Read gen 2Samuɛl 14 Bible Online

2Samuɛl 14 - gen bible

2Samuɛl 14

¹Seruyà be èvi, Yoab sè e mè be èfìɔa le crì Àbsàlɔm.

²Ekèa ŋutia. Yoab dɔ̃ àmè ɖoɖa Tekoa be èdùa mè, wo yì yɔ nyɔ̃nù ɖe kè ɖo àɖàŋùa va. Yoab gblɔ̃ na nyɔ̃nùa be: “Wòa wɔ̀ sìgbè wò le lòfũ nène. Wò la do èfũlòlo be àwùwo; wò mu la sì àmì hɔ̃hɔ̃ɛ ò, eye wò la nɔ wɔ̀ ènu sìgbè àmè kè ji ècɔ jɔ̀ ɖo xoxoa nène.

³Wò la yì èfìɔa gbɔ, eye wò la gblɔ̃ ènu kè mù la fiɔ wòa na ɛ̀.” Eye Yoab fiɔ nyɔ̃nùa, ènu kè be la wɔ̀, lè èfìɔa gbɔa.

⁴Kè Tekoa nyɔ̃nùa yì èfìɔa gbɔa, e cɔ̃ ŋùmè ànyi, eye be jè èɖɛ̀ na èfìɔa. E gblɔ̃ na èfìɔa be: “Èfìɔ bùbùtɔ, xɔ̀ na mù!”

⁵Èfìɔa biɔ nyɔ̃nùa be: “Nukɛ ye le wɔ̀ wò ò?” Nyɔ̃nùa ɖo e ŋuti be: “Aò! Èfìɔ bùbùtɔ, àhòsì ye mù nyi. Èsrɔ̃ nyè ku.

⁶Ŋusùvi èvè ye nɔ̀ sumɔ̃vi wò nyɔ̃nùa si sãa. Wo àmè èvèawo wɔ̀ àjrè lè àgblè ji, eye àmè ɖèka wù èvègɔ̃a, ɖoa àmè ɖekpe mu nɔ̀ ànyi, la ɖa wo ò.

⁷Ekèa yomè a, miabe xòmètɔ kpɔ̀tɛawo jè àgla ɖo sumɔ̃vi wò ŋuti. Wo gblɔ̃ na mù be: 'Ɖè èvi wò àmèwùtɔa do àsi na mi, ne mia wù ì, sɔ biɔ nɔ̀via kè be wùa be èhlɔ̃. Nène a, ècrɔ̃ ɖùtɔ ɖekpe mu la gbà kpɔ̀tɔ̀ ò.' Ne wo wɔ̀ ekèa, wo la gũ èmɔ̃kpɔkpɔ vitukui, kè kpɔ̀tɔ̀ na mù a, eye èsrɔ̃ nyè be nyikɔ cã la bu lè ànyigbã ji.”

⁸Èfìɔa gblɔ̃ na nyɔ̃nùa be: “Trɔ yì àxomè; mù la do ègbè àsi, ɖo ŋuti wò.”

⁹Tekoa nyɔ̃nùa gblɔ̃ na èfìɔa be: “Èfìɔ bùbùtɔ, ènyè ku xòmè nyè ye jè àgɔ̀. Èfìɔ bùbùtɔ ku yebe àzìkpea mu jè àgɔ̀ ɖekpe ò!”

¹⁰Èfìɔa gbà gblɔ̃ be: “Ne àmè ɖe gbà sɔ ènyà ŋua va kpɔ wòa, kplɔ̀ ɛ̀ va na mù. Mu la gbà do nupo na wò ke ò.”

¹¹Nyɔ̃nùa gbà gblɔ̃ be: “Tàflacɛ, èfìɔ bùbùtɔ, ne fìã àjɔ̀gbè na mù, lè Tɔhonɔ̀, èfìɔ bùbùtɔ be Mawu a be nyikɔ mè be, àmè kè la biɔ èvi nyè kè kua be èhlɔ̃a, mu gbà jo gble ènu, zè èvègɔ̃a, wàlɛbɛ kè be la wù ɖèka kè kpɔ̀tɔ̀ na mù a ò.” Èfìɔa ɖo e ŋuti na nyɔ̃nùa be: “Mù tà Tɔhonɔ̀ na wò be, èvi wò be èɖà kui ɖèka mu la gɛ̃ jè ànyigbã ò!”

¹²Nyɔ̃nùa gbà gblɔ̃ be: “Tàflacɛ, èfìɔ bùbùtɔ ne na yebe sumɔ̃vi nyɔ̃nù ne gblɔ̃ ènyà ɖèka na àpetɔa, èfìɔ bùbùtɔ.” Èfìɔa ɖo e ŋuti be: “Pò nupo!”

