Wo yì crɔ̃ Amɔ̀n be jìjimèviwo be èdù mètɔwo keŋu, eye wo xɔ̀ ànyi nɔ̀ ɖo Rabà be èdùa be àgbo nu. Wàlɛbɛ ŋua, èfìɔ David ya ci Yèruzàlɛm.

²Lè hùe ŋua nu, gbè ɖèkaa, David fɔ̃ so gà woèvè be àlɔ̃ mè, eye be le ɖìsà lè èfìɔsaa be tamè gbàjà, wètrɔ mè lɔ̀ge. E lè funua, kpɔ nyɔ̃nù ɖe, le lè èsì. Nyɔ̃nùa jè tùgbɛ̀jɛ ŋutɔ.

³David dɔ̃ àmè, wo yì biɔ ènyà so nyɔ̃nùa ŋuti, eye wo gblɔ̃ na ɛ̀ be: “Nyɔ̃nù kèa ye nyi Bat-Cebà, Eliam be èvi kè nyi Urìa, Hitì ŋusùa be èsrɔ̃a.”

⁴David dɔ̃ àmè, wo yì kplɔ̀ nyɔ̃nùa va. Ekè nyɔ̃nùa va David gbɔa, e dɔ̃ nyɔ̃nùa gbɔ, eye Bat-Cebà gbà trɔ yì àxomè. Gà ŋua mèa, ɖe kpò nyɔ̃nùa lè ye ɖokoe ɖì vɔ̀, kè be ɖo àsi ànyi va yìa.

⁵Nyɔ̃nùa fɔ èfu, eye be do àŋɛ̀ ɖoɖa èfìɔ David be: “Mù fɔ èfu”.

⁶David dɔ̃, wo yì gblɔ̃ na Yoab be: “Ɖo Urìa, Hitì ŋusùa ɖoɖa mù.” Eye Yoab ɖo Urìa ɖoɖa David.

⁷Ekè Urìa va ɖo David gbɔa, èfìɔa biɔ àhùaga Yoab ku àhùakɔ̃a ta. E gbà biɔ àleke àhùaa le yì ɖoa.

⁸Ekèa yomè a, David gblɔ̃ na Urìa be: “Yì àxomè, ne wòa klɔ àfɔ̀.” Eye, ekè Urìa to so èfìɔa gbɔa, èfìɔa na, wo sɔ ènu nanawo kplɔ̀ Urìa do.

⁹Vɔ̀a, Urìa mu yì àxomè ò. E ci èfìɔa be gbãdãgbã kèwo ɖiana èfìɔsaa be àgbo nuawo dòmè, dɔ̃.

¹⁰Wo va gblɔ̃ na David be: “Urìa mu yì àxomè ò”, ye èfìɔa biɔ Urìa be: “Mu nyi èmɔ ji dìdi ɖe ye wò so gbɔ̀ ò a? Nukɛ ye wɔ̀, wò mu yì àxomè ò?

¹¹Urìa ɖo e ŋuti na David be: “Tɔhonɔ̀ be Zòɖùɖu-Ɖakà a, Izràɛl dùkɔ̃a ku Yudàviwo lè gòxɔwo mè. Àpetɔ nyè Yoab ku àhùakplɔ̀tɔwo lè àsàɖa mè, lè àhùa-gbe ji. Eye ènyè yaa, mù la yì àxue nyè mè, la ɖù, la nù, la dɔ̃ èsrɔ̃ nyè gbɔa? Èfìɔ bùbùtɔ, mù tà wò ŋutɔ àpo àgbè, be nyè mu la teŋu wɔ̀ ènu kèa gbèɖe ò!”

¹²David gblɔ̃ na Urìa be: “E nyɔ! Gbà ci fikèa egbè. Èsɔ̀a, mù la ɖo wò ɖoɖa.” Ekèa yomè a, Urìa gbà ci Yèruzàlɛm dɔ̃, gbè ŋua gbè ku yebe ŋùkè gbè cã.

¹³David kpe Urìa, va ɖù, nù ku èfìɔa. Eye David na Urìa mu àhà. Gãkea, ekè èzã do a, Urìa gbà yì mlɔ̃ àpetɔa David be gbãdãgbã kèwo ɖiana èfìɔsa be àgbo nuawo dòmè, eye mu yì àxomè ò.

¹⁴Ekè èŋù kèa, David ŋlɔ̀ xoma do àsi na Urìa, ne bèa sɔ na Yoab, lè àhùagbea ji.

¹⁵David ŋlɔ̀ ɖo xoma a mè be: “Mìa sɔ Urìa ɖo ŋùkɔ̀, lè àfi kè àhùa le sɛ̃ŋu lèa. E yomè a, mìa yì ŋùgbe, la gble ye ɖèka ɖɛ, ne bèa ci àhùa.”

¹⁶Yoab kè le kplɔ̀ àhùaa, eye be le kpɔ èdù kè ji wo xɔ̀ ànyi nɔ̀ ɖoa ji be wɔ̀nawo keŋuã, e sɔ Urìa ɖo àfi kè be nya be Amɔ̀ntɔwo be kãlìwo lèa.

¹⁷Ekè gbãdãgbã kèwo le hlùɛ̃ èdùa taawo to va kpe àvũ ku Yoab be gbãdãgbãwoa, wo wù Izràɛlviwo be gbãdãgbãwo, eye David be àhùaŋùkɔ̀nɔ̀tɔ ɖewo. Urìa, Hitì ŋusùa cã ku, lè woa dòmè.

¹⁸Yoab na David nya lekè àvũ ŋua va yì ɖoa keŋu.

¹⁹Yoab ɖè ègbè kè a na àmè dɔ̃dɔ̃ a be: “Ne wò gblɔ̃ lekè àhùa va yì ɖo a keŋu na èfìɔ a vɔ̀ a,

²⁰ne èfìɔ a do àdɔ̀mèze, eye be gblɔ̃ be: 'Nukɛ ŋuti mì dɔ̃ gogo èdù a nène a ɖo ò? Mì mu nyã be wo le dà àŋùti so èglìawo tamè ò a?

²¹Àmè kɛ ye wù Abimèlɛk, Yèrubaal be èvi a ò? Mu nyi nyɔ̃nù ɖe ye dà ète, so Tevɛs be èglìkpa a tamè, sɔ gbã èta na ɛ̀, eye be ku ò a? Nukɛ ŋuti ye mì dɔ̃ gogo èglìkpa a ɖo ò?' Wò la ɖo e ŋuti be: 'Èfìɔ bùbùtɔ be àhùaŋùkɔ̀nɔ̀tɔ Urìa, Hitì ŋusù a cã ku.'”

²²Àmè dɔ̃dɔ̃ a jo, yì gblɔ̃ ènyà kèwo keŋu Yoab do àsi na ɛ̀ a na David.

²³Àmè dɔ̃dɔ̃ a gblɔ̃ na David be: “Àmè ŋuawo sɛ̃ŋu wu mi. Wo to, zɔ̃ ɖo mia ji lè ègbe a ji, lè gbàjà a ji, gãke a, mi kpe àkɔ ku wo, kaka yì ɖo èdùgbo a nu.

²⁴Wàlɛbɛ ŋua ye àŋùtidàtɔwo lè èglìkpa a tamè, le dà àŋùti, àpo gbãdãgbãwo. Àmèwo ku lè èfìɔ bùbùtɔ be àhùaŋùkɔ̀nɔ̀tɔwo dòmè, sìgbè Urìa, Hitì ŋusù a nène.”

²⁵David gblɔ̃ na àmè dɔ̃dɔ̃ a be: “To na Yoab be: 'Ekè a mu wɔ̀ ènu ɖe ò. Lè àhùa-gbe ji a, àmè kuna lè àkpa èvèawo. Mù gbà vɔ̃ ò. Kpe àkɔ ku èdù kè a, ne wò a gbã ɛ̀ keŋu-keŋu.' Nène a ye wò la do jìpò na Yoab yeŋu.”

²⁶Ekè Bat-Cebà sè be ye srɔ̃ kua, e fã ɛ̀ veve ɖe.

²⁷Ekè nyɔ̃nùa wɔ̀ ècɔa vɔ̀a, David kplɔ̀ ɛ̀ va ɖo ye ɖokoe gbɔ, eye be trɔ zũ èsrɔ̃a. Nyɔ̃nùa jì ŋusùvi na David. Vɔ̀a, ènu kè David wɔ̀a, mu jɔ̀jì na Tɔhonɔ̀ ò.