¹³Nyɔ̃nùa gblɔ̃ be: “Vɔ̀a ɖe, nukɛ ŋuti wò ɖo ekèa, ɖo Mawu be dùkɔ̃a ŋuti ò? Ekè èfìɔ bùbùtɔ gblɔ̃ ènyà kèa, gãke èfìɔ mu na yebe àmè kè be nyà ɖo ègbea gbɔ̀ va àxue ò a, e jo lè sìgbè èfìɔ bùbùtɔ le dà ye ɖokoe ɖo àmè kè jè àgɔ̀a be èmɔ̃ ji nène.

¹⁴Nyàwo ye be nyi be mia kpata, mi la ku gbè ɖèka. Lekea, mi lè sìgbè èsì nène. Ne wo kɔ̀ ɛ̀ ɖo ànyigbã a, wo mu la gbà teŋu lɔ ɛ̀, ɖo ènu ɖe mè ò. Nène a kea, ne Mawu crɔ̃ àmèa, mu gbà fɔ̃na ɛ̀ ɖotè ò. Gãkea, e wɔ̀ ɖoɖowo na àmè kè èfìɔ bùbùtɔ nyà ɖo ègbea, be mu gbà nɔ̀ àzɔ̀ge boo, na Mawu ò.

¹⁵Fifìa, ne mù va gblɔ̃ ènu kèawo keŋu na àpetɔ nyè, èfìɔ bùbùtɔa, dùkɔ̃a ye do vɔ̃vɔ̃ na mù, eye sumɔ̃vi wò nyɔ̃nùa gblɔ̃ be: “Mù la yì kpɔ èfìɔa; èta mu nyɔ ò a, èfìɔ bùbùtɔ la wɔ̀ ɖo ènu kè yebe sumɔ̃vi nyɔ̃nù la gblɔ̃ na ɛ̀a ji.

¹⁶Ekè èfìɔ bùbùtɔ lɔ̃ be yèa ɖè yèbe sumɔ̃vi ku èvi nyè ŋusù, jo lè àmè kè be yèa crɔ̃ mù lè dùkɔ̃ kè Mawu cã na ye ɖokoea dòmèa si mèa,

¹⁷èfìɔ bùbùtɔ, sumɔ̃vi wò nyɔ̃nùa susu be: 'Àpetɔ nyè, èfìɔ bùbùtɔ be nupo pòpo ne kpe ɖo àmèwo ŋuti, ne woabe èjìwo ne fa. Ɖoa, àpetɔ nyè, èfìɔ bùbùtɔ lè sìgbè Mawu be àtikplɔtɔ nène. E dona vòvòtoto ènu bàɖà ku ènu nyuɛ̃ dòmè' Ekèa ŋutia, Tɔhonɔ̀ àpo Mawu ne nɔ̀ ku wò.”

¹⁸Èfìɔa ɖo e ŋuti na nyɔ̃nùa be: “Mù gbà wla ènu ɖekpe do mù, ne mù biɔ wò ènyà ɖe a ò.” Nyɔ̃nùa gblɔ̃ na èfìɔa be: “Tɔ̀ wò jɔ̀, èfìɔ bùbùtɔ ne pò nupo fàa.”

¹⁹Èfìɔa biɔ nyɔ̃nùa be: “Mu nyi Yoab be àlɔ̀ ye kplɔ̀ wò lè ènyà kèawo keŋu mè ò a?” Nyɔ̃nùa ɖo e ŋuti be: “Mù tà èfìɔ bùbùtɔ be àgbè be àmè ɖekpe mu teŋu zɛ̃ to èmìɔ̃ mè, àlo, ɖùsi mè na ènyà kèwo keŋu èfìɔ gblɔ̃ tututua fifì ò. Nyàwo ye! Sumɔvi wò Yoab ye dɔ̃ mù, eye be do ènyà kèwo keŋu mù la gblɔ̃a, ènu mè na sumɔ̃vi wò nyɔ̃nùa.

²⁰Sumɔvi wò Yoab wɔ̀ ekèa, ne bèa sɔ trɔ ènuwo be ɖoɖo. Vɔ̀a, àpetɔ nyè, èfìɔ bùbùtɔ ɖo àɖàŋù sìgbè Mawu be àtikplɔtɔ nène: Ekèa ŋuti ye èfìɔ bùbùtɔ nyana ènu kèwo keŋu jɔ̀nà lè ànyigbãa jia.”

²¹E yomè a, èfìɔa gblɔ̃ na Yoab be: “E nyɔ. Mù ɖo è be ma zɔ̃ ɖo ènyà kè wò gblɔ̃a ji. Yì kplɔ̀ ɖèvia, Àbsàlɔm gbɔ̀.”

²²Yoab cɔ̃ ŋùmè ànyi, jè èɖɛ̀ na èfìɔa eye be tusì na ɛ̀, eye be gblɔ̃ na ɛ̀ be: “Èfìɔ bùbùtɔ, fifìa, ènyè, sumɔ̃vi wò, mu nya be mù kpɔ màje lè èwò, àpetɔ nyè, èfìɔ bùbùtɔ gbɔ, ekè èfìɔ bùbùtɔ lɔ̃ be yèa wɔ̀ ɖo sumɔ̃vi wò be ènyà jia.”

²³E yomè a, Yoab jè èmɔ, yì Gɛsur, kplɔ̀ Àbsàlɔm gbɔ̀ va Yèruzàlɛm.

²⁴Èfìɔa gblɔ̃ be: “Àbsàlɔm ne trɔ yì yebe àxomè, eye mu gbà ze lè ŋùmè na mù ò!” Àbsàlɔm jo yì yebe àxomè, eye mu gbà va ze lè èfìɔa be ŋùmè ò.

²⁵Àmè ɖekpe mu lè Izràɛl-nyigbã ji ke jè ɖèkajɛ sɔ̀ ku Àbsàlɔm ò. Wo mu kafuna àmè ɖekpe, sɔ̀ ku ì ò. So yebe àfɔ̀ gɔ̃mè, kaka sɔ yì yebe ètaa, èzũ tèpe ɖekpe mu lè e ŋuti ò.

²⁶Èpè sia èpè be ènuwuwua, e lũnà èta, ne yebe èɖàwo le kpɛ̃ wunua. Ne e ko ètaa, wo dànà yebe èɖàwo kpɔ, eye yebe èɖàwo dànà sekɛ̀l àlɔ̀ èvè, ne wo zã èfìɔ be ènu-dànua.

²⁷Wo jì ŋusùvi ètɔ̃ ku nyɔ̃nùvi ɖèka na Àbsàlɔm. Wo yɔna nyɔ̃nùvia be Tamàr, eye be jè tùgbɛ̀jɛ ŋutɔ.

²⁸Àbsàlɔm nɔ̀ Yèruzàlɛm èpè èvè, ekè mu ze lè èfìɔa be ŋùmè ò a.

²⁹Gbè ɖèkaa, Àbsàlɔm do àŋɛ̀ ɖoɖa Yoab be ne va, ne yèa dɔ̃ ɛ̀ ɖoɖa èfìɔ gbɔ, vɔ̀a Yoab gbe be yè mu la yì Àbsàlɔm gbɔ ò. Àbsàlɔm gbà dɔ̃ àmè ɖoɖa Yoab ke, vɔ̀a e gbà gbe ke.

³⁰Ekèa yomè a, Àbsàlɔm yɔ yebe sumɔ̃viwo, gblɔ̃ na wo be: “Mì kpɔ Yoab be èlù-gble kè lè tɔ̀ nyè be àxàda mèa? Mì yì tɔ ɛ̀ èzò!” Àbsàlɔm be sumɔ̃viwo yì tɔ èzò Yoab be àgblèa.

³¹E yomè a, Yoab yì kpɔ Àbsàlɔm, eye be gblɔ̃ na ɛ̀ be: “Nukɛ ŋuti ye sumɔ̃vi wòwo tɔ èzò àgblè nyè ɖo ò?”

³²Àbsàlɔm ɖo e ŋuti be: “Ekè mù dɔ̃ àmè ɖoɖa wò, be wòa va, vɔ̀, wò gbea ŋuti ye. Mù jro be ma dɔ̃ wò ɖoɖa èfìɔ gbɔ, ne wòa yì biɔ ɛ̀ be: 'Nukɛ ŋuti ye mù gbɔ̀ so Gɛsur ɖo ò? E la kè nyɔ na mù wu be ma gbà nɔ̀ funua. Fifìa mù jro be èfìɔa ne xɔ̀ mù. Eye, ne mù jè àgɔ̀ ɖe a, ne wù mù!'”

³³Yoab yì èfìɔa gbɔ, yì ɖè ènyàawo na ɛ̀. Èfìɔa na, wo yɔ Àbsàlɔm va. Àbsàlɔm va èfìɔa gbɔ, cɔ̃ ŋùmè ànyi, lè èfìɔa be ŋùkɔ̀. Ekèa yomè a, èfìɔ kpla àsi èkɔ̀ na Àbsàlɔm.